دانیال ۱۲
۱۲
آخرٚ زمأن
۱ بأزین فرشته بوگفته: «او وخت فرشته‌یٚ عظیم، میکائیل کی تی قومٚ جأ نگهدأری کونه، ویریزه. او وخت موصیبتی پیش اَیه کی، جٚه زمأنی کی قومی بوجود بمو تا او روز وجود نأشتی. هو زمأنٚ میأن تی قوم نجات یأفه، ینی هر کسی کی اونٚ نام، کیتابٚ دورون بمو. ۲ خیلی‌یأنی کی گیلٚ جیر خوفته‌ییدی خوابٚ جأ ویریزیدی، بعضی‌یأن زندگی‌یٚ اَبدی رِه و بعضی‌یأنٚ دیگر خجالت و شرمندگی‌یٚ اَبدی وأسی. ۳ حکیمأن، آسمانأنٚ نورٚ مأنستن تابیدی، و کسأنی کی مردومأنَ عیدالتٚ طرف هیدایت کونیدی تا اَبد ستاره‌یأن مأنستن بیدی.»
۴ بأزین مرَ بوگفته: «ولی تو اَی دانیال، اَ گبأنٚ طومارَ مُهر و موم و لول بوکوده تا آخرٚ زمأن بدأر. ایتأ عالمه مردوم اَ طرف او طرف شیدی تا اوشأنٚ دانایی ویشترَ به.»
۵ بأزین من دانیال، فندرستم و دو نفرٚ دیگرَ بیدم کی ایتأ اَ طرفٚ روخان و اویتأ او طرفٚ روخان ایسَه‌بید. ۶ ایتأ جٚه اوشأن، او فرشته‌یی کی لیباسی کتانٚ جأ دوکوده‌بو و بوجورتر، روخانٚ ورجأ ایسَه‌بو وأورسه: «چقدر طول کشه تا اَ عجیبٚ ایتفاقأن تومامَ به؟» ۷ او فرشته‌یی کی کتانٚ لیباس دوکوده‌بو و بوجورتر روخانٚ ورجأ ایسَه‌بو، خو دسأنَ آسمانٚ طرف درازَ کوده و اونٚ صدایَ بیشنأوستم کی اونی‌یَ کی جاودانه ایسه قسم بوخورده و بوگفته: «اَ ایتفاقأن ای‌زمان، چند زمأن و نیم زمأن#۱۲:۷ تأنیدی بابٚ ۷ آیه ۲۵ هم بیدینید ایدامه دأره. وختی کی قومٚ موقدّسٚ قودرت شکست خوره، همه‌یٚ اَ پیشامدأن تومامَ به.»
۸ من فرشته گبأنَ بیشنأوستم ولی نفهمستم اونٚ منظور چیسه. هَنٚ وأسی وأورسم: «اَی سرور، اَ چیزأنٚ آخر عاقبت چی به؟» ۹ فرشته بوگفته: «اَی دانیال، اَ گبأنٚ طومار تا آخرٚ زمأن لول بوکوده و مهر و موم به. پس بوشو و نیگران نوأ بوستن. ۱۰ آدمأنٚ زیادی پاک و تیمیز و بی‌عیب بیدی، ولی شرورٚ آدمأن هَطو شرارت کونیدی. هیتّأ جٚه اوشأن نفهمیدی ولی حکیمأن فهمیدی.
۱۱ «جٚه او وختی کی دِه هر روز قوربانی نوکونیدی و او نجستٚ بُت برپا ببه، هیزار و دویست و نود روز گوذره. ۱۲ خوشا بحالٚ کسی کی تا تومامَ بوستنٚ هیزار و سیصد و سی و پنج روز، رافا ایسه. ۱۳ ولی دانیال، تا آخر اَ رأیَ ایدامه بدن کی آرامی یأفی، و آخرٚ زمأن تی مقرر بوبوسته جاجیگاه دورون قرار گیری.»
Currently Selected:
دانیال ۱۲: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media