San Juan 4
4
Jesús Samariapie ʉʉi dʉi iyʉʉ arr
1Mag Juan chi õor por choomie dakha maach Por Jesujã sĩerr aawai fariseonaanau khaug athajierram, Juan aar maju khãai ʉ̃rcha Jesús ẽudeeta õor pos aadephʉm. Mag nʉm dʉi ĩchab khaug athajierram, Juan aram khãyaujã ʉ̃rcha Jesuugta õrau amach por choopi nʉm. 2Mamʉ wajapcharan ich Jesuujã chooba, maach i dʉi wenʉrraajerr khʉʉnauta õran por choojeejim. 3Mag, fariseonaanau Jesús aarta ʉ̃rcha õor poposkham khaphʉ aphobaadem ich Jesuujã khaug athaawai Judea durrmua jũrr ichta warag Galileaag petajim. Magbaawai maar i dʉi wetjim.
4Mag wetumua ichiita Samaria durr dichab khaba dichju ajim. 5Mag wetmaa awia ich Samaria durrpai phobordam Sicar a thʉ̃r sĩerr aig maar barjim, jooi Jacob khararrau jẽb per auwia ich meebaadeewai ich iewaa José aajerrag werpʉatarr dakha. 6Mag jẽb ich chaairag werpʉatarr gaai posjã sĩejim, ich jooi Jacob khararrau khorpitarr pos. Mag wenʉrrʉmua ich Jesús ya khajeeu sĩerr aawai mag pos aar mawia ag i dakha jupimajim. Maagwai ya edausĩe paimʉʉ sĩejim. 7-8Mag nʉm ee maar phobor ee wetjim, maach athee khoju per awaan. Mag maar ereubaadeewai Jesús ich appai oo chirʉm eeta, i iek Samariapie ʉʉi ãb mag pos eem do joyaan beejim aajem. Mag ich aig pierrwaita irua, —Mʉrʉg bʉchkhun dodam doog joi deebá a chirajim aajem irig.
9Mamʉ judionaan Samariapien dʉi dau parii iyʉʉ aba aajerr aawai, mag ichig do jeeubaawai chi ʉʉirau irig magjim aajem:
—Pãar judionaan chan maar Samariapien dʉi iekhajã mapha aajem khʉʉnta, ¿khanthee pua mʉrʉg do jeeu sĩwi? ajim anʉm.
10Magbaawai jũrr Jesuu irig, —Ẽwandamau pʉch athee nem deeg wai sim khaphʉnaa khaíuta pʉchig do jeeu simjã khaphʉ akhiin, pʉch garmuata pua mʉrʉg do jeeukhamgui ajim anʉm. Magbaawai mua pʉrʉg õor iiupiejem doota deekhamgui ajim anʉm.
11Ichig magbaawai jũrr chi ʉʉi garmua, —Señor, pari pua chi joi aujujã chukhu sim, mʉg pos jã naug sim eem pua pod joi aubamgui ajim anʉm. ¿Jamaam do mag maach iiupiejem anʉm mʉrʉg deeg agá? 12¿Jam pua mʉiguim khãaijã do wajapcharam bawaag agá? ajim anaabá. Nachgarwe maar jooi Jacob khararrauta mʉg pos marag werpʉajim. Ag eem ichdeujã dowia, i chaainaujã dowia, i nemchaainaujã dojierram. Magtarrta, ¿pua ag khãyaujã wajapcharam do ig chirʉ́? ajim anʉm. ¿Wa pʉʉta i khãaijã ʉ̃rpai chirʉ́wa ajim aajem, mʉg khãai do wajapcharam bawaag?
13Magbaawaita Jesuu irig magjim aajem:
—Cha mʉ iekha chirʉm iekhau, mʉg pos eem do do nʉm khʉʉnan thum ichiita deeu obisi aphobaadeewai ũwaai do dom khõsi ajugui ajim anʉm. 14Pari mua dee chirʉm do khĩirta do nʉm khʉʉn chan bʉ̃ʉrjã obichag chukhu ich mag wenʉrraju. Mag amachdeu dobarmpaita am mor ee ich mag khumdʉ ober sĩsimjo sĩejugui ajim aajem, ich mag Ẽwandam denkha nʉisieg.
15Magbaawai jũrr chi ʉʉi garmua, —Señor, magan mag do khĩir mʉrʉg deebá ajim anʉm, tag obichag khaugba aadeewai mʉg pos eem dojã joyaan beeba aag.
16Magbaawaita Jesuu, —Magan pʉch jaai athamí a ajim anʉm irig.
17Magbaa chi ʉʉirau, —Mʉ chan jaai chukhu ʉmgui ajim anʉm.
Mag jaai chukhu ʉm abaawai Jesuu irig, —Pʉchigan pʉ jaai chukhu ʉabma ajim anaabá. 18Pʉ jaai aum cinco auwia sim. Maimua cha pʉchdeu wai simjã, magan jã chan pʉ jaai khabahabma. Pʉʉn chadcha wajapha khĩirjunaata iekha ʉmgui ajim aajem.
19Mag ich obeerbapʉim ũrbaawaita irig, —Mua oowai pʉjã dau bʉ̃ʉmjota simgui ajim anʉm, mʉ mag ʉrrʉm khap aag. 20Maimua ichdeupai, Maar jooin Samariapienaun mʉg Gerasim durr gaaita Ẽwandamag jeeujeejimgui ajim aajem chi durrsĩig jua ʉanaa. Pari pãar judionaan iek mag ãba Jerusalenam Aai i jeeujem degpaita Ẽwandamag jeeuju aai nʉm aajem. Pua oowai, ¿jamta chadcha irig jeeuju aai nʉwi? a jeeujim aajem irig.
21Magbaawai Jesuu irig, —Pʉde mʉ iek ũrbarí ajim anʉm: Ya mʉg atag paawai pãrau khĩirjubaju, mʉg durrsĩ gaaita Ẽwandamag jeeuju wa Jerusalén mawiata Ẽwandamag jeeuju. Magbarm aigmua parhooba pãach nʉm aigmua irig jeeuju aai aphobaadejugui ajim anʉm. 22Pãar Samariapienau chan Ẽwandamag jeeu nʉm anʉmjã wajap i khaugba nʉmta irig jeeujem. Pari maar judionaanaun chadau, maach meeun eem ãb oberbarm gaaimuata Ẽwandamau õor peerdʉtkhaju khaphʉ naawai, irigta jeeujemgui ajim aajem. 23Pari ĩs irig jeeu chaar jeeu nʉm khʉʉnaun mʉg atag paawai warag Ẽwandam Akharau khõsi simjo jeeujugui ajim anʉm, ya amau Ẽwandam jãga sĩerrʉ́ a khaphʉ naawai. Ichig mag jeeu nʉm khʉʉnta ich Ẽwandamaujã iigjemgui ajim aajem. 24Ẽwandam chan maachjo mʉg mor chukhu sim, Akhaar aawai. Maguata ʉkhaa chaar ʉkha nʉmuata ich Ẽwandam Akharau khõsi simjota irig jeeuju aai naabahab a chirajim aajem chi ʉʉirag.
25Magbaawai jũrr chi ʉʉirau irig, —Ʉ̃ʉjʉ̃, mua khaphʉ ʉmgui ajim anʉm, Cristo anʉm beeju, warrgarwe ich Ẽwandamau pʉiju a jaaujerr. Mag ich pierrum edta ichdeucha thumaa wajapha jaauchejugui ajim anʉm, jãga sĩerrʉ́ Ẽwandam.
26Magbaawai, —Mʉʉta ag Cristo warrgarwe ich Ẽwandamau pʉiju a jaaujerr khabahab; ich ag wounta ĩs pʉ dʉi iyʉʉ chirabahab ajim anʉm Jesuu, warre ich jaauwia.
27Am mag iyʉʉ nʉm eeta maar bardʉtkhachejim. Maimua mag Samariapie ʉʉi dʉita iyʉʉ nʉm oobaicheewai chadcha maar dauderraa naajim. Pari magʉmjã ãbmuajã irig, “¿Pʉ khanta irig jeeu sĩ, wa khan ata pãar iyʉʉ naajĩjã?” abajim.
28Mag Jesuu ichig, “Mʉʉta Ẽwandamau pʉiju a jaaujerr khabahab” abaawai, ich dothũr werpʉawia phoborog khaphigbaadejim. Mag mawia barwia õrag, 29—Mau mʉ daupierr oobahuthʉ̃ ajim anʉm, pos aar woun ãb simua, mua ichigjã jaauba arrta, mua nem waaujem thumaa khaphʉ mʉrʉg jaaubarm. Mua khĩirjuawai, jãata warrgarwe Ẽwandamau pʉiju a jaaujerrjoo simgui aimajim aajem.
30Mag chi ʉʉirau amach aar jaaubaimaawai chadcha phobor eem khʉʉnaujã Jesús oon wetju aphobaadejim aajem. 31Pari mag chi ʉʉi phobor ee nʉrrʉmich, ya maar deeu i aig paaukhachewi narr aawai marau irig, —Maestro, thachdam kho athá aajeejim.
Pari mag ichig thach khopi jaaubaawai jũrr, 32—Mʉ thach khoju wai chirabahab, pari mag thach khĩir pãrau khaugba nʉmgui ajim ichdeu.
33Warag maachig magbaawai jũrr, —¿Wa ãbmua i athee thach khomkhĩir deethurtarr aawaita mag sĩwa? aajeejim marau.
34Pari maar mag iekha nʉm ũrbaawai Jesuu marag, —Mua mag thach khoju wai chirʉm a chirʉmʉn, Ẽwandamauta mʉ pʉitarr aawai irua khõsi simjota nem wau chirʉmʉugui ajim, mʉchig phidag jaaupʉitarr thumaa opʉyaag. 35Pãrau nemjĩir phierraag agtha ed jayap waaur nʉm aajeebma. Pari mua jũrr pãrag, pãach bigaau õor pom trigo phur wejomjo thʉnʉmta oobat a chirʉm. Jãg trigo phur wejom apuraa eeujemjo, jãkhʉʉnagta Ẽwandam iek jaaubat a chirʉmgui ajim, amag ʉkhamkhĩir. 36Õor jãg thʉnʉmʉg Ẽwandam iek jaau nʉmta nemjĩir phierr nʉmjo phidkha nʉm khʉʉnag chan Ẽwandamau phagab khaba phagjugui ajim. Mag amau i athee õor gan aumam khʉʉnan ich mag i dʉi wenʉrraagau. Ya mag nʉisim aig chi nacha i iek jaautarrjã onee awia ẽudee jaaumamua ʉkhapi atham khʉʉnjã chi nacha jaautarr dʉi ãba onee ajugui ajim. 37Ar õrau, “Chi nemjĩir jĩir simuan sĩi jĩirmam, pari khar chan pod ichdeupai eeuba aajem” aawain chadcharauwai ajim. 38Iin chadcha deeum khʉʉnauta nacha chi phidagan eudʉ aujierram; pari magtarrta jũrr pãachta am phidag gaaimua wajapcha aju. Pãach chi bʉ̃ʉrjã phithurg auba narrta nemjĩir phierramkhĩirjota mua pãar pʉi chirʉm a jaaumajim marag, maachdeu ich iek jaau wenʉrrʉmua õrag ʉkhapi aumaju igwia.
39Mag chadcha ʉʉi do joyaan khitawia, “Jesuu bʉ̃ʉrjã ichig jaaubamta mua nem waaujem thumaa khaug athajim” a jaaubaimaawai, mag Samaria durr phobordam sĩerr ee õor khapankham khʉʉnauta i iek ʉkha nʉm iekhau, “Magan chadcha ich Ẽwandamaucha pʉiju aajerrau” awia chi Jesús oon beejierram. 40Maimua chadcha mag beewi chi Jesús aig barchejierram, chi phobor eemua beetarr khʉʉn. Mag i aig paaukhachewia irig, —Mʉig maar aig khãibaje ajierram.
Ichig magbaawai chadcha thʉbawia khãai numí sĩejim am phobor ee. 41Mag khãai numiim ee ichdeucha jaau sim ũrwia, warag khapanaacharam khʉʉnauta i iek ʉkhajierram. 42Mag amachdeucha Jesuu jaau sim ũrwia ʉkhatarr khʉʉnau chi ʉʉirag, —Ya ĩs chan sĩi pua jaau sim ũrwiapai khaba, maach jʉ̃gʉucha i iek ũrwiata marau ʉkha nʉmgui aajeejim. Ya chadcha marau khaphʉ nʉm, jãguata chadcha durrpierr ich iek ʉkha nʉm khʉʉn thum peerdʉ auju khabahab aajeejim jũrram khʉʉnau.
Chaai podba kherarr warpmua Jesuu monaaupʉitarr
43-44Jesús mag Jerusalenmua mawi, Samaria phobordam ee khãai numí sĩeimawi, warag ich maa arrag petajim, Galileaag. Mamʉ mag phiesta dichtarr khur Jerusalén thʉbaba arran, ag na ichdeu iekhatarrjo, chi Ẽwandam iek jaaujem khʉʉn chan ãbjã amach durr ee ãba naajem khʉʉnaupaijã kha khõchkhaba aajeewai ajim. Magta ich thaabatarr durrmua warag Galileaag petajim, ich bãautarr durr. 45Mag maa awia Galilea durr barbaimaawai, mamaam khʉʉnau ʉu i wajapha amach ee barpijierram, i dʉi ãba Jerusalén phiesta Pascua anʉm ee naawai irua nem wautarrjã thum amach daúa oo narr aawai.
46Mag Galilea durr paimawia deeu Canaag majim, ag na ichdeu do atarrta vinoog paatarr phoborog. Maagwai ĩchab Capernaum phobor ee sĩejim woun ãb rey dʉi phidkhaajem, chi thethem. Mag den chaai mor mas sĩejim aajem. 47Mag chi thethemua Jesús Judeamua beewia jũrr Galilea barbaichem a ũrbaawai i aar mawia irig chaigpamamua, —Mʉ chaai ya podba kherʉmta oo pʉajim; mʉ ap chitʉm mʉ di aar marrau aichejim, mʉ chaai monaaupäain.
48Pari magbaawai Jesuu irig, —Pãrau chan pãach daúacha ag na õrau nem ooba aajem wau nʉm oobam aigjã Ẽwandam jua theeg mʉ gaai sim ʉkhaba sĩerrjeemgui ajim.
49Pari magbaawai chi thethem garmua warag irig, —Señor, mʉ ap chitʉm jopai mʉ chaai oomierrau, meeju nawe. Ya parba kherʉmta mua oo pʉabajieb ajim.
50Magbaa, —Oob atcha khĩirjum, pʉ chaaidam nauwe monaaubajup ajim Jesuu.
Ichig magbaawai ich chaai meejujã khĩirjuba, Jesuu ich chaai monaaupʉijuuta ãba khĩirjumamua ich diig petajim. 51Mag ich diig mam ee i chognaan i khĩirphee beewia i dʉi oobaicheewai irig, —Pʉ chaaidam monakha kherʉm ajierram anaabá.
52Magbaa ichdeu amag jeeujim aajem, khan ora chaai deeu khĩirdam inaa aadejĩ. Mag amachig jeeubaawai, —Norr kheeurag la una naawia warre khʉʉumie meeuba khersijimgui ajierram aajem.
53Magbaawai chi ayau ich odegpai, “Magan mag orata Jesuu mʉrʉg ‘Oob atcha khĩirjum, pʉ chaai monaaubajup’ a iekhajiebma” ajim aajem. Mag ich chaaidam monaaubapʉim oobaawai ichdeujã ʉkhanaa i deg dʉi ãba naajerr khʉʉnaujã thum chadcha Jesuuta Ẽwandam Iewaa warrgarwe ichdeu pʉiju aajerrau awia i iek ʉkha nʉisijim aajem. 54Mag chaai parba kherʉm warppaimua monaaupʉitarrta Judeamua beewi Jesuu Galilea durr biek numiim õor dakhĩir ag na amau mag ooba aajem wautarr ajim, mag chaai monaautarr gaaimua ichta Ẽwandamau pʉitarr a õrag khap amkhĩir.
Currently Selected:
San Juan 4: noaA
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.