ایوب ۲۰
۲۰
شرورأن عذاب کشیدی
۱ بأزین صوفَرٚ نَعَماتی وأگردسته بوگفته:
۲ «می پریشانٚ فیکرأن مرَ زور اَوره کی جواب بدم،
چره کی می دیلٚ دورون غوغا نهَه.
۳ ایتأ سرزنش ایشنَوم کی مِره توهینه،
و می فأم و شور مرَ وادار کونه جواب بدم.
۴ «نأنی کی جٚه قدیمٚ زمأت،
جٚه هو وختی کی اینسأن زیمینٚ سر بوجود بمو،
۵ شرورٚ آدمأنٚ شادی زیاد طول نکشه،
و خودا نشنأسأنٚ خوشی ایتأ لحظه ویشتر نی‌یه؟
۶ اگه چی خودا نشناسٚ غرور آسمانَ فأرسه،
و اونٚ سر ابرأنَ،
۷ ولی خو فضله مأنستن جٚه بین شه،
و کسأنی کی اونَ بیده‌ییدی، وأورسیدی: ‹کویه ایسَه؟›
۸ خوابٚ مأنستن پره و دِه پیدا نیبه؛
شبٚ رویا مأنستن جٚه بین شه.
۹ او چوم کی اونَ بیده، دِه اونَ نیدینه،
و جاجیگایی کی اونٚ دورون زندگی کونه، دِه اونَ فئندره.
۱۰ اونٚ زأکأن، فقیرأنٚ مال و منالَ پس دیهیدی،
و دارایی‌یَ کی مردومٚ جأ فیگیفتید وأگردأنیدی.
۱۱ اونٚ خاشأن جوانی قووتٚ جأ پور ایسه،
ولی اونٚ اَمرأ گیلٚ جیر خوسِه.
۱۲ «اگه چی بدی کودن اونَ مزه دهه،
ولی اونَ خو زوانٚ جیر جیگا دهه،
۱۳ و اونٚ جأ کِیف کونه و ولَ نوکونه،
و اونَ خو دَهنٚ دورون دأره،
۱۴ ولی اونٚ خوراک اونٚ شکمٚ دورون عوضَ به،
و اونٚ جانٚ دورون زهرٚ مار به.
۱۵ مال و منالی‌یَ کی فٚوٚرسته بوجور اَوره؛
خودا او مال و منالَ اونٚ شکمٚ جأ بیرون فأکشه.
۱۶ زهرٚ مارَ فودوشه،
و افعی نیش اونَ کوشه.
۱۷ روخان فئندره،
و حتی نهرأنی کی اونٚ دورون خامه و عسل فراوانه.
۱۸ خو زحمت بکشه مواجبَ وأگردأنه،
و اونٚ گولی جأ بیجیر نشه؛
جٚه خو کار و بار، هی‌ذره کِیف نوکونه.
۱۹ چره کی ستم بکشه آدمأنَ خو پا جیر لقد دمج بوکوده و اوشأنَ تنها بنَه.
او خانه‌یی کی خودش چأنکوده زورٚ اَمرأ بیگیفته.
۲۰ «اونٚ شکم هیوخت سئرایی نأره،
هَنٚ وأسی ونأله چیزأنی کی دوس دأره، جٚه دس بده.
۲۱ دِه چیزی نمأنسته کی بوخوره،
هَنٚ وأسی اونٚ خوشبختی دوام نأره.
۲۲ وختی پیله خوشبختی‌یَ دأره، ایدفعه‌یی بدبختَ به.
فلک زده‌یأنٚ دس اونٚ طرف درازَ به.
۲۳ وختی کی خو شکمَ پورَ کونه،
خودا خو غیظٚ آتشَ اونٚ طرف اوسه کونه،
و هَطو کی خوردَن دره، اَ آتشَ اونٚ سر وأرأنه.
۲۴ حتی اگه آهینی سلاحٚ جأ جیویزه،
برنجی تیر اونَ خوره.
۲۵ تیرَ بیرون فأکشه و اونٚ پوشتٚ جأ بیرون اَیه؛
اونٚ توک کی برق زنه، اونٚ زهله‌یَ ترکأنه.
تومامٚ اونٚ جانَ ترس و وحشت گیره.
۲۶ اونٚ ذخیره بوکوده مال و منالَ ظولمأت گیره.
ول ولٚ آتش ایوأرکی اونَ فٚوٚره،
و هرچی کی اونٚ خیمه دورون بمأنسته، خوره.
۲۷ آسمانأن اونٚ گونایَ آشکارَ کونه،
و زیمین اونٚ ضد ویریزه.
۲۸ اونٚ خانه‌یَ سیل بره،
توندٚ آبأن، او روزی کی خودا غضب کونه.
۲۹ هَن ایسه اونچی کی خودا، شرورٚ آدمٚ نصیب کونه،
اونچی کی خودا اونٚ رِه ارث تعیین بوکوده.»
Currently Selected:
ایوب ۲۰: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media
