ایوب ۱۶
۱۶
ایوبٚ جواب
۱ ایوب وأگردسته بوگفته:
۲ اَ جور گبأن زیاد بیشنأوستم؛
جای اَنکی تسلی بدید مزاحمیدی.
۳ تی بیخودی گبأن تومامی نأره؟
چی چیز ترَ انتریک کونه کی گب بزنی؟
۴ منم تأنستیم شیمی مأنستن گب بزنم،
اگه شومأن می جا بوبوسته‌بید؛
تأنستیم شیمی ضد گبأنی سرٚ هم بوکونم
و می سرَ تکان بدم.
۵ ولی می دَهنٚ اَمرأ شیمی دیلَ گرمَ کودیم
و می لبأنٚ مره شیمی غورصه‌یأنَ جٚه بین بردیم.
۶ اگه گب بزنم، می درد آرامَ نیبه
و اگه می دَهنَ دودم، چوطویی اون می جأ دورَ به؟
۷ رأس رأسی اَی خودا، دِه مرَ خستَه کودی
و تومامٚ می فک و فامیلَ جٚه بین ببردی.
۸ تو مرَ فوچولکأنه‌یی#۱۶:۸ «فوچولکأنن» فارسی زوأنٚ دورون «پژمرده کردن، پلاسیده کردن یا سبب پلاسیدگی یا پژمردگی شدن» گیدی. و هَن نیشأن دهه کی می ضدی؛
می خاشٚ جان می ضد ویریشته و می رودرویم شهادت دهه.
۹ خودا خو غیظٚ اَمرأ مرَ پارَه کوده
و می اَمرأ دوشمنی بوکوده.
می ضد خو گازأنَ سربسر سأبأنه؛
دوشمنٚ مأنستن خو چومأنٚ اَمرأ مرَ پایه.
۱۰ مردومأن خوشأنٚ گبأنٚ اَمرأ مرَ دس پرَ گیریدی.
تحقیرٚ اَمرأ مرَ کشیده زنیدی؛
همدیگرٚ اَمرأ می ضد جمَ بوستید.
۱۱ خودا مرَ ظالمأنٚ دس تسلیم بوکوده
و شرورٚ آدمأن چنگالٚ دورون بنَه.
۱۲ آرامشٚ اَمرأ زندگی کودَن دوبوم ولی اون مرَ بیشکأنه.
می گردنَ بیگیفته و مرَ خوردَ کوده.
خو تیرٚ اَمرأ مرَ هدف بیگیفته
۱۳ و اونٚ کمان‌دارأن مرَ دورَ کودید.
می قلوه‌یأنَ پاره کونه و مرَ رحم نوکونه
و می زهله‌یَ زیمینٚ سر فوکونه.
۱۴ مرَ تترج کوبه و دوواره اَ کارَ تکرار کونه،
و ایتأ جنگجو مأنستن مرَ هوجوم بره.
۱۵ «می جانٚ پوستٚ سر عزاداری لیباس بودوختم،
و ناتوانی اَمرأ خاکٚ سر بکفتم.
۱۶ می دیم گریه جأ سورخَ بوسته
و ظولمأت می چومأنٚ سر سایه تأودَه،
۱۷ اگه چی می دسأن خشونت نأوریدی
و می دوعا پاکه.
۱۸ «اَی زیمین، می خونَ نوأ پوشأنن؛
ونأل می ایجگره آرامَ به.
۱۹ حتی هسأ می شاهد آسمانٚ میأن ایسَه
و می گواه عرشٚ میأن.
۲۰ می رِفِقأن مرَ دس پرَ گیریدی؛
می چومأن خودا ورجأ اَرسو فوکونه.
۲۱ کأشکی اینفر من و خودا میأن پادرمیأنی بوکونه،
هوطو کی ایتأ آدم خو رِفِقأنٚ وأسی.
۲۲ چره کی ایتأ چن سال کی بوگذره،
رأیی‌یَ شم کی دِه نتأنم وأگردم.
Currently Selected:
ایوب ۱۶: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media
