اعمالٚ رسولأن ۱۹
۱۹
پولُس اَفِسُسٚ شهر میأن
۱ وختی کی آپولُس قُرِنتُسٚ میأن ایسَه‌بو، پولُس بعدٚ اَنکی جٚه او منطقه کویأنٚ جور دوأرسته، فأرسه اَفِسُس. اویه تازه ایماندارأنی پیدا کوده ۲ و اوشأنٚ جأ وَورسه: «وختی کی ایمأن بأوردید، روح‌القدسَ دریافت بوکودید؟»
اوشأن بوگفتیدی: «اَمأن حتی نیشنأوستیم کی روح‌القدسی‌یم وجود دأره.»
۳ اوشأنَ بوگفته: «پس تعمیدٚ چی بیگیفتیدی؟» بوگفتیدی: «یحیی تعمیدَ.»
۴ پولُس بوگفته: «یحیی تعمید، نشانه‌یٚ توبه بو، کی قومَ گفتی: ‹وأ به اونی کی بعدٚ من اَیه ایمأن بأورید› ینی به عیسی.» ۵ چون اَنَ بیشتأوستیدی، به خوداوند عیسی نام تعمید بیگیفتید ۶ و وختی کی پولُس بر اوشأن، دس بنَه، روح‌القدس بر اوشأن نازل بوبوسته و به زبانأنٚ روح‌القدس گب بزه‌ییدی و خودا پیغامَ بوگفتیدی. ۷ او مردأکأن، در حدودٚ دوازده نفر بید.
۸ بأزین پولُس اویه سه ماه شَبّاتٚ روزأن کنیسه میأن شویی، شجاعتٚ اَمرأ جٚه خودا پادشایی گب زه‌یی و همه‌تأنٚ‌ره دلیلٚ محکم اَوردی. ۹ ولی بعضیأن سرسختی کودیدی، ایمأن نأوردیدی و همه کسٚ ورجأ، جٚه «مسیحٚ رأ و روش» بد گفتیدی. پس پولُس خو یارأنَ اوسأده و جٚه اوشأنٚ ورجأ سیوأ بوکوده. همه‌تأ روز تالارٚ سخنرانی‌یٚ تیرانوسٚ دورون مردومٚ‌ره گب زه‌یی. ۱۰ دو سالٚ تومام بوگوذشته و تومامٚ یهودیأن و غیریهودیأنی کی آسیا منطقه میأن زندگی کودیدی، خوداوندٚ کلامَ بیشتأوستیدی.
۱۱ خودا پولُسَ قودرت فدَه پیله‌دأنه معجزه‌یأن انجام بده. ۱۲ مردوم دستمالأن و پیشبندأنی‌یَ اونٚ بدنَ وأسه‌ییدی و بردیدی مریضأنٚ سر نهیدی و اوشأنٚ مریضی خُب بوستی و پلیدٚ روحأن اوشأنٚ جأ بیرون شوییدی.
۱۳ پس چند نفر جٚه جادوگرأنٚ دوره‌گردٚ یهودی‌یم هَه کارَ بوکودیدی، بوشوییدی کسأنی ورجأ کی پلیدٚ روحأن دأشتیدی، خوداوند عیسی نامَ دوخوأدیدی و گفتیدی: «به نامٚ عیسایی کی پولُس به اون موعظه کونه، شمرَ بیرونَ کونیمی!» ۱۴ اوشأنی کی اَطو کودیدی، اِسکیوا هفتأ پسرأن بید. اِسکیوا ایتأ جٚه پیله کاهنأنٚ یهود بو. ۱۵ ولی پلیدٚ روح، اوشأنَ بوگفته: «عیسایَ شنأسم، پولُسم شنأسم، ولی شومأن کیسیدی؟» ۱۶ بأزین او مردای کی پلیدٚ روح دأشتی اوشأنَ جان دکفته، طوری اوشأنَ بزه کی لُخت و زخمی، او خانه جأ فرار بوکودید.
۱۷ چون تومامٚ ساکنأنی کی اَفِسُسٚ میأن زندگی کودیدی، چی یهودی و چی غیریهودی، بفهمستیدی، بترسه‌ییدی اَطویی کی بعدٚ اون عیسایٚ خوداوندٚ نامَ ایحترام نهیدی. ۱۸ خیلی جٚه اوشأنی کی ایمأن بأورده‌بید، بموییدی جُلُو، آشکارا به خوشأنٚ کارأنَ اقرار بوکودیدی ۱۹ و خیلی جٚه اوشأنی کی پیشتر جادوگری کودیدی، خوشأنٚ کیتابأنَ بأوردیدی و همه‌تأنٚ جُلُو بسوجأنه‌ییدی. وختی حیساب بوکودیدی کیتابأنٚ قیمت، پنجاه هیزار سکه‌یٚ نقره بوستی. ۲۰ اَطویی، خوداوندٚ کلام همه جا پخشَ بوستی و قوّت گیفتی.
۲۱ وختی هرچی کی پیش بمو بو به آخر برسه، پولُس جٚه روح‌القدس هیدایت بوبوسته کی جٚه رایٚ مقدونیه و اَخائیه، به اورشلیم وأگرده و بوگفته: «وختی اویه فأرسم، وأ رومٚ جأ دیداری بوکونم.» ۲۲ پس دو نفر جٚه خودشٚ همکارأن، تیموتائوس و اِراستوسَ اوسه کوده کی بیشید مقدونیه و خودش وختٚ ویشتری آسیا میأن بِیسه.
بلوا اَفِسُسٚ میأن
۲۳ هو وخت «مسیحٚ رأ و روشٚ» وأسی، پیله بلوایی بپا بوبوسته. ۲۴ شورشی کی بپا بوبوسته‌بو، باعث و بانیش اینفر بو کی دیمیتریوس نام دأشتی، کی اونٚ شغل نقره کار بو و مجسمه‌یأنٚ مختلفی جٚه الهه «آرتِمیس» چأکودی و صنعتگرأنٚ دیگرٚ اَمرأ درآمدٚ فراوانی به دس اَوردیدی. ۲۵ دیمیتریوس، اَشأن و صاحبأنٚ اَ جورٚ حرفه‌یأنَ جمَ کوده و اوشأنَ بوگفته: «اَی عزیزأن، شومأن دأنیدی کی تومامی‌یٚ اَمی سرمایه هَه صنعتی ایسه کی دأریم. ۲۶ ولی هوطو کی دینیدی و ایشنَویدی، پولُس نه فقط اَفِسُسٚ میأن، بلکی سرتاسرٚ آسیا میأن، خیلی‌یأنَ وأگردأنه و گمراه بوکوده. اون گه خودایأنی کی بشرٚ دسٚ جأ چأکوده‌بوبوسته، اونَ دِه خودا نشأ گفتن. ۲۷ پس نه فقط اَ خطر وجود دأره کی اَمی کاسبی جٚه رونق دکفه، بلکی اَمی پیله الهه آرتِمیسٚ معبدم کوچیکَ به و خو جلالَ جٚه دس دهه، اون کی آسیا و سرتاسرٚ دونیا میأن پرستش به.»
۲۸ اوشأن وختی دیمیتریوسٚ گبأنَ در موردٚ پولُس بیشتأوستیدی، اوشأنَ غیظَ گیفته و ایجگره زنان بوگفتیدی: «آرتِمیسٚ اَفِسُسیأن پیله‌دأنه ایسه!» ۲۹ تومامٚ شهرٚ میأن آشوبی بپا بوبوسته! مردوم همدیگرٚ اَمرأ میدانٚ مسابقه طرف، هوجوم ببردیدی و گایوس و آریستارخوسَ جٚه اهالی مقدونیه کی همراهأنٚ پولُس بید، فأکش فأکش خوشأنٚ اَمرأ به تماشاخانه‌یٚ شهر ببردیدی. ۳۰ پولُس خوأستی کی جمعیتٚ جُلُو ظاهیرَ به، ولی ایماندارأن اونَ ونأشتیدی ۳۱ و چند نفر جٚه مقاماتٚ ایالتٚ آسیا کی پولُسٚ دوستأن بید، اونٚ‌ره پیغام اوسه کودیدی، خوأهش بوکودید کی به میدانٚ مسابقه نشه.
۳۲ جمعیت آشفته بو. همه داد و فریاد زه‌ییدی و هر کس خوره ایچی گفتی. ویشترٚ مردومم نأنستیدی چره دورٚ هم جمَ بوستیدی. ۳۳ یهودیأن، اسکندرَ پیش تأودَه‌ییدی و بعضیأن جٚه جمعیتٚ میأن اونَ دستورأنی دَییدی. اون خو دسَ تکان بده کی مردوم ساکیتَ بید تا اوشأنٚ رِه جوابگو ببه. ۳۴ ولی وختی مردوم بفهمستیدی اسکندر هم یهودی ایسه، همه ایتأ صدا اَمرأ، نزدیک به دو ساعت فریاد زه‌ییدی: «پیله‌دأنه ایسه، اَفِسُسیأنٚ آرتِمیس!»
۳۵ آخرٚ سر، وختی شهرٚ داروغه، مردومَ ساکیتَ کوده، بوگفته: «اَی اَفِسُسٚ مردأکأن، کیسه کی ندأنه اَمی شهر، نگهبانٚ معبدٚ پیله‌دأنه آرتِمیسه و اونٚ تمثالَ کی جٚه آسمان بیجیر بمو، موحافظت کونه؟ ۳۶ پس وختی کی اَمی الهه آرتِمیس، همه کسأنٚ رِه قابلٚ قوبیل ایسه، وأ آرام بیبید و عجله اَمرأ کاری نوکونید. ۳۷ اَ مردأکأنَ کی اَیه بأوردیدی، نه جٚه اَمی معبد دوزدی بوکودیدی و نه به اَمی الهه کفر بوگفتیدی. ۳۸ پس اگه دیمیتریوس و اونٚ همکارأنٚ صنعتگر جٚه کسی شکایتی دأریدی، دادگاهٚ در بازه و قاضیأنم حاضریدی. تأنیدی خوشأنٚ شکایتَ اویه ببرید. ۳۹ ولی اگه چیزٚ دیگرَ دونبأل گردستن دریدی، اونَ وأ جلسه‌یأنٚ رسمی‌یٚ انجمنٚ شهرٚ میأن حل و فصل بوکونید، ۴۰ چونکی ترسم ایمروز، اَ ناآرامی وأسی به شورشگری متهم بیبیم. اگه هَطویی پیش بشه، هیچ دلیلی نتأنیم بأوریم به خأطرٚ اَ ایتفاق.» ۴۱ اَ گبأنَ بوگفته و مردومَ مرخصَ کوده کی بیشید.
Currently Selected:
اعمالٚ رسولأن ۱۹: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media
