خروج ۱۲
۱۲
عیدٚ پِسَخ
۱ خوداوند مصرٚ سرزیمینٚ میأن موسی و هارونَ دوخوأده و بوگفته: ۲ «هَه ماه وأ شِمره شروع ببه ینی اوّلی ماهٚ شیمی سال. ۳ تومامٚ ایسرائیلٚ جماعتَ بیگید کی دهمی روزٚ اَ ماه هر مردأکی وأستی خو اهل و عیالٚ رِه ایتأ برّه اینتخاب بوکونه، هر خانه‌وارٚ رِه ایتأ برّه. ۴ اگه ایتأ برّه ایتأ خانه‌وارٚ رِه زیاد ببه، ایتأ خانه‌وارٚ دیگرم جٚه همساده‌یأن خوشأنٚ اَمرأ بیشمرید و او برّه‌یَ همدیگرٚ مره سأم بوکونید. هر کسٚ رِه به اندازه‌یٚ خودشٚ خوراک حیساب بوکونید. ۵ شیمی برّه وأ بی‌عیب، نر و یکساله ببه، جٚه گوسفندأن یا بوزأن اینتخاب بوکونید. ۶ اونَ تا چاردهمٚ اَ ماه وأ بدأرید، و غروب دم بنی‌ایسرائیلٚ تومامٚ جماعت خوشأنٚ حیوانأنَ سر وَوینید. ۷ بأزین ایپچه جٚه او قوربانی خونَ اوسأنید و خانه درٚ چارچوبٚ دو طرف و اونٚ جورَ وأسِنید، هو خانه‌یی کی اونٚ دورون اوشأنَ خوردَن درید. ۸ گوشتَ وأ هو شب کباب بوکونید و نانی کی تورشٚ خمیر نأره و تلخٚ سبزی‌یأنٚ اَمرأ بوخورید. ۹ گوشتَ کال یا آبپز نوخورید، بلکی هَطو دیل و جگر و کله و پاچه اَمرأ کباب بوکونید. ۱۰ گوشتَ تا صُب نوأ بدأرید و اگه هر چی زیاد بمو، آتشٚ سر بوسوجأنید. ۱۱ اَطویی اونَ بوخورید: شیمی کمرقشَ دودید، شیمی کفشَ دوکونید، شیمی عصایَ بدسَ گیرید، تونداتوند بوخورید و اَن پِسَخٚ خوداوند ایسه. ۱۲ من هو شب مصرٚ سرزیمینٚ میأن دوأرم و تومامٚ اینسأنأن و چهارپایأنٚ اوّلی زأکأنَ کوشم و مصرٚ خودایأنَ داوری کونم. من خوداوند ایسم. ۱۳ او خون ایتأ نیشأنه به او خانه‌یی وأسی کی اونٚ دورون ایسَه‌ییدی. خونَ کی بیدینم، شیمی جأ دوأرم، و وختی کی مصرَ زِئن درم هیچ بلایی شیمی سر نأیه. ۱۴ اَ روز شمرَ یاد بمأنه، اونٚ دورون خوداوندٚ رِه جشن بیگیرید. اَ عید ایتأ قانون ببه کی نسل به نسل تا همیشه بر پا بوکونید. ۱۵ هفت روز وأ نانی بوخورید کی تورشٚ خمیر نأره. اوّلی روزم وأ خمیرمایه شیمی خانه جأ بیرون ببرید. جٚه اوّلی تا هفتمی روز هر کس نانی بوخوره کی تورشٚ خمیر دأره، وأ بنی‌ایسرائیلٚ جأ ریشه‌کن و سیوأ ببه. ۱۶ اوّلی و هفتمی روز، وأ ایتأ مجلسٚ موقدّس بر پا بوکونید. اَ روزأن وأ هیچ کاری نوکونید، فقط هر کسٚ خورد و خوراکَ اونٚ رِه حاضرَ کونید. ۱۷ عیدٚ فطیرَ حفظ بوکونید، چونکی هَه روز بو کی من شیمی لشکریأنَ مصرٚ سرزیمینٚ جأ بیرون بأوردم. اَ عید ایتأ قانون ببه کی نسل به نسل تا همیشه بر قرار ببه. ۱۸ اوّلی ماهٚ چهاردهمی روز کی شب دکفته، تا بیست و یکمی روزٚ هو وخت، نانی کی تورشٚ خمیر نأره، بوخورید. ۱۹ هفت روز شیمی خانه میأن تورشٚ خمیر نوأ پیدا ببه. هر کی چیزی بوخوره کی اونٚ دورون تورشٚ خمیر بدأره، وأ ایسرائیلٚ جماعتٚ جأ سیوأ ببه، چی هویه شین ببه، چی غریبه. ۲۰ هر چی کی تورشٚ خمیرٚ اَمرأ چأکوده بوبوسته، نوأ بوخورید، بلکی هر جا کی زندگی کونیدی نانی بوخورید کی تورشٚ خمیر نأره.» ۲۱ پس موسی تومامٚ بنی‌ایسرائیلٚ پیله کسأنَ دوخوأده و اوشأنَ بوگفته: «بیشید به اندازه‌یٚ شیمی اهل و عیال گوسفندأنٚ میأن برّه‌یٚ پِسخَ اینتخاب بوکونید و سر وَوینید. ۲۲ ایتأ دسته گیاهٚ زوفا اوسأنید و تشتٚ خونٚ دورونی بزنید و اونٚ اَمرأ او خونَ شیمی خانه درٚ چارچوبٚ دو طرف و اونٚ جور وأسِنید. هیتّأ جٚه شومأن تا صُبٚ دم خو خانه جأ بیرون نشه. ۲۳ وختی خوداوند دوأرستَن دره کی مصری‌یأنَ هلاکَ کونه، خونَ شیمی خانه درٚ چارچوبٚ دو طرف و اونٚ جور دینه و او خانه جأ گوذر کونه و ونأله کی او فرشته‌یی کی هلاکَ کونه شیمی خانه دورون بأیه و شمرَ بزنه. ۲۴ شومأن و شیمی نسلأن وأ اَ فرمانَ همیشه حفظ بوکونید، ۲۵ حتی وختی فأرسه‌ییدی او سرزیمینٚ دورون کی خوداوند شمرَ قول بدَه‌بو. ۲۶ وختی شیمی زأکأن شمرَ وورسید: ‹چی وأسی اَ عیدَ بجا اَوریدی؟›، ۲۷ بیگید: ‹قوربانی‌یٚ پِسَخ ایسه خوداوندٚ رِه، کی مصرٚ دورون بنی‌ایسرائیلی‌یأنٚ خانه جأ گوذر بوکوده وختی مصری‌یأنَ هلاکَ کودن دوبو، ولی خانواده‌یأنَ نجات بده.›» بأزین بنی‌ایسرائیل سوجده بوکودیدی و خوداوندَ پرستش بوکودید. ۲۸ بنی‌ایسرائیل بوشوییدی و اونچی کی خوداوند، موسی و هارونَ فرمان بدَه‌بو، بجا بأوردیدی.
ارشدٚ پسرأنٚ مردن
۲۹ نیصفٚ شب بو کی خوداوند مصرٚ سرزیمینٚ تومامٚ ارشدٚ پسرأنَ جٚه فرعونٚ اوّلی پسر کی ولیعهد بو، تا سیاهچالٚ دورونٚ زندانیأنٚ اوّلی پسرأن و چهارپایأنٚ اوّلی نرٚ زأکأنَ هلاکَ کوده. ۳۰ او شب فرعون، اونٚ تومامٚ خدمتگوزارأن و تومامٚ مصری‌یأن خوابٚ جأ ویریشتیدی و سرتاسرٚ مصرٚ دورون پیله شیون و زاری صدا راستَ بوسته، چونکی خانه‌یی نوبو کی اویه کسی نمرده‌بی. ۳۱ هو شب فرعون، موسی و هارونَ دوخوأده و بوگفته: «ویریزید، جٚه می مردومٚ میأن بیشید! شومأن و تومامٚ بنی‌ایسرائیل بیشید، هوطو کی بوگفتیدی، خوداوندَ پرستش بوکونید ۳۲ و شیمی تومامٚ حیوانأنٚ گله‌یأنَ اوسأنید بیشید و مِره هم برکت طلب بوکونید.» ۳۳ مصری‌یأنم بنی‌ایسرائیلَ تأکید بوکودیدی کی هر چی زودتر اوشأنٚ سرزیمینٚ جأ بیشید و بوگفتیدی: «وگرنه اَمأن همه‌تأن میریمی!» ۳۴ پس بنی‌ایسرائیل خوشأنٚ نانٚ خمیرأنَ کی هنوز تورشٚ خمیر نزه‌بید اوسأدیدی، دوکودیدی پیله تیأنٚ میأن و خوشأنٚ لیباسأنٚ دورون، بخچه بوکودیدی، بوکولَ گیفتید و ببردیدی. ۳۵ بنی‌ایسرائیل هوطویی کی موسی بوگفته‌بو، مصریأنٚ جأ نقره و طلا اسبابأن و رخت و لیباس بخوأستیدی. ۳۶ خوداوند کاری بوکوده کی مصری‌یأن بنی‌ایسرائیلَ لطفٚ اَمرأ نیگاه بوکودید و هرچی کی بنی‌ایسرائیل بخوأستیدی اوشأنَ فدَه‌ییدی. پس اَطویی بنی‌ایسرائیل مصری‌یأنَ غارت بوکودیدی. ۳۷ بنی‌ایسرائیل جٚه «رَمِسیس» کوچ بوکودید بوشوییدی «سُکّوت». شیشصد هیزارتأ پیاده مردأی بید، بدونٚ اَنکی زنأکأن و زأکأن بیشمرده بیبید. ۳۸ ایتأ پیله گروه جٚه مردومأنٚ دیگر و خیلی جٚه اهلی حیوانأن و گله‌یأن اوشأنٚ اَمرأ بوشوییدی. ۳۹ اوشأن او خمیر اَمرأ کی مصرٚ جأ اوسأده‌بید نانأنی بپختیدی کی تورشٚ خمیر نأشتی. خمیرَ تورشٚ خمیر نزه‌ییدی چونکی اوشأنَ مصرٚ جأ بیرونَ کوده‌بید و وخت نأشتیدی کی خوشأن رأهٚ خوراکَ حاضرَ کونید. ۴۰ مدت زمأتی کی بنی‌ایسرائیل مصرٚ میأن زندگی بوکودیدی، چهارصد و سی سال بو. ۴۱ روزٚ آخرٚ چهارصد و سی سال بو کی تومامٚ لشکریأنٚ خوداوند، مصرٚ سرزیمینٚ جأ بیرون بموییدی. ۴۲ اَن او شبی ایسه کی وأستی خوداوندٚ رِه حفظ کودن، چره کی اوشأنَ مصرٚ جأ بیرون بأورده. بله، اَن هو شبی ایسه کی تومامٚ بنی‌ایسرائیل وأستی نسل به نسل خوداوندٚ رِه حفظ بوکونید.
عیدٚ پِسَخٚ قانونأن
۴۳ خوداوند موسی و هارونَ بوگفته: «اَن عید پِسَخٚ قانون ایسه: هیتّأ بیگانه اونٚ جأ نوأ بوخوره. ۴۴ غولامٚ زرخرید بعدٚ اَنکی ختنه ببه، تأنه اونٚ جأ بوخوره، ۴۵ ولی مهمان یا کارگرٚ روزمزد نوأستی بوخوره. ۴۶ وأستی فقط ایتأ خانه دورون بوخورده ببه؛ هی ذره اونٚ گوشتَ او خانه جأ بیرون نبرید و هیتّأ جٚه اونٚ خاشأنَ نشکنید. ۴۷ ایسرائیلٚ تومامٚ مردومأن وأستی اَ کارَ انجام بدید.
۴۸ «اگه ایتأ غریبه شیمی میأن ساکن بوبوسته و خوأیه خوداوندٚ پِسَخَ انجام بده، وأستی اوّل تومامٚ مردأکأن و پسرأنی کی اهلٚ اونٚ خانه ایسید ختنه بیبید؛ بأزین تأنیدی شیمی سرزیمینٚ مردومأنٚ مأنستن اونٚ دورون شرکت بوکونید. هیچ مردی کی ختنه بوبوسته نی‌یه نوأ اونٚ جأ بوخوره. ۴۹ همه رِه ایتأ قانون نهَه، چی شیمی سرزیمینٚ مردومأن، چی غریبه‌یأنی کی شیمی میأن زندگی کونیدی.»
۵۰ پس تومامٚ بنی‌ایسرائیل هر چی‌یَ کی خوداوند موسی و هارونَ دستور بدَه‌بو، انجام بدَه‌یید. ۵۱ و هو روزٚ دورون خوداوند بنی‌ایسرائیلَ لشکر لشکر مصرٚ سرزیمینٚ جأ بیرون بأورده.
Currently Selected:
خروج ۱۲: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media
