San Juan 1
1
Ẽwandam Iewaata wounag pawi õor ee nʉrrarr
1Warrgar bʉ̃ʉrjã nem ompaaba nʉwe Ẽwandam sim dʉi chi Iewaajã sĩejim aajem. Ich mag chi Iewaapai ĩchab Ẽwandamau. 2Mag, ich warrgarwe Ẽwandam dʉi ãba sĩerrajim aajem. 3Ẽwandamau i dʉimuata nem thʉnʉmjã thum ompaajim anaabá. Mag amach numiim khʉʉn jua aawai bʉ̃ʉrjã irua nem wauba arr chan chukhum. 4Ichdeuta maach akhaarjã iiupi aaujem. Maagwai i gaaimuata ararag bʉʉg oo nʉmjo maadeu khaphʉ nʉm, jãga sĩerrʉ́ ich Ẽwandam chi Aaijã, mag khaphʉ apieg ich chi Iewaata thumaam khʉʉn athee õtdau paa dʉnʉmjo sĩewai. 5Mag ichdeuta ich Aai khap apieg õtdau paa dʉnʉmjo sĩewai mʉg durr ich khaibagau sĩi edau khĩejo simuajã pod i thõo auba aajem.
6Ich mag jaar ĩchab woun ãb Juan a thʉ̃r sim sĩejim aajem, Ẽwandamau jʉr autarr. 7Maguan sĩi ich ẽudee deeum woun ãb beejuuta jaau nʉrrajim aajem, mag wounta khĩchag ee õt paa dʉnʉmjo sim a jaaubaawai õor thumaam khʉʉnag mag iekta ʉkhamkhĩir. 8Ich Juan chan mag woun ichdeu beeju a jaau nʉrrarr khaba, sĩi mag õtdaujo sim beeju jaaumkhĩirpai jʉr autarr ajim anaabá. 9Magtarr aawaita chadcha mag irua jaaujerr woun i ẽudee beebajieb, Ẽwandam Iewaa. Ichdeuta ich gaaimuapai thumaam khʉʉnag Ẽwandam jãga sĩerrʉ́ a khap apiejem.
10Mag beewia mʉg durr ichdeu ompaatarr gaai sĩeichejim. Pari mʉg durr gaai jooba nʉm khʉʉnau i khaug auba, sĩi parhoobam khʉʉnpii ajierram. 11Ich durr gaai beetarrta, mag amach ee pierrumjã õrau i igbajierram. 12Pari i isegba ʉu warag i iek ʉkha nʉmua warag irigta amach peerdʉpitarr khʉʉnan ichdeujã warag Ẽwandam chaainag paapʉimajim. 13Mag i chaainkha nʉm chan sĩi mʉg eegarm khʉʉnjo chaai paarpam khõchgau khapese awia paarpa autarr khabam. Mag i chaainkha nʉmʉn, sĩi Ẽwandamau ich garmuata ich iiu aawai ich chaainkha au nʉmʉu.
14Mag, Ẽwandam Iewaata wounag pawia mʉig eegar sĩeichejim. Ichta Ẽwandam Chaai ãbpai khitʉmuata ich iiu aawai ich Aai ipierraa nem khĩir pogkhe wau nʉrrarr marau oojim. Magta i gaaimua marau khaphʉ nʉisijim, jãga Ẽwandam chi Ayaujã maach jãsene sĩerrʉ́. 15I jaauwiata mag Juan õor por choomie khararrau õrag, “Mʉ ẽudee urumta mʉ khãaijã iek theeg ʉ̃rpai simgui” aajeejim, ichta i thaabaju nawe sĩerr aawai.
16Ichta Ẽwandam Iewaa maach dʉi wajapha khitaawai maachdeu nem ig nʉmjã oo khaugbata ich mag dedee aajem. 17Ẽwandamau Moiseeg ley phãpiewai sĩi jãga wenʉrraju aai nʉ a khap amkhĩirpai phãpijim. Pari jũrr Ẽwandamau ich Iewaa Jesucristo päaiwai, ichta ich Chaai chaar aawai, warre ich gaaimuata i jãga chitʉ́ a khaphʉnaa ĩchab maach ichdeu khõsi simjã khap amkhĩirta pʉijim. 18Ãbmuajã Ẽwandam chi Aai chan bʉ̃ʉrjã ooba aajem. Pari ich chi Chaai ãbpai khitʉmjã ich Aai dʉi ãbam Ẽwandamkhanaa i dʉi ãba sĩejeewai i oo nʉm gaaimuata chi Aaijã warag maadeu khaphʉ paaukhamam, í jãga sĩerrʉ́.
Juan chi por choomie chan õrau nʉ narr khabajim
(Mt. 3:11-12; Mr. 1:7-8; Lc. 3:15-17)
19Mag Ẽwandamau pʉiju jaaujerr beeju anʉm ich ẽudee urum Juanau jaau nʉrrarr ed gaai Jerusalén phobor eemua judionaan chi porkha narr khʉʉnau phadnaan pʉijierram, Levinaan a thʉ̃ʉrjerr khʉʉn dʉi, makhʉʉnau chi Juan aar wetwia irig, “¿Pʉ khaíuma? ¿Pʉʉta nawe Ẽwandamau pʉiju a jaaujerrá?” a khap jeeumkhĩir. 20Chadcha mag wetwia ichig jeeubaimaawai Juanau amag, —Mʉ chan nawe Ẽwandamau pʉiju a jaaujerr khabamgui ajim.
21Magbaawai deeu amachdeupai, —Magan ¿pʉ khaíuma? ¿Pʉ Elías khabá? abaawai, jũrr ichdeu, —Mʉ chan Elías khabamgui ajim amag.
Magbaa deeu amachdeupai, —¿Wa pʉ warrgarwe ich Ẽwandamaucha ich i jaaumkhĩir jʉr auju a jaaujerráwa? a jeeubaawai, jũrr amag, —Ʉ̃hʉ̃, mʉ majã khabamgui ajim.
22Pari magʉmjã pʉaba, —¿Pʉ khaíuma? ajierram. Pua marag pʉch jaaubam, ¿marau khan a jaaubaimaagauma maach pʉitarr khʉʉnag? ajierram irig.
23Magbaawai Juanau amag magjim:
—Mʉʉn warrgar Ẽwandam i jaaumie Isaías khararrau jaautarrjo, ajappai õor barba aajem aar chiraajemʉugui ajim. Mʉʉn sĩi, “Maach Por beeimʉʉ sĩewai i beeju nawe pãach thãar khĩir khaugbat thãraucha khõsi i iek ʉkhaag” a jaaujemʉugui ajim.
24Pari mag khap aag irig jewaan beetarr khʉʉnjã Moiseeu phã pʉarr iek wajapcha ʉʉrkhaajerr khʉʉnau pʉitarr khʉʉn ajim, fariseonaan. Maguata amachta chi thierrnaan awia irig mag nʉrrapimaphapaim iekhau irig, 25—Pʉ iek mag warrgarwe ich Ẽwandamau pʉiju a jaaujerrjã khaba, Elíajã khaba, Ẽwandam i jaaujerrjã khabam anʉmta, magan ¿jãgwi pua õor por choo simma? ajierram irig.
26Magbaawai Juanau, —Muan sĩi dodamaupaita õor por choo chitʉmgui ajim. Pari pãach ee woun ãb sim, ichta ich Ẽwandamaucha pʉiju a jaaujerrau. Ma agtha pãrau khaugba naabahab, mamʉ i barcheewai khĩir khaug naamkhĩirta ag nawe mua õor por choo chitʉmgui ajim. 27Maata mʉ ẽudee urum. Mʉ chan sĩi i chogkha chitaagpaijã serbiiba chirʉmgui ajim, Jesús igwia.
28Mag i khap aag irig jeeuchetarr thum i iekhamarrpa dojã Jordán anʉm igaau phobordam Betania anʉm ee ajim, ich Juan khararrau õor por choo sĩerr aig.
Jesús corderojo Ẽwandamau pʉitarr
29Mag ichig jeeuchetarr khʉʉn dʉi iyʉʉ sĩerr noram Juanau oowai, mag irua amag jaau sĩerr Jesuuta i aig ur nʉrrajim. Mag ich aig urum oo athaawai ich aig narr khʉʉnag, —Pãade oobat ajim: Ẽwandamau pʉitarr ar ur khitʉm. Jãguata corderodamjo ʉdʉraa ich thõopibarmua õor thumaam khʉʉn pekau chugpaa aujugui ajim. 30Jãg igwiata norr mua pãrag, “Mʉ ẽudee ãb urumta mʉ khãaijã iek theeg ʉ̃rpainaa ichta mʉ khãyaujã warrgarwe ich mag sĩerrʉmgui” ajim Juan chi õor por choomieu. 31Mag jaaumamua, Mʉchdeujã khaugba chirajimgui ajim, iita ich Ẽwandamaucha pʉitarr. Pari ĩsin chad mua khaphʉ chirʉmgui ajim, ich khabahab maachdeu nʉ narr. Mamʉ mʉg maach israelnaanag i khap amkhĩirta muan jãg õor por choo chitʉmgui ajim.
32Maimua mag jajawagmamua, ĩchab ewag pawi ichdeu ootarr igwiajã Juan chi õor por choomieu, —Muan mʉch daúacha Ẽwandam Akhaarta duburjo khitʉmta ʉ̃gtharmua beewia Jesús gaai jupbaichemjã oojimgui ajim. 33Ag nawe chan mua khaugba chirajimgui ajim, iita warrgarwe Ẽwandamau pʉiju a jaaujerrkha sim. Mamʉ mʉg õor por choomkhĩir mʉch pʉitarrauta mʉchigcha, “Ar pʉch dakhĩraa chi Akhaar ʉ̃gtharmua beewia woun ãb sim gaai jupbaicheewai pua khaphʉ aju, mag wounauta ich Ẽwandam Akhaarcha õrag deemaju” a jaautarr aawai, 34ĩsin chadau mua i khaphʉ chirʉmgui ajim, mag mʉchig jaautarrjo beewi i gaaita jupbaichem mʉch daúacha ootarr aawai. Maguata ĩchab mua khaphʉ chirʉmgui ajim Juanau Jesús igwia, i chadchata Ẽwandam Iewaau.
Jesuu ich dʉi ogdʉba wenʉrramkhĩir nacha jʉr autarr khʉʉn
35Maimua ag noram agtha mag phobordam Betania anʉm aig mʉ chirajim, mʉch khapeen dʉi, maach maestro Juan khararrpa ãba. 36Mag maig maar nʉmta, Jesús dich nʉrrʉm oobaawai maar maestroou, —Pãade oobat: Jãata Ẽwandamau pʉitarrauwai ajim, corderodamjo ʉdʉraa ich thõopibarmua õor peerdʉ aumkhĩir pʉitarr.
37Maach jʉ̃g daar maach maestro Juanau mag iekhabarm ũrbaawai Jesús ẽudee maar wetjim. 38Mag dichmamua ewag oowai, maar ich ẽudee wetum khaug athaawai marag, —¿Pãar khanta jʉr wenʉrrʉ́ma? ajim.
Magbaawai marau jũrr irig, —Maestro, ¿pʉ jam chiraajẽ? ajim.
39Magbaawai Jesuu marag, —Magan mʉ dʉi wettarrau ajim, mʉ chiraajem aar khaugaan.
Magbaa chadcha i dʉi wetwi i sĩerr aar maar barimajim. Mamʉ ya maagwai kheeuragam las cuatrojo sĩerr aawai warag ich maig kheujim.
40Mag Juanau Jesús jaau sim ũrwia ãb agjo mʉ dʉi ẽudee matarr Andrés ajim, Simón Pedro dʉi khod ãbam. 41Mag Andrés anʉmua ich naam Simón jʉraan mawia oobaimaawai irig, —Ya ĩsin chadau maran warrgarwe Ẽwandamau Mesías pʉiju a jaaujerr dʉita oobarmgui ajim anʉm. (Mag Mesías aawai griego meúa Cristo aawaiu.)
42Maimua chadcha chi Simón ich dʉi aibeejim, maar Jesús dʉi narr aig. Mag ich aig waipierrwai Jesuu chi Simonag, —Pʉ Simón khabahab ajim, Jonás iewaa. Pari ĩsmua atag pʉ Cefas a thʉ̃rjugui ajim. (Mag Cefas aawai griegonaan meúa Pedro aawaiu. Mag Pedro a sim aig mokpor aawaiu.)
Ich dʉi wenʉrramkhĩir Jesuu Felipe dʉi Natanael phe arrtarr
43Ag noram Jesús jũrr Galilea durr maju aadejim. Mag nʉm ee Felipe dʉi oojim. Mag oobaawai irig, —Felipe, mʉ dʉi marrau ajim.
44Mag woundam Felipe anʉm phobordam Betsaida anʉm eem ajim, Andrés dʉi Pedropa ãba naajerr phobor eem. 45Maimua jũrr Felipeeu deeum woun Natanael anʉm jʉraan mawia, irig maguimajim aajem:
—Natanael, maran ya Jesús dʉita wenʉrrʉmgui ajim anʉm, ar Nazaret phobor ee woun ãb José aajem ag iewaa dʉi. Ich jãg igwiata Moisés khararrau ẽsap phã pʉarr gaaijã jãg jaaunaa, Ẽwandam i jaaumienaujã jãg jaauba aajeejieba aimajim aajem Felipeeu.
46Magbaawai chi Natanaelau Felipeeg, —Ʉ̃khabamgui ajim anʉm. ¿Khaíu pʉrʉg jaauwai mag Nazaret phobor eemuata õor chi thethemkha oberju a jaaujĩ? ajim anʉm.
Mamʉ magbaawai chi Felipeeu, —Magan oobahur ajim anʉm, khap aag.
47Magbaawai chadcha i dʉi beejim. Mag beewia ya ich aig pabaicheewai Jesuu irig —Achá khitaichem israel chaardam. Mʉg woundaman chadchata o akhaar wajaphata chirabpama ajim ichigcha.
48Jesuu ichig mag iekhabarm ũrbaawai Natanaelau irig, —¿Jãga pua mag mʉ o akhaar ajapha chirʉm khaphʉ chirʉ́? ajim.
Magbaa Jesuu irig, —Felipeeu pʉ mawag eeurrju nawe, ar pʉch dikhu gaau higo bʉ eegar sĩewai, mua pʉ oobajieb ajim.
49Magbaa Natanaelau, —Maestro, pʉʉn chadchata Ẽwandam Iewaau. Pʉch khabahab ajim, israelnaan Rey marau nʉ narr.
50Magbaa Jesuu irig, —¿Higo bʉ eegar mʉchdeu pʉch ootarr a jaaubaawaita pua mʉrʉg mag chirʉ́? Ĩsta pua ag khãyaujã nem wajapcharam oogpabahab ajim.
51Maimua ich Jesuupai ĩchab maach thum ich dʉi khapeerkha aumarr khʉʉnag, —Mua pãrag jaaukhimgui ajim: Cha iekha chirʉm iekhau chadcha mʉch chi Emkhooi Iewaa aigta Ẽwandam chognaan ʉ̃gtharmua eegjã beenaa deeu ʉ̃gthaa waaidʉtkhakhakham oojugui ajim.
Currently Selected:
San Juan 1: noaA
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.