San Juan 19
19
1Mamag nʉʉ paawai, Pilatoou warag Jesús pʉrnaa wʉpi jaaujim. 2Magbaawai soldaaunau chadcha wʉnaa miu denta porsir khaphobaadejim. Mag khanaa, i por gaai jũapinaa, ĩchab khajũa phurii khĩir phʉphʉisi simjã jũapipʉijierram. 3Magnaa i aigcha beenaa, “¿Jãgpai chirʉ́ judionaan Rey?” aajeejim. Magnaa jũrram khʉʉnau i khĩidadchajã juajãau deemaajeejim.
4Chi soldaaunau mamagkham ee, chi Pilatoou deeu dawag oberchenaa chi judionaan pom pos thʉnʉmʉg, —Pãade oobat: Cha mua i dawag waipierrum, mua oowai mʉg woun bʉ̃ʉrjã kulp chukhu simgui ajim.
5Mag chadcha Jesús dawag obercheewai miu den werjũchkha simta porsirkha jũanaa khajũajã khĩir phurii phʉphʉisimjo wajappha simta jũa oberchejim. Mag dawag waibeenaa amag, —Cha sim pãar õor ig narr ajim chi Pilatoou.
6Mag amach dakhĩir daaugajãr dʉnʉʉubaichem oobaawai chi phadnaan pornaanau guardianaan Aai i jeeujem di thʉajerr khʉʉn dʉimua ũwaai sereu phobaadewi warre pa gaaita meerphepi jajaau aajeejim. Magbaawai chi Pilatoou amag, —Í chadcha khaigba khaba sĩewai mua chan i dichbamgui ajim. Warrwia pãachdeuta pãachdeu jaau nʉmjo pa gaai i meerphepʉijurauma ajim.
7Magbaawai chi judionaanau jũrr irig, —Ichdeucha jaauwaijã iita Ẽwandam Iewaa anaawai ichiita thõopʉiju aai simgui ajierram, maar ley gaai jaauwai mʉg maach agdaujopai nʉmta mag iekha simʉn thõopʉiju aai nʉm a jaau sĩewai.
8Pari chi judionaanau mag iekhabarm ũrwia warag Pilato jãphierrbaadejim. 9Mag jãphierr thʉnʉmua deeu ich dʉi wai dubwi chi Jesuugta, —¿Pʉ jamaam agá? ajim anʉm.
Pari ichig mag jeeubarmjã Jesuu bʉ̃ʉrjã i iek jʉ̃ʉ abajim aajem. 10Mag ich iek ʉkhaba abaawai chi Pilatoou irig, —Pʉrʉg khabá mʉ iekha chirʉmgui ajim anʉm. ¿Wa pua khaugba sĩwa ajim anʉm, mʉʉta iek theeg chirʉm? Muata pʉ sĩi khajapha pʉapʉipi jaauju aai chirʉm; wa magbam khai mʉchdeuta pa gaaijã warag pʉ meerphepiju akhiinjã jaauju aai chirʉmgui ajim anʉm, mʉchta mag nem jawaagjã iek theeg chiraawai.
11Magbaawaita jũrr ich Jesús garmua irig, —Ich Ẽwandamauta jãg pʉ iek theeg apiba arr amuan, ĩs pʉ bʉ̃ʉrjã mʉ dʉi iek theeg chukhu chirakhamgui ajim anʉm. Mag pʉchta chi thierr awia mʉ dʉi mag chirʉm gaaimua, pʉchjã dʉi kulp wai chirʉmgui ajim anʉm. Pari ar pʉrʉg mʉ dʉi mʉgamkhĩir õor khaigbamjo mʉ mʉig pʉr waiberr khʉʉnta pʉ khãaijã ʉ̃rʉʉcha kulp paraa nʉmgui ajim anʉm, amachdeu khaphʉ nʉmta mʉ dʉi jãg naawai.
12Jesuu ichig magbaawai chará Pilatoou Jesús chig aba sĩi mapiju ẽkhaajeejim. Pari mag nʉm ee warag chi judionaanaujã khapanaam khʉʉnauta irig, —Puata jãg woun sĩi khajapha pʉimʉn, pʉ chan magan tag emperador khapeer khabamgui ajierram. Ar ichdeupai iita reiu a simʉn, magan jũrr emperador dʉi iekkhõr aum khõchgauta mag simgui a serereu aajeejim irig.
13Mag serereukham ũrwia, Pilatoou Jesús dawag warrpi jaaujim. Magwia, dʉi ichpa oberchewia sie gaai oo sĩsijim, warre thumaam khʉʉn dakhĩir jawaag. Mag i oo sĩerr aig “Empedrado” a thʉ̃ʉrjem, mokdaúa joothʉthʉʉd wau sĩerr aawai; ich mapai hebreonaan meúa Gabata a thʉ̃ʉrjeejim. 14Amau i dʉi mamagkham ed ya nemkhoju noram ajim, edausĩe. Ich mag ora Pilatoou sĩi chi Jesús pʉapʉim khõsim iekhau chi judionaanag, —Ar sim pãar Rey ajim.
15Mag amachig, “Ar sim pãar Rey” abaawai chará, warag sereu phobaademua pa gaaita meerphenaa thõopita jajaau aajeejim. Magbaawai ich Pilatoou amag, —¿Magan mua pãar Reita pa gaai meerphebaadejupá? ajim.
Magbaawai amachdeu jũrr, —Maar tag rey chukhu nʉm. Maar rein, ãba emperador appaita maar reiugui ajierram.
16Magta chadcha warag Pilatoou am ipierr Jesús pa gaai meerphe thõomkhĩir jaaujim. Mag jaaubaawai amach dʉi athaadejierram.
Jesús pakuls gaai meerphetarr
(Mt. 27:32-44; Mr. 15:21-32; Lc. 23:26-43)
17Mag i athaadewi soldaaunau irig ag gaai ich meerphe jiirjopju pakulspai warrpibaawai ag dʉi opheeu gaai maa ajim, Porpá Durrsĩ anʉmʉg. Ich mag durrsĩpai maach hebreonaan meúa Gólgota aajem. 18Mag durrsĩdam gaaita soldaaunau pakuls gaai i meerphenaa chi pakuls jẽb ee dʉnʉʉupi sĩujim. I mag meerphe sĩubarm dʉi ĩchab i bigaau õor numí meerphegkha sĩujierram: ãb i juachaar gar, ãb i juawe gar. 19Mag jiirjop sĩubaawai ich Pilatooupai ẽsapdau phãkhanaa i por ʉ̃r meerphe sĩupijim. Chi ẽsapdau “Jesús Nazaretpierr, judionaan Rey” a phã sĩejim. 20Mag Jesús pakuls gaai meerphetarr phobor dakha arr aawai mag phiesta athee õor pom beetarr khʉʉnaujã chi ẽsapdau oo naajim. Chi ẽsapdau hebreonaan meúa phãnaa, latín meúajã phãnaa, griegonaan meúajã phã sĩejim. 21Pari Pilatoou mag amach dakhĩir judionaan Rey a phã sĩubarm oobaawai chi judionaanau irig, —Ʉ̃hʉ̃, oob jãg “judionaan Rey” a phãm. Mag khãai, “I iek mag iita judionaan Rey aajem” ata phã sĩubá ajierram.
22Magbaawai Pilatoou am ichaaur, —Ya phã sĩsiewai pod khĩet phãju khaba simgui ajim.
23Chi soldaaunau mag pakuls gaai meerphenaa, ʉ̃gthaa jiirjop sĩuwi, jũrr i khajũa ãbamʉg phenaa amachpierr ãhãbdo jig aujierram. Pari chi soldaaun jayappai narr aawai chi khajũa dau ãb ʉ̃r sob sĩsijim, eegarcha jũajem chi túnica anʉm. Pari ma sĩi meupitarrjã chukhu kha sĩerr aawai, 24ãrmaaugau awia, “Jãgan par thʉrreuju khãai khaíuta gan athaju khai” awia, mokdaudam bar jemkha nʉmua ãbmua ag dʉi sĩsijim, chi gan autarrau. Pari amau magtarran, magju nawe Ẽwandam iek phã sim gaai, “Amachpierr mʉ khajũa jig auwia mʉ túnica sĩi jemkha mok bar nʉmua gan auju” a phã simjo, ich agjoo oberju arr aawai ajim. Magua chadcha ich agjoota ajierram chi soldaaunau i dʉi. Mamʉ mag nʉm chan amachdeu magju Ẽwandam iek gaai phã simjã khaugba naajim.
25Mag chi Jesús sim pakuls ag bʉkhʉrr dakha ich Jesús ãdjã sĩejim. Mag tag ʉʉin naajim: ich Jesús ãd ag eeum, jooi Cleofas ũan María, maimua agjo ãbakhai María Magdalena anʉm. Maig mʉjã am dʉi chirajim, i ãd bigaau. 26Maar ich dʉi wenʉrraajerr khʉʉn ee mʉchta ʉ̃rcha ichdeu khõsi aajerr aawai, mag pakuls gaaimua maar ich ãd dʉi ãba dʉnʉnʉidʉ nʉm oobaawai, mʉ igwia ich ãdagta, —Ar sim pʉ iewaa; jãguata pʉ khap sĩsijugui ajim.
27Maimua jũrr mʉrʉgjã oonaa agjo, —Ar pʉam mʉ ãd, puata mʉg atagjã i khap chirʉmgui ajim.
Mʉchig magtarr aawai mua chadcha ich ag edwe mʉch di aar i arrwia, mʉch ãdjo mʉch dʉi wai chirsijim.
Jesús meetarr
(Mt. 27:45-56; Mr. 15:33-41; Lc. 23:44-49)
28Mʉg jẽb gaai ichdeu nem wauju arr thumaa ya ichdeu waubarm khaphʉ sĩerr aawai mag mʉrʉg ich ãd mʉch dʉi wai joothʉmkhĩir jaautarr khur nʉʉ awia, —Mʉ obichaaga thʉnʉmgui ajim chi Jesuu.
Pari magtarran ag nawe Ẽwandam iek phã sim gaai jaau simjo ich mag iekhaju atarr aawai ajim.
29Magbaawai soldaaun ãbmua beewi, putjo ũhũphe khitʉmta isopo anʉm piu gaai bʉʉrnaa, aig jarr ee vino adchuchúu sĩerr ee thʉnaa, i i aig ʉa aujim, mag putjo ũhũphe khitʉm ee dorrdʉ sim bereu domkhĩir. 30Mag ich i aig ʉa athaawai sĩi ag gaai bereu oowi, —Ĩsin chad thumaa aaipa sĩsimgui a khitawia, mʉ dakhĩraa eeg ʉ̃thʉbaadewi warag chaaupabaadejim.
Jesús ãi ee thutkhereu sutarr
31Mag ed nemkhoju noram anaa jua ʉ̃ʉijem noram arr aawai judionaanau pakuls gaai õor sĩumapha naajim. Amagan mag ed phiesta pomaam ajim, sĩi tagam jua ʉ̃i nʉm edam khãaijã. Mag gaaimua maar jooin judionaan chi thethemnaanau Pilatoog jaaujierram aajem, mag pakuls gaai narr khʉʉn bʉ bʉbreutkhapi jaaumkhĩir; mag bʉ bʉbreutkhabapäaiwai, jopkharraa khechbaadee eeg paakha auwia phe arramkhĩir. 32Magbaawai chadcha Pilatoou soldaaunag jaaujim aajem. Mag jaaubaawai beewi mag Jesús bigaau narr khʉʉn bʉ bʉbreutkhapʉijim; nacha ãbakhai den, maimua mag khur agjo ãbakhai den. 33Pari Jesús denjã agjo bʉbrewaag awi oowai, ya chi meemta jiir jochkherajim. Mag oobaimaawai i bʉ bʉbreubajierram.
34Pari mag mee kherʉm ãba, soldaaunau chadcha mee sim khap aag awi, ãbmua i ãi ee thutkhereu su oojim. Magbaawai bag choorbabaadem dʉi maach chodamta dojo dau bʉ̃ʉ choorba thʉnʉisijim. 35Mʉch chi mag jaau chirʉmuan mʉch daúacha ootarr aawaita chadcha mag jaau chirʉm. Mua khaphʉ chirʉm, mʉchdeu chadchata nem jaau chirʉm. Mag chadcha arr nemta jaau chiraawai pãrag ʉkhamkhĩirta mʉg phã chirʉm. 36Soldaaunau i dʉi magtarran, ich Jesús igwia ag nawe Ẽwandam iek gaai i i jaaumienau phãtarrjo thum ag eyaa oberju arr aawai ajim. Chi Ẽwandam iek phã sim gaai, “I pa chan ãbjã buyeubaju” a sim, ich chi Ẽwandamaucha pʉitarr igwi; ajapcharan ich Jesús igwiama. 37Maimua ich ag Ẽwandam iek gaai, ich Ẽwandamau agjo mag ichdeu pʉitarr igwia phãpitarr gaai, “Chi thutkhereu i sutarr khʉʉnaujã deeu i dʉi ooju” a phã sim. Magua, soldaaunau i dʉi magtarr igwia warrgarwe Ẽwandamau phãpitarrjo chadcha thumaa ich ag ee obertarr aawai chadcha maadeu ʉkhaju aai nʉm.
Jesús aukhertarr
(Mt. 27:57-61; Mr. 15:42-47; Lc. 23:50-56)
38Amau i dʉi mamag khaawai ĩchab sĩejim woun ãb José a thʉ̃r sĩerr. Chi José phobordam Arimatea anʉm eem ajim. Ichdeujã ĩchab nawe Jesuu nem jaaujerr thãraucha ʉkhaajerrta, tagam judionaanag ich khaugpim okho aajeejim, ich dʉi khaigbaju khĩirjuwia. Pari maagjerrta mag ya chi Jesús meebaadem khaug athaawai Pilato aar mawia irig jeeuwimajim aajem, Jesús chi meemdam eeg pawia arraag. Magbaawai Pilatoou irig arrju aai sim abaawai eeg paa auwia athaadejim. 39Mag athaadem ee ĩchab Nicodemojã beejim. Ich ag Nicodemo ajim biek ãb edaar ich Jesús dʉi iyʉʉ athurtarr. Nicodemoou jʉ̃gdee mirra anʉm dʉi áloe anʉmta sĩi jʉser ãbam ee waaureu sim waibeejim, agua i kha phuraag. Mag jʉ̃gdee peer quintal ãbpaím sĩejim. 40Mag, Joseeu Nicodemo dʉimua amach numiim khʉʉnau warre ich aukherju aig mag jʉ̃gdee chi Nicodemoou waibeetarr aceite ee waaureunaa, agua kha phuurnaa, put ee wajapha pʉreu kherjierram, maar judionaanaun õor aukheerwai ich magta aajerr aawai ich agjo. 41Mag amau i pakuls gaai meerphe wai narr dakha nemjĩirdo sĩejim. Maagwai mag nemjĩirdo eeta durrbʉ khõpag ee jẽbdi iiur sĩejim, ya chi khorm. Mag jẽbdi ee agtha õor ãbjã aukherba sĩejim. 42Mag jẽbdiita mag pa gaai i meerphe wai narr aigmua dakhacha sĩerr aawai mag eeta Jesús aukherjierram. Maimua mag nʉm dʉijã ĩchab ya judionaan jua ʉ̃ʉijem ed dubaag pom khaba waaur sĩerr aawai mag eeta aukherjierram, edau kheuju nawe.
Currently Selected:
San Juan 19: noaA
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
San Juan 19
19
1Mamag nʉʉ paawai, Pilatoou warag Jesús pʉrnaa wʉpi jaaujim. 2Magbaawai soldaaunau chadcha wʉnaa miu denta porsir khaphobaadejim. Mag khanaa, i por gaai jũapinaa, ĩchab khajũa phurii khĩir phʉphʉisi simjã jũapipʉijierram. 3Magnaa i aigcha beenaa, “¿Jãgpai chirʉ́ judionaan Rey?” aajeejim. Magnaa jũrram khʉʉnau i khĩidadchajã juajãau deemaajeejim.
4Chi soldaaunau mamagkham ee, chi Pilatoou deeu dawag oberchenaa chi judionaan pom pos thʉnʉmʉg, —Pãade oobat: Cha mua i dawag waipierrum, mua oowai mʉg woun bʉ̃ʉrjã kulp chukhu simgui ajim.
5Mag chadcha Jesús dawag obercheewai miu den werjũchkha simta porsirkha jũanaa khajũajã khĩir phurii phʉphʉisimjo wajappha simta jũa oberchejim. Mag dawag waibeenaa amag, —Cha sim pãar õor ig narr ajim chi Pilatoou.
6Mag amach dakhĩir daaugajãr dʉnʉʉubaichem oobaawai chi phadnaan pornaanau guardianaan Aai i jeeujem di thʉajerr khʉʉn dʉimua ũwaai sereu phobaadewi warre pa gaaita meerphepi jajaau aajeejim. Magbaawai chi Pilatoou amag, —Í chadcha khaigba khaba sĩewai mua chan i dichbamgui ajim. Warrwia pãachdeuta pãachdeu jaau nʉmjo pa gaai i meerphepʉijurauma ajim.
7Magbaawai chi judionaanau jũrr irig, —Ichdeucha jaauwaijã iita Ẽwandam Iewaa anaawai ichiita thõopʉiju aai simgui ajierram, maar ley gaai jaauwai mʉg maach agdaujopai nʉmta mag iekha simʉn thõopʉiju aai nʉm a jaau sĩewai.
8Pari chi judionaanau mag iekhabarm ũrwia warag Pilato jãphierrbaadejim. 9Mag jãphierr thʉnʉmua deeu ich dʉi wai dubwi chi Jesuugta, —¿Pʉ jamaam agá? ajim anʉm.
Pari ichig mag jeeubarmjã Jesuu bʉ̃ʉrjã i iek jʉ̃ʉ abajim aajem. 10Mag ich iek ʉkhaba abaawai chi Pilatoou irig, —Pʉrʉg khabá mʉ iekha chirʉmgui ajim anʉm. ¿Wa pua khaugba sĩwa ajim anʉm, mʉʉta iek theeg chirʉm? Muata pʉ sĩi khajapha pʉapʉipi jaauju aai chirʉm; wa magbam khai mʉchdeuta pa gaaijã warag pʉ meerphepiju akhiinjã jaauju aai chirʉmgui ajim anʉm, mʉchta mag nem jawaagjã iek theeg chiraawai.
11Magbaawaita jũrr ich Jesús garmua irig, —Ich Ẽwandamauta jãg pʉ iek theeg apiba arr amuan, ĩs pʉ bʉ̃ʉrjã mʉ dʉi iek theeg chukhu chirakhamgui ajim anʉm. Mag pʉchta chi thierr awia mʉ dʉi mag chirʉm gaaimua, pʉchjã dʉi kulp wai chirʉmgui ajim anʉm. Pari ar pʉrʉg mʉ dʉi mʉgamkhĩir õor khaigbamjo mʉ mʉig pʉr waiberr khʉʉnta pʉ khãaijã ʉ̃rʉʉcha kulp paraa nʉmgui ajim anʉm, amachdeu khaphʉ nʉmta mʉ dʉi jãg naawai.
12Jesuu ichig magbaawai chará Pilatoou Jesús chig aba sĩi mapiju ẽkhaajeejim. Pari mag nʉm ee warag chi judionaanaujã khapanaam khʉʉnauta irig, —Puata jãg woun sĩi khajapha pʉimʉn, pʉ chan magan tag emperador khapeer khabamgui ajierram. Ar ichdeupai iita reiu a simʉn, magan jũrr emperador dʉi iekkhõr aum khõchgauta mag simgui a serereu aajeejim irig.
13Mag serereukham ũrwia, Pilatoou Jesús dawag warrpi jaaujim. Magwia, dʉi ichpa oberchewia sie gaai oo sĩsijim, warre thumaam khʉʉn dakhĩir jawaag. Mag i oo sĩerr aig “Empedrado” a thʉ̃ʉrjem, mokdaúa joothʉthʉʉd wau sĩerr aawai; ich mapai hebreonaan meúa Gabata a thʉ̃ʉrjeejim. 14Amau i dʉi mamagkham ed ya nemkhoju noram ajim, edausĩe. Ich mag ora Pilatoou sĩi chi Jesús pʉapʉim khõsim iekhau chi judionaanag, —Ar sim pãar Rey ajim.
15Mag amachig, “Ar sim pãar Rey” abaawai chará, warag sereu phobaademua pa gaaita meerphenaa thõopita jajaau aajeejim. Magbaawai ich Pilatoou amag, —¿Magan mua pãar Reita pa gaai meerphebaadejupá? ajim.
Magbaawai amachdeu jũrr, —Maar tag rey chukhu nʉm. Maar rein, ãba emperador appaita maar reiugui ajierram.
16Magta chadcha warag Pilatoou am ipierr Jesús pa gaai meerphe thõomkhĩir jaaujim. Mag jaaubaawai amach dʉi athaadejierram.
Jesús pakuls gaai meerphetarr
(Mt. 27:32-44; Mr. 15:21-32; Lc. 23:26-43)
17Mag i athaadewi soldaaunau irig ag gaai ich meerphe jiirjopju pakulspai warrpibaawai ag dʉi opheeu gaai maa ajim, Porpá Durrsĩ anʉmʉg. Ich mag durrsĩpai maach hebreonaan meúa Gólgota aajem. 18Mag durrsĩdam gaaita soldaaunau pakuls gaai i meerphenaa chi pakuls jẽb ee dʉnʉʉupi sĩujim. I mag meerphe sĩubarm dʉi ĩchab i bigaau õor numí meerphegkha sĩujierram: ãb i juachaar gar, ãb i juawe gar. 19Mag jiirjop sĩubaawai ich Pilatooupai ẽsapdau phãkhanaa i por ʉ̃r meerphe sĩupijim. Chi ẽsapdau “Jesús Nazaretpierr, judionaan Rey” a phã sĩejim. 20Mag Jesús pakuls gaai meerphetarr phobor dakha arr aawai mag phiesta athee õor pom beetarr khʉʉnaujã chi ẽsapdau oo naajim. Chi ẽsapdau hebreonaan meúa phãnaa, latín meúajã phãnaa, griegonaan meúajã phã sĩejim. 21Pari Pilatoou mag amach dakhĩir judionaan Rey a phã sĩubarm oobaawai chi judionaanau irig, —Ʉ̃hʉ̃, oob jãg “judionaan Rey” a phãm. Mag khãai, “I iek mag iita judionaan Rey aajem” ata phã sĩubá ajierram.
22Magbaawai Pilatoou am ichaaur, —Ya phã sĩsiewai pod khĩet phãju khaba simgui ajim.
23Chi soldaaunau mag pakuls gaai meerphenaa, ʉ̃gthaa jiirjop sĩuwi, jũrr i khajũa ãbamʉg phenaa amachpierr ãhãbdo jig aujierram. Pari chi soldaaun jayappai narr aawai chi khajũa dau ãb ʉ̃r sob sĩsijim, eegarcha jũajem chi túnica anʉm. Pari ma sĩi meupitarrjã chukhu kha sĩerr aawai, 24ãrmaaugau awia, “Jãgan par thʉrreuju khãai khaíuta gan athaju khai” awia, mokdaudam bar jemkha nʉmua ãbmua ag dʉi sĩsijim, chi gan autarrau. Pari amau magtarran, magju nawe Ẽwandam iek phã sim gaai, “Amachpierr mʉ khajũa jig auwia mʉ túnica sĩi jemkha mok bar nʉmua gan auju” a phã simjo, ich agjoo oberju arr aawai ajim. Magua chadcha ich agjoota ajierram chi soldaaunau i dʉi. Mamʉ mag nʉm chan amachdeu magju Ẽwandam iek gaai phã simjã khaugba naajim.
25Mag chi Jesús sim pakuls ag bʉkhʉrr dakha ich Jesús ãdjã sĩejim. Mag tag ʉʉin naajim: ich Jesús ãd ag eeum, jooi Cleofas ũan María, maimua agjo ãbakhai María Magdalena anʉm. Maig mʉjã am dʉi chirajim, i ãd bigaau. 26Maar ich dʉi wenʉrraajerr khʉʉn ee mʉchta ʉ̃rcha ichdeu khõsi aajerr aawai, mag pakuls gaaimua maar ich ãd dʉi ãba dʉnʉnʉidʉ nʉm oobaawai, mʉ igwia ich ãdagta, —Ar sim pʉ iewaa; jãguata pʉ khap sĩsijugui ajim.
27Maimua jũrr mʉrʉgjã oonaa agjo, —Ar pʉam mʉ ãd, puata mʉg atagjã i khap chirʉmgui ajim.
Mʉchig magtarr aawai mua chadcha ich ag edwe mʉch di aar i arrwia, mʉch ãdjo mʉch dʉi wai chirsijim.
Jesús meetarr
(Mt. 27:45-56; Mr. 15:33-41; Lc. 23:44-49)
28Mʉg jẽb gaai ichdeu nem wauju arr thumaa ya ichdeu waubarm khaphʉ sĩerr aawai mag mʉrʉg ich ãd mʉch dʉi wai joothʉmkhĩir jaautarr khur nʉʉ awia, —Mʉ obichaaga thʉnʉmgui ajim chi Jesuu.
Pari magtarran ag nawe Ẽwandam iek phã sim gaai jaau simjo ich mag iekhaju atarr aawai ajim.
29Magbaawai soldaaun ãbmua beewi, putjo ũhũphe khitʉmta isopo anʉm piu gaai bʉʉrnaa, aig jarr ee vino adchuchúu sĩerr ee thʉnaa, i i aig ʉa aujim, mag putjo ũhũphe khitʉm ee dorrdʉ sim bereu domkhĩir. 30Mag ich i aig ʉa athaawai sĩi ag gaai bereu oowi, —Ĩsin chad thumaa aaipa sĩsimgui a khitawia, mʉ dakhĩraa eeg ʉ̃thʉbaadewi warag chaaupabaadejim.
Jesús ãi ee thutkhereu sutarr
31Mag ed nemkhoju noram anaa jua ʉ̃ʉijem noram arr aawai judionaanau pakuls gaai õor sĩumapha naajim. Amagan mag ed phiesta pomaam ajim, sĩi tagam jua ʉ̃i nʉm edam khãaijã. Mag gaaimua maar jooin judionaan chi thethemnaanau Pilatoog jaaujierram aajem, mag pakuls gaai narr khʉʉn bʉ bʉbreutkhapi jaaumkhĩir; mag bʉ bʉbreutkhabapäaiwai, jopkharraa khechbaadee eeg paakha auwia phe arramkhĩir. 32Magbaawai chadcha Pilatoou soldaaunag jaaujim aajem. Mag jaaubaawai beewi mag Jesús bigaau narr khʉʉn bʉ bʉbreutkhapʉijim; nacha ãbakhai den, maimua mag khur agjo ãbakhai den. 33Pari Jesús denjã agjo bʉbrewaag awi oowai, ya chi meemta jiir jochkherajim. Mag oobaimaawai i bʉ bʉbreubajierram.
34Pari mag mee kherʉm ãba, soldaaunau chadcha mee sim khap aag awi, ãbmua i ãi ee thutkhereu su oojim. Magbaawai bag choorbabaadem dʉi maach chodamta dojo dau bʉ̃ʉ choorba thʉnʉisijim. 35Mʉch chi mag jaau chirʉmuan mʉch daúacha ootarr aawaita chadcha mag jaau chirʉm. Mua khaphʉ chirʉm, mʉchdeu chadchata nem jaau chirʉm. Mag chadcha arr nemta jaau chiraawai pãrag ʉkhamkhĩirta mʉg phã chirʉm. 36Soldaaunau i dʉi magtarran, ich Jesús igwia ag nawe Ẽwandam iek gaai i i jaaumienau phãtarrjo thum ag eyaa oberju arr aawai ajim. Chi Ẽwandam iek phã sim gaai, “I pa chan ãbjã buyeubaju” a sim, ich chi Ẽwandamaucha pʉitarr igwi; ajapcharan ich Jesús igwiama. 37Maimua ich ag Ẽwandam iek gaai, ich Ẽwandamau agjo mag ichdeu pʉitarr igwia phãpitarr gaai, “Chi thutkhereu i sutarr khʉʉnaujã deeu i dʉi ooju” a phã sim. Magua, soldaaunau i dʉi magtarr igwia warrgarwe Ẽwandamau phãpitarrjo chadcha thumaa ich ag ee obertarr aawai chadcha maadeu ʉkhaju aai nʉm.
Jesús aukhertarr
(Mt. 27:57-61; Mr. 15:42-47; Lc. 23:50-56)
38Amau i dʉi mamag khaawai ĩchab sĩejim woun ãb José a thʉ̃r sĩerr. Chi José phobordam Arimatea anʉm eem ajim. Ichdeujã ĩchab nawe Jesuu nem jaaujerr thãraucha ʉkhaajerrta, tagam judionaanag ich khaugpim okho aajeejim, ich dʉi khaigbaju khĩirjuwia. Pari maagjerrta mag ya chi Jesús meebaadem khaug athaawai Pilato aar mawia irig jeeuwimajim aajem, Jesús chi meemdam eeg pawia arraag. Magbaawai Pilatoou irig arrju aai sim abaawai eeg paa auwia athaadejim. 39Mag athaadem ee ĩchab Nicodemojã beejim. Ich ag Nicodemo ajim biek ãb edaar ich Jesús dʉi iyʉʉ athurtarr. Nicodemoou jʉ̃gdee mirra anʉm dʉi áloe anʉmta sĩi jʉser ãbam ee waaureu sim waibeejim, agua i kha phuraag. Mag jʉ̃gdee peer quintal ãbpaím sĩejim. 40Mag, Joseeu Nicodemo dʉimua amach numiim khʉʉnau warre ich aukherju aig mag jʉ̃gdee chi Nicodemoou waibeetarr aceite ee waaureunaa, agua kha phuurnaa, put ee wajapha pʉreu kherjierram, maar judionaanaun õor aukheerwai ich magta aajerr aawai ich agjo. 41Mag amau i pakuls gaai meerphe wai narr dakha nemjĩirdo sĩejim. Maagwai mag nemjĩirdo eeta durrbʉ khõpag ee jẽbdi iiur sĩejim, ya chi khorm. Mag jẽbdi ee agtha õor ãbjã aukherba sĩejim. 42Mag jẽbdiita mag pa gaai i meerphe wai narr aigmua dakhacha sĩerr aawai mag eeta Jesús aukherjierram. Maimua mag nʉm dʉijã ĩchab ya judionaan jua ʉ̃ʉijem ed dubaag pom khaba waaur sĩerr aawai mag eeta aukherjierram, edau kheuju nawe.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.