عِزرا ۳
۳
قوربانگاه چأکودن
۱ وختی هفتمی ماه فأرسه و بنی‌ایسرائیل خوشأنٚ شهرأنٚ میأن ایسَه‌بید، تومامٚ قوم ایتأ دیل بوبوستیدی و اورشلیمٚ میأن جمَ بوستید. ۲ بأزین یِشوعَ، یوصاداقٚ زأی و اونٚ برأرأن کی کاهن بید و هَطویم زروبابِل، شِئَلتیئیلٚ زأی و اونٚ برأرأن ویریشتیدی و ایسرائیلٚ خودا رِه قوربانگاه چأکودید تا هوطو کی خودا اینتخاب بوبوسته مردأی ینی موسی، توراتٚ دورون بمو بو، سوجأنئنی قوربانی‌یأنَ اونٚ سر پیش‌کش بوکونید. ۳ با اَنکی او سرزیمینٚ مردومأنٚ جأ ترسه‌ییدی، ولی هَطویم قوربانگاهَ اونٚ جا سر دوواره چأکودید و صُب و شب سوجأنئنی قوربانی‌یأنَ خوداوندٚ رِه اونٚ سر پیش‌کش کودیدی. ۴ بأزین خیمه‌یأنٚ عیدَ، هوطو کی بینیویشته بوبوسته، جشن بیگیفتید و هر روز سوجأنئنی قوربانی‌یأنَ هو قدر کی هر روزٚ رِه تعیین بوبوسته‌بو قانونٚ اَمرأ پیش‌کش بوکودید ۵ و بأزین همیشگی قوربانی‌یأنَ کی سوجأنه‌ییدی، تازه ماه قوربانی‌یأن و تومامٚ خوداوندٚ موقدّسٚ عیدأنٚ قوربانی‌یأن و هر کسٚ قوربانی‌یأن کی خودا رِه خودشٚ میلٚ اَمرأ بأورده‌بو، پیش‌کشی بوکودید. ۶ اوّلی روز جٚه هفتمی ماه، با اَنکی هنوز خوداوندٚ معبدٚ پاکار چأکوده نوبوسته‌بو، شروع بوکودید سوجأنئنی قوربانی‌یأنَ پیش‌کش کودن. ۷ بأزین اوشأن، هوطو کی کوروش، پارسٚ پادشا جأ ایجازه بیگیفته‌بید، سنگتراشأن و نجارأنَ سکه فأدَه‌ییدی و صیدون و صورٚ مردومأنَ خوراک و نوشیدنی و روغن فأدَه‌ییدی تا اوشأن، لبنانٚ جأ سروٚ چوبَ دریا رأ جأ یافایَ بأورید.
معبدٚ دوواره چأکودن
۸ دوّمی ماه جٚه دوّمی سال، بعدٚ اَنکی قوم فأرسه‌یید هو جایی کی معبد قبلنأن اورشلیمٚ میأن نهَه‌بو، زروبابِل، شِئَلتیئیلٚ زأی و یِشوعَ، یوصاداقٚ زأی خوشأنٚ الباقی دینی برأرأنٚ اَمرأ، ینی کاهنأن و لاویأن و تومامٚ کسأنی‌یَ کی تبعیدٚ جأ، اورشلیمَ وأگردسته‌بید، شروع به کار بوکودید. اوشأن لاویأنی کی بیست سال یا ویشتر دأشتیدی بنَه‌یید کی معبدٚ کارأنَ نظارت بوکونید. ۹ یِشوعَ خو پسرأن و خو برأرأنٚ اَمرأ و قَدمیئیل خو پسرأنٚ اَمرأ کی هودویا#۳:۹ هودویا نامی ایسه کی باب ۲ آیه ۴۰ دورون بینیویشته بوبوسته ولی اَ آیه دورون یهودا بمو کی عبری زوانٚ دورون اَ دو تأ نام همدیگرٚ شبیه ایسید. نسلٚ جأ بید، و حینادادٚ پسرأن و اونٚ برأرأن کی همه‌تأن لاویأنٚ جأ بید همدیلی اَمرأ ویریشتیدی کی اوشأنی‌یَ کی معبدٚ رو کار کودن دیبید نظارت بوکونید. ۱۰ وختی بنایأن، خوداوندٚ معبدٚ پاکارَ بکندید، کاهنأن خوشأنٚ کاهنی رخت و لیباسَ دوکودید و کرنا اَمرأ و لاویأن بنی آسافٚ پسرأن خوشأنٚ سنجأنٚ اَمرأ ویریشتیدی تا خوداوندَ هوطو کی داوود، ایسرائیلٚ پادشا دستور بدَه‌بو، ستایش بوکونید ۱۱ و آواز خوأندیدی و خوداوندَ ستایش و شوکر گفتید:
«خوداوند نیکو ایسه،
چره کی اونٚ موحبت، ایسرائیلٚ سر تا اَبد ایدامه دأره.»
و تومامی قوم صدای بولندٚ اَمرأ فریاد بزه‌ییدی و خوداوندَ معبدٚ پاکارٚ وأسی ستایش کودیدی. ۱۲ ولی خیلی جٚه کاهنأن و لاویأن و پیله کسأن کی همه‌تأن پیر بیدی و اوّلی معبدَ بیده بید، وختی معبدٚ پاکارٚ اوشأنٚ چومأنٚ جُلُو بکنده بوستی، ایجگره اَمرأ گریه کودیدی، هوطویی کی خیلی‌یأن شادی اَمرأ خوشأن صدایَ بولندَ کودید. ۱۳ جوری کی مردوم نتأنستیدی شادی فریادَ، ایجگره جأ فرق بنید، چره کی قومٚ فریاد اونقدر بولند بو کی اوشأنٚ صدا دورٚ جأ بیشنأوسته بوستی.
Currently Selected:
عِزرا ۳: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media
