خروج ۲۰

۲۰

ده فرمان

۱ بأزین خودا اَطو بوگفته:

۲ «من یهوه، تی خودا ایسم، کی ترَ مصرٚ جأ، ینی هو سرزیمینی کی شومأن اونٚ دورون غولام بید، بیرون بأوردم.

۳ «تو خودایأنٚ دیگری بجز من نوأ بدأری.

۴ «هیچ بُتی تِره نوأ چأکودن ینی شکلٚ هیچ کدام جٚه او چیزأنی کی آسمانٚ میأن، زیمینٚ سر یا زیر زیمینی آبأنٚ دورون نهَه. ۵ اوشأنَ سوجده و عیبادت نوکون، چونکی من، یهوه، تی خودا ایسم کی تی سر غیرت دأرم، پئرأن تقصیرأنٚ موجازاتَ، اوشأنٚ زأکأن و حتی سومی و چارمی نسلَ فأرسأنم، هوشأنی‌یَ کی مرَ بد دأریدی ۶ ولی کسأنی‌یَ کی مرَ دوس دأریدی و می دستورأنَ بجا اَوریدی، تا هیزار نسل موحبت کونم.

۷ «یهوه، تی خودا نامَ بیخودی ایستفاده نوکون، چونکی خوداوند هر کسَ کی اونٚ نامَ بیخودی ایستفاده بوکونه، موجازات کونه.

۸ «شَبّاتٚ روزَ بیاد بدأر و اونَ موقدّس بدأر. ۹ شیش روز تأنی کار بوکونی و تومامٚ تی کارأنَ انجام بدی. ۱۰ ولی هفتمی روز شبّات ایسه کی یهوه، تی خودا تعیین بوکوده. اونٚ دورون تو، تی پسر، تی دُختر، تی غولام، تی کنیز، تی چهارپایأن و هر غریبی کی شیمی شهرأنٚ دورون ایسَه، هیچ کاری نوکونید. ۱۱ چونکی خوداوند شیش روزٚ دورون آسمان و زیمین و دریا و هر چی‌یَ کی اوشأنٚ میأن وجود دأره، خلق بوکوده ولی هفتمی روز خو کارٚ جأ آرام بیگیفته. هَنٚ وأسی خوداوند روزٚ شبّاتَ برکت بدَه و تقدیس بوکوده.

۱۲ «تی پئر و مارَ ایحترام بنه تا او سرزیمینٚ میأن کی یهوه، تی خودا ترَ بخشه، عمرٚ درازی بدأری.

۱۳ «قتل نوکون.

۱۴ «زنا نوکون.

۱۵ «دوزدی نوکون.

۱۶ «دیگرأنٚ ضد شهادتٚ دوروغ ندن.

۱۷ «دیگرأنٚ خانه‌یَ چوم نوأ دأشتن کی تی‌شین ببه. اوشأنٚ زن یا غولام و کنیز، یا گاب و اولاغ و هرچی‌یَ کی دأریدی، طمأ نوکون.»

۱۸ وختی قوم گورخانه‌یَ بیده‌ییدی و کرنا صدایَ بیشتأوستیدی و کویَ بیده‌ییدی کی دود اونٚ همه جایَ بیگیفته‌بو، ترسٚ جأ بپرکستیدی. اوشأن دور بِیسَه‌ییدی ۱۹ و موسایَ بوگفتیدی: «تو خودت اَمی اَمرأ گب بزن و اَمأن گوش دیهیمی. ولی خودا اَمی اَمرأ گب نزنه کی میریمی.» ۲۰ موسی قومَ بوگفته: «نوأ ترسئنید. خوداوند بمو شمرَ ایمتحان بوکونه کی اونٚ ترس شیمی دیلٚ دورون بمأنه و گوناه نوکونید.» ۲۱ پس قوم هویه بِیسَه‌یید و موسی او غلیظٚ ابرَ کی خوداوند اونٚ میأن ایسَه‌بو، نزدیکَ بوسته.

Currently Selected:

خروج ۲۰: گیلکی (رشتی)

Highlight

Copy