استر ۱
۱
پادشا مهمانی‌یأن
۱ اَ پیشامدأن هو زمانی ایتفاق دکفته کی خشایارشاه، صد و بیست و هفت ولایتَ حکومت کودی، کی جٚه هندوستانٚ مرز تا جنوبٚ مصر بو ۲ و شهرٚ شوشٚ دورون خو قلعه میأنی تختٚ پادشایی سر نیشته‌بو. ۳ سومی سالٚ خو حکومت، ایتأ پیله‌دأنه مهمانی خو اَمیرأن و سردارأنٚ‌ره برپا بوکوده کی پارس و مادٚ فرمانده‌یأنٚ نظامی، نجیب زاده‌یأن و ولایتأنٚ فرماندارأن اویه ایسَه‌بید.
۴ صد و هشتاد روزٚ تومام، خشایارشاه تومامی‌یٚ خو مال و منالَ و خو شکوه و جلالٚ پادشایی‌یَ به نمایش بنَه. ۵ وختی اَ مهمانی به آخر فأرسه، پادشا هفت روزٚ دیگرم تومامٚ مردومأنٚ رِه، پیله‌دأنه و کوجه‌دأنه، کی شوشٚ دورون زندگی کودیدی، خو کاخٚ صحنٚ باغٚ میأنی ایتأ مهمانی‌یٚ دیگر بیگیفته. ۶ باغی کی حیاطٚ دورون نهَه‌بو پرده‌یأنی کتانٚ جأ دأشتی کی سیفید و لاجوردی رنگ بیدی و هو پرده‌یأن لافندٚ کتانی‌یٚ نازک و ارغوانی رنگٚ اَمرأ، دورونٚ حلقه‌یٚ کجینٚ جأ به سوتونأنٚ مرمری آویزانَ کوده‌بید. تختأنی طلا و کجین، سنگفرشأنٚ رو نهَه‌بید کی اونٚ جنس سُماک، مرمر، صدف و یشم بو. ۷ پادشا لطفٚ وأسی، مردوم تأنستید ایتأ عالمه شرابَ، ظرفأنٚ طلایی دورون کی اونٚ شکلأن جورواجور بید، بوخورید. ۸ شراب خوردن آزاد بو، چونکی پادشا خو خدمتکارأنَ دستور بده‌بو کی هر کسی‌یَ هر چقدر شراب دوس دأره اونَ فدید.
شهبانو وشتی پادشا دستورٚ جأ سرپیچی کونه
۹ هو وختم شهبانو وشتی ایتأ پیله‌دأنه مهمانی، خشایارشاه کاخٚ دورون، زنأکأنٚ دربارٚ رِه بیگیفته‌بو. ۱۰ هفتمی روزٚ مهمانی کی پادشا شراب خوردنٚ جأ سرخوش بو، خو هفت خواجه‌یَ کی اوشأنٚ نامأن مهومان، بِزتا، حربونا، بغتا، ابغتا، زاتر و کارکاس بید و خشایارشایَ خدمت کودیدی، دستور بدَه ۱۱ کی شهبانو وشتی‌یَ هَطو کی تاج اونٚ سر نهَه بأورید تا اَمیرأن و مردوم اونٚ زیبای‌یَ بیدینید، چونکی شهبانو قشنگ بو. ۱۲ ولی وشتی، پادشا دستورَ کی خواجه‌یأن اونٚ رِه بأورده‌بید، قوبیل نوکوده و نوشو. هَنٚ وأسی، پادشایَ خیلی غیظَ گیفته و اونٚ دیلٚ دورون آتش به پا بوبوسته.
۱۳ او زمان معمول بو پادشا خو حکیمأنٚ اَمرأ کی قوانین و عیدالتَ دأنستید مشورت بوکونه. هَنٚ وأسی خشایارشاه خو مشاورأنٚ اَمرأ کی دأنستیدی چی وأ کودن، گب بزه. ۱۴ هو هفت‌تأ حکیمأن، اَمیرأنٚ پارس و ماد بید کی همیشه تأنستید هر موقع کی اوشأنٚ دیل خوأستی، پادشایَ بیدینید و اوشأنٚ مقام، اَمیرأنٚ دیگرٚ جأ بوجورتر بو کی کَرشِنا، شیتار، اَدماتا، تَرشیش، مِرِس، مَرسِنا و مِموکان نام دأشتیدی. ۱۵ پادشا اوشأنَ وَورسه: «شهبانو وشتی اَمرأ، چی وأ بوکونیم؟ چونکی می دستورَ کی خواجه‌یأن اونٚ‌ره ببردیدی انجام نده. قانون، اَ کارٚ وأسی چی موجازاتی تعیین بوکوده؟»
۱۶ بأزین مموکان وأگردسته پادشا و اَمیرأنَ بوگفته: «شهبانو وشتی نه تنها پادشایَ بلکی همه‌تأنٚ اَمیرأن و مردأکأنی کی تومامی‌یٚ پادشا ولایتأنٚ دورونی زندگی کودیدی، بی ایحترامی بوکوده ۱۷ چره کی بأزین تومامی‌یٚ زنأکأن، اَ شهبانو رفتارَ ایشنَویدی و خوشأنٚ مردأکأنَ بی‌ایحترامی کونیدی و گیدی: ‹خشایارشاه دستور بدَه شهبانو وشتی‌یَ اونٚ ورجأ بأورید ولی اون نمو.› ۱۸ ایمروز اَمیرأنٚ پارس و مادٚ زنأکأن کی بیشتأوستیدی شهبانو وشتی چی بوکوده، خوشأنٚ مردأکأنٚ اَمرأ هَطویی رفتار کونیدی و اَ بی‌ایحترامی و ناراحتی پایانی نأره. ۱۹ هَنٚ وأسی، اگه پادشا قوبیل بوکونه، دستور بده کی پارس و مادٚ قوانینٚ میأن بینیویشته ببه کی شهبانو وشتی دِه حق نأره خشایارشاه ورجأ بأیه و هیکس نتأنه اَ قوانینَ باطیلَ کونه. بأزین پادشا، شهبانو مقامَ کسی‌یَ کی وشتی جأ بهتره فده. ۲۰ وختی پادشا دستور، اَ سرزیمینٚ میأن چو دکفه، تومامی‌یٚ زنأکأن خوشأنٚ مردأکأنَ - چی پولدار بیبید، چی فقیر- ایحترام کونیدی.»
۲۱ اَ گب، پادشایَ و اونٚ اَمیرأنَ خوش بمو و اون هَطو کی مموکان بوگفته‌بو، عمل بوکوده. ۲۲ پادشا اَ دستورَ نامه‌یأنٚ میأنی تومامی‌یٚ ولایتأنَ، به اوشأنٚ دستخط و اوشأنٚ قومٚ زبان اوسه کوده کی مردأکأن وأ خانه میأنی رئیس بیبید.
Currently Selected:
استر ۱: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media
