ایوب ۲۲
۲۲
اِلیفازٚ گبأن
۱ بأزین اِلیفازٚ تیمانی وأگردسته بوگفته:
۲ اینسأن تأنه خودا رِه فایده بدأره؟
حتی حکیمٚ مردأی تأنه اونٚ رِه سودی بدأره؟
۳ اگه تو دوروستکار بیبی، قادرٚ مطلقٚ رِه چی لیذتی دأره؟
اگه تی رأ عیبی نأره، چی سودی خودا رِه دأره؟
۴ فیکر کونی تی خوداترسی وأسی ایسه کی خودا ترَ ادب
یا محاکمه کونه؟
۵ مگه تی شرارت عظیم نی‌یه؟
مگه تی گونایأن تومامی دأره؟
۶ چره کی تی برأرأنٚ جأ بیخود گرویی بیگیفتی،
و تومامٚ اوشأنٚ لیباسَ بکندی.
۷ خسته آدمأنَ آب فنده‌یی،
و گوشنه‌یأنٚ شکمَ سِئرَ نوکودی.
۸ تی اَمرأ فیکر بوکودی کی قوی آدمأن زیمینَ گیریدی،
و پیله کسأن اونٚ دورون زندگی کونیدی.
۹ وِئوه زنأکأنَ دس خالی اوسه کودی،
و یتیمأنٚ حقَ بوخوردی.
۱۰ جٚه اَ خأطر ایسه کی دامأن، جٚه هر طرف ترَ دوره بوکودیدی،
و ایدفعه‌یی وحشت تی جانٚ دورون دکفته،
۱۱ ظولمأت ونأله کی چیزی بیدینی،
و سیلاب ترَ به سرَ شه.
۱۲ «آیا خودا آسمانٚ بوجور جایأنٚ میأن نِیسه؟
بوجورترین ستاره‌یأنٚ جاجیگایَ بیدین چقدر بولنده!
۱۳ و تو گی: ‹خودا چی دأنه؟
تأنه جٚه ظولمأتٚ دورون داوری بوکونه؟
۱۴ سیا ابرأن اونٚ جولُویَ بیگیفتیدی، پس نتأنه بیدینه،
اون آسمانٚ لچه سر رأ شه.›
۱۵ تو هوطو او قدیمٚ رأ دورون ایسَه‌یی،
کی شرورٚ آدمأن اونٚ دورون رأ بوشوییدی،
۱۶ اوشأنی کی خیلی وخت جُلُوتر ببرده بوبوستیدی،
و سیلاب اوشأنَ ریشه جأ بکنده و ببرده؟
۱۷ کی خودایَ بوگفتیدی: ‹اَمی جأ دورَ بو!›
یا ‹قادرٚ مطلق اَمِره چی تأنه بوکونه؟›
۱۸ چره کی اون بو کی اوشأنٚ خانه‌یأنَ برکتٚ جأ پورَ کودی،
پس من شرورأنٚ نقشه‌یأنٚ جأ دور ایسم.
۱۹ دوروستکارٚ آدمأن وختی اَ کارأن بیدینید، خوشحالَ بیدی؛
بی‌گونایأن اوشأنَ رخشنَ گیریدی و گیدی:
۲۰ ‹رأس رأسی اَمی دوشمنأن جٚه بین بوشوییدی،
و اوشأنٚ زار و زندگی آتشٚ دورون بوسوخته.›
۲۱ «پس خودا اَمرأ آشتی بوکون کی جان‌ساقی و آرامش بدأری،
و اَطویی خوشبختَ بی.
۲۲ جٚه اونٚ دَهن یاد گیفتنَ قوبیل بوکون،
و اونٚ گبأنَ تی دیلٚ دورون جا بدن.
۲۳ اگه قادرٚ مطلقٚ ورجأ وأگردی و اگه شرارتَ تی خانه جأ دورَ کونی
دوواره تی زندگی‌یَ تِره وأگردأنه.
۲۴ اگه تی طلایَ خاکٚ دورون بنی،
و ‹اوفیرٚ›#۲۲:۲۴ «اوفیر» ایتأ منطقه بو ایسرائیلٚ شرقٚ طرف کی خیلی اونٚ طلا ذخائر معروفیدی. طلایَ روخانٚ سنگأنٚ میأن،
۲۵ بأزین قادرٚ مطلق تی طلا به،
و تی خالصٚ نقره.
۲۶ چره کی او وخت قادرٚ مطلقٚ جأ لیذت بری،
و تی رویَ خودا طرف وأگردأنی.
۲۷ اونٚ ورجأ دوعا کونی
و اون تی دوعایَ ایشنأوه،
و تو تی نذرأنَ انجام دهی.
۲۸ هر چی وأسی تصمیم بیگیری، انجام به،
و تی رأ روشنَ به.
۲۹ وختی آدمأن خوارَ بیدی، تو گی: ‹خودایه کی تأنه اوشأنَ بولندَ کونه؛›
و اون، فروتنٚ آدمأنَ نجات دهه.
۳۰ اون حتی کسأنی‌یَ کی بی‌گوناه نیبید، آزادَ کونه
و اوشأن، تی دسأنٚ پاکٚ اَمرأ نجات یأفید.»
Currently Selected:
ایوب ۲۲: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media
