خروج ۱۰

۱۰

بلای ملخ

۱ خوداوند موسایَ بوگفته: «بوشو فرعونٚ ورجأ چونکی من فرعون و اونٚ خدمتگوزارأنٚ دیلَ سختَ کودم کی اَ نیشأنه‌یأنَ اوشأنٚ میأن آشکارَ کونم ۲ کی شومأن بتأنید می سختگیر‌یَ مصریأنٚ اَمرأ و نیشأنه‌یأنی کی اوشأنٚ میأن آشکارَ کودم شیمی زأکأن و نوه و نتیجه رِه وأگویا بوکونید کی شومأن بدأنید من خوداوند ایسم.» ۳ پس موسی و هارون بوشوییدی فرعونَ بوگفتیدی: «یهوه، عبرانیأنٚ خودا، بوگفته: ‹تا کِی نخوأیی می جُلُو سوجده بوکونی؟ می قومَ آزادَ کون کی بیشید مرَ عیبادت بوکونید. ۴ وأ بدأنی اگه می قومَ ونألی کی بیشید، فردا تی سرزیمینٚ دورون ملخ اوسه کونم. ۵ اوشأن زیمینٚ سر نیشینیدی جوری کی دِه زیمینَ نشأ دِئن و هرچی کی تگرٚ جأ باقی بمأنسته خوریدی و تومامٚ درختأنی کی شیمی مزرعه‌یأنٚ میأن رُشت کونیدی اوشأنٚ اَمرأ. ۶ ملخأن، تی خانه‌یأن و تی خدمتگوزارأن و تومامٚ مصریأنٚ خانه‌یأنَ پورَ کونیدی، کی شیمی پئرأن و شیمی آبا و اجدادم جٚه وختی مصرٚ سرزیمینٚ دورون زندگی بوکودید تا هسأ اَطوچی نیده‌یید.›» بأزین موسی وأگردسته و جٚه فرعونٚ ورجأ بوشو. ۷ فرعونٚ خدمتگوزارأن، اونَ بوگفتیدی: «تا کِی اَ مردأی اَمرَ اذیت بوکونه؟ اَ مردومأنَ آزادَ کون کی بیشید یهوه، خوشأنٚ خودایَ عیبادت بوکونید. مگر نیدِئن دری مصر ویرانَ بوسته؟» ۸ پس موسی و هارونَ بأوردیدی فرعونٚ ورجأ و فرعون اوشأنَ بوگفته «بیشید یهوه، شیمی خودایَ عیبادت بوکونید! ولی بوگو بیدینیم چی کسأنی خوأیید بیشید؟» ۹ موسی بوگفته: «اَمأن، اَمی جوانأن و پیرأن، و پسرأن و دُخترأن و حیوانأنٚ گله‌یأنٚ اَمرأ شیمی چره کی وأسی ایتأ عید خوداوندٚ رِه بر پا بوکونیم.» ۱۰ فرعون بوگفته: «شمرَ به خودا وأگوذار کونم، شمرَ شیمی اهل و عیالٚ اَمرأ آزادَ نوکونم کی بیشید. معلومه کی ایتأ جوفت و کلک کودَن دریدی! ۱۱ هیوخت! فقط مردأکأن بیشید خوداوندَ عیبادت بوکونید، چره کی هَنَ بخوأستیدی.» بأزین موسی و هارونَ جٚه فرعونٚ ورجأ بیرونَ کودید ۱۲ و خوداوند موسایَ بوگفته: «تی دسَ مصرٚ سرزیمینٚ سر راستَ کون کی ملخأن اَ سرزیمینَ هوجوم بأورید و تومامٚ صارا گیاهأنَ ینی هر چی تگرٚ جأ باقی بمأنسته، بوخورید.» ۱۳ پس موسی خو عصایَ مصرٚ سرزیمینٚ سر راستَ کوده و خوداوند تومامٚ او روز و تومامٚ او شب ایتأ باد شرقٚ جأ او سرزیمینٚ سر اوسه کوده. وختی هوا روشنَ بوسته، بادٚ شرقی ملخأنَ خو اَمرأ بأورده‌بو. ۱۴ ملخأن تومامٚ مصرٚ سرزیمینَ هوجوم بأوردیدی و ایتأ عالمه جٚه اوشأن او سرزیمینٚ همه جا بینیشتید کی تا او روز مصری‌یأن اَجور آفتٚ ملخَ نیده‌بید و هیکسم هیوخت دِه نیدینه. ۱۵ ملخأن تومامٚ زیمینَ سیا بوکودیدی و هر چی کی تگرٚ جأ باقی بمأنسته‌بو - ینی تومامٚ صارا گیاهأن و درختأنٚ میوه‌یأن -همه‌یَ بوخوردیدی جوری کی تومامٚ سرزیمینٚ مصرٚ میأن هی‌ذره سبزی، درختأن یا صارا گیاهأنٚ سر باقی نمأنسته. ۱۶ فرعون فوری موسی و هارونَ دوخوأده و بوگفته: «من به یهوه کی شیمی خودا ایسه و در حقٚ شومأن گوناه بوکودم. ۱۷ هسأ فقط ایوار دیگرم مرَ ببخشید و یهوه، شیمی خودا جأ خوأهش بوکونید کی اَ مرگ و میرَ می جأ دورَ کونه.»

۱۸ پس موسی بوشو بیرون و خوداوندٚ جأ خوأهش بوکوده کی ملخأنَ دورَ کونه. ۱۹ و خوداوند او بادَ وأگردأنه جوری کی غربٚ جأ خیلی شدید راستَ بوسته و ملخأنَ ببرده دوکوده دریایٚ سورخٚ میأن و دِه تومامٚ مصرٚ میأن ایتأ ملخم پیدا نوبوستی ۲۰ ولی خوداوند فرعونٚ دیلَ سختَ کوده و اون بنی‌ایسرائیلَ ونأشته کی بیشید.

بلای تاریکی

۲۱ بأزین خوداوند موسایَ بوگفته: «تی دسَ آسمانٚ طرف راستَ کون کی تاریکی تومامٚ مصرٚ سرزیمینَ بیگیره، جوری کی چوم چومَ نیدینه.» ۲۲ موسی خو دسَ آسمانٚ طرف راستَ کوده و سه روز، تومامٚ مصرٚ سرزیمین تاریکَ بوسته هَچین ظولمات. ۲۳ سه روز هیکس نتأنستی کسٚ دیگرَ بیدینه یا جٚه خو جا سر تکان بوخوره، ولی بنی‌ایسرائیلٚ جاجیگاه روشنایی بو. ۲۴ او وخت فرعون موسایَ دوخوأده و بوگفته: «بیشید خوداوندَ عیبادت بوکونید، شیمی زن و زأکأنم شیمی اَمرأ ببرید ولی شیمی گله و رمه مصرٚ دورون بِیسید.» ۲۵ ولی موسی بوگفته: «وأ وئلی اَمأن قوربانی‌یأن و سوجأنئنی هدیه‌یأنم بدأریم کی یهوه، اَمی خودا رِه تقدیم بوکونیم. ۲۶ اَمی حیوانأنم اَمی اَمرأ بریم؛ حتی ایتأ جٚه اوشأنٚ سُم نوأ اَیه بمأنه چره کی وأ یهوه، اَمی خودا عیبادتٚ وأسی اوشأنٚ جأ ایستفاده بوکونیم و تا اویه فَنرسیم نأنیم کی کویتأ حیوانَ وأ خوداوندٚ عیبادتٚ رِه قوربانی بوکونیم.» ۲۷ ولی خوداوند فرعونٚ دیلَ سختَ کوده و اوشأنَ ونأشته کی بیشید. ۲۸ فرعون موسایَ بوگفته: «می چومٚ جأ دورَ بو! تی حواس بمأنه دِه مرَ نزدیکَ نوأ بوستن! اگه می چومٚ جُلُو بأیی، ترَ کوشم.» ۲۹ موسی جواب بدَه: «هَطو کی بوگفتی، دِه مرَ نیدینی.»

Currently Selected:

خروج ۱۰: گیلکی (رشتی)

Highlight

Copy