ایوب ۲

ایوبٚ دوّمی ایمتحان

۱ ایروزٚ دیگر فرشته‌یأن بموییدی و خوداوندٚ ورجأ بپا بِئسَه‌یید کی شیطانم اوشأنٚ اَمرأ بمو. ۲ خوداوند، شیطانٚ جأ وأورسه: «جٚه کویه اَمون‌دری؟» شیطأن خوداوندَ جواب بدَه: «زیمینٚ سر شوئون اَمون کودیم و گردستیم.» ۳ خوداوند شیطانَ بوگفته: «تی فیکر، می خادم ایوبٚ رو نهَه؟ اونٚ مأنستن هیکس زیمینٚ سر نِیسَه. هیچ عیبی نأره و دوروستکار و خوداترسه و بدی جأ دوری کونه. اون هَطویی خورَه بدأشته با اَنکی مرَ انتریک بوکودی کی اونَ بی‌دلیل ضرر برسأنم.» ۴ شیطأن وأگردسته بوگفته: «پوست عوضٚ پوست. #۲‏:۴ «پوست عوضٚ پوست» عبری زوانٚ دورون ایتأ اصطلاح ایسه ینی هر آدمی دیگرأنٚ جانَ به خطر تأوده و تومامٚ چیزأنی کی دأره جٚه دس دهه تا خو جانَ حفظ بوکونه. آدم هرچی دأره حاضره خو جانٚ وأسی فأده. ۵ هسأ تی دسَ درازَ کون و اونٚ گوشت و خاشأنَ دس بزن، دینی کی تی جُلُو ترَ نفرین کونه.» ۶ خوداوند، شیطانَ بوگفته: «هسأ اون، تی دسٚ دورون نهَه، فقط اونٚ جانَ حفظ بوکون.»

۷ بأزین شیطأن جٚه خوداوندٚ ورجأ بوشو و ایوبٚ کفٚ پا تا سرٚ تأنَ چلکی دُمبُلٚ اَمرأ گیرفتارَ کوده. ۸ پس ایوب ایتأ سفال تیکه اوسأده تا هوطویی کی خاکسترٚ دورون نیشته‌بو خورَه بخارأنه.

۹ بأزین اونٚ زن بوگفته: «هَطویی خوأیی ترَ بدأری؟#۲‏:۹ ایوبٚ زنأی اَ جمله‌یَ طعنه اَمرأ بوگفته. خودایَ نفرین بوکون و بیمیر!» ۱۰ ایوب وأگردسته و بوگفته: «تو بی‌عقلٚ زنأکأنٚ مأنستن گب زِئن‌دری. خوأیی خوروم چیزأنَ خودا جأ قوبیل بوکونیم و بدٚ چیزأنَ اون جأ قوبیل نوکونیم؟» ایوب تومامٚ اَ موصیبتأنَ بیده ولی خو گبأنٚ اَمرأ گوناه نوکوده.

ایوبٚ رِفِقأن

۱۱ وختی ایوبٚ سه‌تأ رِفِقأن کی اوشأنٚ نام اِلیفازٚ تیمانی، بِلدَدٚ شوحی و صوفَرٚ نَعَماتی بو جٚه تومامٚ بلایأنی کی ایوبٚ سر بمو بو وأخبرَ بوستید، خوشأنٚ خانه جأ بوشوییدی همدیگرٚ ورجأ و تصمیم بیگیفتیدی بیشید، ایوبٚ اَمرأ همدردی بوکونید تا آرامَ به.

۱۲ وختی جٚه دور ایوبَ بیده‌ییدی، اونَ نشنأختید. بأزین ایجگره بزه‌ییدی و اَرسو فوکودیدی و خوشأنٚ لیباسَ ژندره مندره بوکودیدی و خاک خوشأنٚ سر فوکودید. ۱۳ بأزین هفت شبنده روز اونٚ اَمرأ زیمینٚ سر بینیشتید و هیچ کودام اونَ هیچی نوگفتید، چره کی بیده‌یید ایوب، دردٚ خیلی زیادی‌یَ تحمول کودَن‌دره.

Currently Selected:

ایوب ۲: گیلکی (رشتی)

Highlight

Copy