YouVersion Logo
Search Icon

اعمالٚ رسولأن ۲۴

۲۴
پولسٚ محاکمه، فِلیکْسٚ ورجأ
۱ پنج روز بعد، کاهنٚ اعظم کی اونٚ نام حَنانیا بو، چند نفر جٚه مشایخٚ یهود و ایتأ وکیلٚ اَمرأ کی تِرتولُس نام دأشتی، بوشوییدی قیصریه و خوشأنٚ شکایتَ ببردیدی والی ورجأ. ۲ وختی پولُسَ بأوردیدی، تِرتولُسٚ وکیل خو شکایتَ فِلیکْسٚ والی ورجأ اَطویی شروع بوکوده: «عالیجناب، خیلی وخته کی شیمی سایه جیر آسایش دأریمی و شیمی آینده‌بینی باعث بوبوسته اَ قوم پیشرفت بوکونه. ۳ اَمی وظیفه دأنیمی همه جا و همه کسٚ ورجأ شیمی جأ قدردأنی بوکونیم. ۴ خیلی شیمی وختَ نیگیریم. تقاضا دأریمی اَمرَ موحبت بوکونید و اَمی گبأنَ گوش بدید.
۵ «اَمرَ آشکارَ بوسته کی اَ مردای، آدمٚ فتنه‌یی ایسه کی تومامٚ دونیا یهودیأنٚ میأن شورش به پا کونه و ایتأ جٚه سرأنَ فرقه‌یٚ ناصری‌یم ایسه. ۶ اون سعی کونه کی معبدَ بی‌حرمت بوکونه، کی اَمأن اونَ دسگیر بوکودیم کی اَمی شریعتٚ اَمرأ اونَ محاکمه بوکونیم ۷ ولی فرمانده لیسیاس بمو و اونَ به زور جٚه اَمی دس بیرون بأورده، ۸ و اوشأنی‌یَ کی اونٚ جأ شکایت دأریدی دستور بدَه کی بأیید اَیه شیمی ورجأ. هسأ اگه شومأن خودتأن اونٚ جأ بازجویی بوکونید، شمرَ آشکارَ به کی اَمأن چره اونٚ جأ شکایت دأریمی.» ۹ یهودیأنم یکصدا بوگفتیدی: «هطویه».
پولسٚ دفاع فِلیکْسٚ ورجأ
۱۰ وختی والی پولُسَ ایشاره بوکوده کی گب بزنه، اون اَطویی جواب بده:
«دأنم سالیأنٚ درازی ایسه کی شومأن قضاوتٚ قومٚ یهودَ بر عهده دأریدی. پس شادی اَمرأ، جٚه خودم دفاع کونم. ۱۱ حقیقتٚ اَ موضوع شمرَ آشکارَ به: جٚه او روزی کی من به زیارتٚ اورشلیم بوشوم دوازده روز ویشتر نیبه. ۱۲ هیکس مرَ نیده کی معبدٚ میأن کسی اَمرأ جروبحث بوکونم، یا کنیسه‌یأنٚ میأن و یا شهرٚ میأن، مردومَ بوشورأنم. ۱۳ هَطویم اوشأن نتأنیدی هرچی کی به ضدٚ من گیدی شیمی ورجأ ثابت بوکونید. ۱۴ ولی شیمی ورجأ وأ ایعتراف بوکونم کی به تعلیمی کی ‹رأهٚ نجات› ایسه و اوشأن اونَ ‹فرقه‌یٚ تازه› نام بنَه‌ییدی، قوبیل دأرم و اَمی پئرأنٚ خودایَ عیبادت کونم و به هر اونچی کی تورات و پیغمبرأنٚ کیتابأنٚ دورون بینیویشته‌یه، ایمأن دأرم. ۱۵ منم اوشأنٚ مأنستن به خودا امید دأرم کی قیامتی عادلأن و ظالمأنٚ‌ رِه در پیشه. ۱۶ هَنٚ وأسی منم سخت تلاش کونم کی خودا و مردومٚ ورجأ ایتأ وجدانٚ پاکٚ اَمرأ زندگی بوکونم.
۱۷ «من بعدٚ سالیأنٚ دراز وأگردستم بوشوم اورشلیم کی کومکهای مالی، می قومٚ فقیرأنٚ‌ره ببرم و قوربانی‌یم خوداوندٚ رِه تقدیم بوکونم. ۱۸ آداب و رسومٚ تطهیرَ به جا اَوردن دوبوم کی مرَ معبدٚ میأن بیده‌ییدی. نه جینجال بر پا بو و نه شورشی. ۱۹ ولی اویه چند نفر یهودی کی جٚه منطقه‌یٚ آسیا بمو بید اوشأنَ بر علیه من بوشورأنه‌یید، خُب بو کی الأن اوشأنم شیمی ورجأ بِیسه بید و هر شکایتی جٚه من دأشتیدی شمرَ بوگفته بید. ۲۰ یا اَشأنٚ جأ وَوَرسید کی شورا چی خطایی می جأ بیده و به چی جُرمی مرَ محکوم کونیدی، ۲۱ به جز اَنکی اوشأنٚ میأن صدایٚ بولندٚ اَمرأ بوگفتم: ‹به زنده بوستنٚ مورده‌یأن جٚه روزٚ قیامت ایمأن دأرم و هَنٚ وأسی ایسه کی ایمروز شیمی ورجأ اَیه محاکمه بوستن درم.›»
۲۲ بأزین فِلیکْس کی جٚه تعلیمٚ مسیحیأن به خوبی آگاه بو، محاکمه‌یَ عقب تأودَه، بوگفته: «وختی فرمانده لیسیاس بأیه و اونٚ گبأنَ بیشنَوم، شیمی شکایتَ رسیدگی کونم.» ۲۳ و ایتأ جٚه خو افسرأنَ فرمان بده پولُسٚ جأ نگهبانی بوکونه، کی اگه اونٚ آشنایأن بخوأستید اونَ بیدینید و اونٚ‌ره چیزی بأورید، ایجازه بده.
۲۴ چند روز بعد، فِلیکْس خو زنأکٚ اَمرأ کی اونٚ نام دْروسیلا و یهودی هم بو، بمو. اون دستور بدَه پولُسَ بأوردید تا اونٚ گبأنَ کی جٚه ایمأن به عیسی مسیح بو، گوش بدید. ۲۵ وختی پولُس جٚه عیدالت و پرهیزگاری و روزٚ داوری گب بزه، قودرتٚ خودا کلام فِلیکْسَ هراسانَ کوده و بوگفته: «هسأ دِه تأنی بیشی ولی اگه وخت بدأشتم، بازم ترَ دوخوأنم.» ۲۶ ولی امیدوار بو کی پولُس اونَ رشوه فدَه. هَنٚ وأسی چند بار اونَ دوخوأده و اونٚ اَمرأ گب بزه.
۲۷ دو سال کی بوگوذشته، پورکیوس فِستوس، فِلیکْسٚ جانیشین بوبوسته. ولی فِلیکْس، به خأطر اَنکی یهودیأنٚ سر منّت بنه پولُسَ زندانٚ میأن بدأشته.

Highlight

Share

Copy

None

Want to have your highlights saved across all your devices? Sign up or sign in