San Juan 20
20
Jesús deeu phiidʉtarr
(Mt. 28:1-10; Mr. 16:1-8; Lc. 24:1-12)
1Maimua mag jua ʉ̃i kheutarr noram, domighed edpherre agtha phãphãrk khitwe, María Magdalenaau i aukhertarr aar oon majim aajem. Mag mawia irua ooimaawai, chi jẽbdi i ee mokpor pom joothʉ sĩerr chawag pʉreupʉi thʉnʉm ooimajim aajem. 2I iek magbaawaita maach numpai Simón Pedro dʉi narr aar khaphig beejim aajem. Mag eerpamjo beewia, —Maach Por aukhertarr ee ooimaawaijã ag ee chukkhu thʉnʉm. ¿Õrau jamagta athaaderram khai? aichejim marag.
3Magbaawai ich ag bʉrre marau aar oon wetjim. 4Warran maar ãba khaphig phobaadejim. Pari mua Pedro pʉawia mʉchta i na chi jẽbdi aar barimajim. 5Mag barwia, mua ag ee ober oowai, sĩi chi pʉreu sĩerr put appai mua ooimajim; pari aarcha chan mʉ dubbajim. 6Mag mʉ bartarr khurta Pedrojã barwia ichin chad warre ierrcha dubjim. Iruajã ĩchab mag i gaai pʉreutarr put oowia 7ĩchab chi binaandam por begpʉitarr putjã oojim. Pari mag i por begpʉitarr put tagam sĩi mor gaai pʉreupʉitarr dʉi ãba khaba, khĩetta wajapha juurnaa pʉʉr kherajim. 8Mag Pedro dubbaadem oobaawaita mʉjã dʉi dubjim. Mʉchta i na barimatarrta jũrr i ẽudeeta dubwi mag i aukhertarr ee khãidu parii simjã mʉch daúacha oobaawaita, “Chadcha Jesuun sĩita phiidʉwia petamgui” a chirajim, mʉch odegpai. 9Pari maagwaiwe chan Ẽwandam iek phã sim gaai deeu i phiidʉju a jaau sĩsidʉmjã marau agtha bʉ̃ʉrjã khaugba, mag i phiidʉjujã khĩirjuba naajim. Maimua ya maach daúacha mag ich aukhertarr ee chukhu oobaawaita mag i phiidʉbarmjã khaphʉ aphobaadejim. 10Ya maach daúacha mag i aukhertarr ee ooba abaawai deeu maar maach diig wetjim.
Jesuu María Magdalenaag ich oopitarr
(Mr. 16:9-11)
11Pari mag maar ereubaademjã, ich María chan maba, daaugajãr jẽbdi i aig icharaucha bĩe sĩsijim. I iek mag i bĩep jẽbʉ ʉmuata irua eeg bʉchnaa ierrag ober oo nʉʉ abaawai 12Ẽwandam chognaan khajũa bäpphä sĩsidʉmta ohoohdo naajim aajem, jũrr chi Jesús aukhertarr khãidu ee: dau ãb i bʉ sĩerr gar, maimua dau ãb i por sĩerr gar. 13Mag amachig ober oo nʉʉ abaawaita mam ierrmua irig, —¿Pʉ khantheeta bĩe ʉma? ajierram aajem.
Magbaawai irua, —Maar Por Jesús mʉg ee wai narr chukkhu thʉnaawaita bĩe ʉm. Khaugbam jamagta athaaderram khai a ʉajim aajem jũrr amag.
14I iek irua mag iekhapʉinaa ewag oobaawai Jesuuta i eugar oo dʉnaajim aajem. Pari mag i oo atham bʉrre chan pod i khaug auba, sĩi deeum khʉʉnpiita ʉajim aajem. 15Mag ichig oo nʉʉ abaawaita ich Jesús garmua irig, —¿Khanthee bĩe ʉma? ¿Pʉ khaita jʉr ʉrrʉ́? ajim anʉm.
Ichig magbaawai sĩi chi nemjĩirdo thʉajempii awia chi Mariaau irigta, —Pʉchdeuta arrtarr khai, mʉrʉg jaaubá, mua i awaan maag. ¿Jampaita pua i deethurjĩ? ajim anʉm.
16Magbaawai Jesuu ich thʉ̃r gaaichata irig, —María ajim anʉm.
Mag ich thʉ̃rcha ich thʉ̃rbaawaita wajapcha deeu ewag phʉʉrbanaa irig ich meúata, “Raboni, pʉchpama” awia, khaug athaawai onegau i gaai pʉrjopbaimajim aajem. Mag Raboni aawai maar judionaan meúa Maestro aawaiu.
17Mag ich gaai pʉrjopbaimaawaita Jesuu irig, —Oob mʉ gaai pʉrm; agtha mʉ mʉch Aai aar maba chirabahab ajim anʉm.
Magnaa jũrr maar ich dʉi wenʉrraajerr khʉʉn igwiata, —Mawia, jũrr mʉ khodnaanag jaaubaimá ajim anʉm, “mʉ mʉch Aai dʉi ãba chiraimaag i aar mam; ich mag Ẽwandampai ĩchab pãar Aai anaa pãar Ẽwandamaugui” a jaaubaimá amag ajim aajem.
18Ichig magtarr aawai chadcha maar aig beewi, ich daúacha Jesús ootarrjã jaauchejim. Mag jaaumamua, —Mʉchigcha iekhatarrjã ich agjoota pãrag jaau ʉmgui ajim ich María Magdalenaaucha marag.
Jesuu ich bʉ dʉii aajerr khʉʉnagcha ich oopitarr
(Mt. 28:16-20; Mr. 16:14-18; Lc. 24:36-49)
19Ich ag edpai ya edau kheubaadem ee, maar ich Jesús dʉicha wenʉrraajerr khʉʉn ãbam aig ãba biirdʉ naajim. Pari mag biirdʉ nʉmjã judionaan chi thethemnaan okgau puertdi phãarkha wai naajim. Mag nʉm eeta, dubbaichemjã ooba arrta, degolp ich Jesuuta maar jãrr dʉnʉʉubaichewia, —¿Jãgpai nʉ keena? Oob jãphierrmiet; mʉ khabahab aichejim.
20Magnaa chadcha marag ich jua oopinaa ich ãi ee thutkhereu sutarrjã oopibaawai maar onee aphobaadejim, deeu maach daúacha maach Por oobaawai. 21Magnaa deeu ichdeupai marag, —Keena, oob jãphierrmiet. Ich jãg mʉ Ayau mʉch pʉitarrjo, muajã õor ee pãar pʉi chirʉmgui ajim, ich ag iekpai mʉchdeu jaaujerrjo amag jaaumkhĩir.
22Magnaa “Ẽwandam Akhaar athat” anaa maar ohoodo nʉmʉg phuasirjim. Mag phuasirbarmua Ẽwandam Akhaar marag deebarm ajim. 23Magnaa marag magjim:
—Ar amach khaibag isegwi mʉ iek ʉkha nʉm khʉʉnag, “Chadcha pãar pekau Ẽwandamau chugpaabapʉim” abat. Pari Ẽwandam iek ʉkhaba nʉm khʉʉnagan jũrr, “Agtha pãar pekau chan chugpaaba simgui” abat ajim, õor dʉi magamkhĩirta pãrag Ẽwandam Akhaar dee chiraawai.
Jesuu Tomaag ich oopitarr
24Mag Jesuu marag ich oopiewai maar khapeer Tomás am den irig Meís aajerr maar aig khaba sĩejim. 25Mag aig khaba sĩerr aawai ag khur marau irig maachdeucha maach Por ootarr jaau naajim. Pari magbaawai ich Tomaau ʉkhamaaugau warag, —Mua mʉch daúacha oobam aigjã ʉkhabamgui ajim. Mua ʉkhajuun, i jua ee clabou meerphetarrjã mʉch daúacha oonaa, ag ee mʉch juaucha jʉrkha jʉrkhanaa, i ãi thutkhereu sutarr eejã mʉch juaucha jʉrkha oobaawain chadau ʉkhajugui ajim.
26Maimua magtarr khur seman ãb dichwia ẽudeem domighed deeu maar ich ag degcha ãba podpa naajim. Mag ed paawai ich Tomás maar dʉi aig sĩejim. Mag edjã napemjo puertdi phãarkha wai naajim. Pari mag sĩerrta, deeu ũwaai chukhu sĩerr eemuata degolp Jesús maar jãrr dʉnʉʉuchewia, —¿Jãgpai nʉ keena? aichejim.
27Mag iekhachewia, Tomaag eerpanaa, i thʉ̃rcha thʉ̃rnaa, —Pʉde mʉ jua ee clab meerphetarr oobá; ag eecha juau jʉrkha oobahur ajim. Magnaa mʉ ãi thutkhereu sutarr eejã agjo jʉrkha oobá ajim. Magnaa, Jãgbaawai khaita ʉkhaju. Oob tag ʉkhabam a chitamgui ajim irig.
28Magbaawaita Tomaau ichigcha, —Señor, pʉʉta mʉ Por anaa mʉ Ẽwandamaugui ajim.
29Magbaa Jesuu irig, —Pʉch daúacha mʉ phiidʉbarm oobaawai ĩsta pua ʉkha chirabma ajim. Ar amach daúacha mʉ ooba nʉmta pari sĩi jaaubarm ũrwiapai ʉkha nʉm khʉʉnta Ẽwandamau ʉucha wai sĩejugui ajim.
Khan jãgamkhĩirta mʉg ẽsap phãjĩ
30Mag tag Jesuu nem khĩir pogkhe õrau ooba, ni waujã wauba aajem pooma waaujeejim maar dakhĩir, chadcha Ẽwandamauta ich pʉitarr õrag khap amkhĩir. Pari magtarrta mua mʉg ẽsap gaai thumjã phãba, ãaurpaita phãjim. 31Pari mʉg thum mag mʉg ẽsap gaai jaau chirʉmʉn, jãan chadcha Jesuun Ẽwandamau ich Iewaa ichdeucha jʉr auwia warrgarwe pʉiju a jaaujerrjo pʉitarrta pãrag khap amkhĩrau; mag khaphʉnaa i iek ʉkha phobaadeewai mʉg atag pawiajã i dʉi ãba ich mag khapeerkha nʉm gaaimua iiu wenʉrramkhĩir.
Currently Selected:
San Juan 20: noaA
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.