San Juan 18
18
Jesús pʉr arrtarr
(Mt. 26:47-56; Mr. 14:43-50; Lc. 22:47-53)
1Mag maar kõit Ẽwandamag jeeu sĩi awi aigmua ereubaadeeu ag atag dosĩgdam Cedrón anʉmʉg maar phe arrjim. Maimua thoom igar dʉrbagkha dichwia maig nemjĩirdo sĩerr ee maar athaadejim. 2Mag maar naaimatarr aig ich Judaaujã khaphʉ sĩejim, ag nawejã maach thum ich Jesús dʉi ãba maig naaimapphʉ aajerr aawai. Ich mag Judaauta Jesús imeraa pʉr deeju ajiebma. 3Mag maig Jesús dʉi maar nʉm ichdeu khaphʉ sĩerr aawai sĩi warre soldaaun espaar khujiir sĩsidʉm dʉi guardianaan Aai i jeeujem di thʉajerr khʉʉnpata ich dʉi Jesús aig phebeejim. Makhʉʉn, phadnaan chi pornaanau fariseonaan dʉimua pʉitarr khʉʉn ajim. Mag bee thʉnʉmʉn, sĩi jua parjã khaba, lamparapa phuphup bee thʉnʉm dʉi pa jua panhaphata bee thʉnaajim. 4Pari mag beewia amau ich dʉi magcheju ich Jesuu khaphʉ sĩerrjã, warag am khĩirphee mawia amag, —¿Pãar khaita jʉr wenʉrrʉ́? a jeeujim amag.
5Magbaawai amachdeu, —Maran Jesús Nazaretpierrta jʉr nʉmgui ajim.
Ichig magbaawai, —Mʉ khabahab ajim ich Jesuu.
6Pari amachig Jesuu mag “mʉ khabahab” abaawai, waa ewag khʉajẽu jẽkhʉt thũphãau aimajierram. 7Magbaawai deeu ich Jesús garmua amag, —¿Ma pãar khaita jʉr wenʉrrʉmma? ajim.
Magbaawai deeu amachdeu, —Maran Jesús Nazaretpierrta jʉr wenʉrrʉmgui ajim.
8Magbaawaita ich Jesuu ũwaai, —Mua khabá, pãrag mʉ aruugui a chirʉm; pãrau mʉʉta jʉr nʉm khai, ideu mʉ khapeen wetpibat ajim.
9Jesuu mag “Ideu mʉ khapeen wetpibat” atarran, ag nawe ichdeu maar igwia, “Tata, pʉchdeu mʉ iek ʉkhapitarr khʉʉn chan ãbjã okhooba abarm” atarr aawai ajim, maar eem khʉʉn ãbjã chig am ugua. 10Mag nʉm ee, Simón Pedroou espaar wai sĩerr aawai sʉrr a jẽu athawi, thubaraau, waa phadnaan por chog Malco a thʉ̃r sĩerr kachta juachaar garm warre oorthubapʉijim. 11Magbaawai ich Jesuu Pedroog, —Pʉch espaar deeu ich deg phĩ sĩubá, oob mʉ kõit jãgam ajim. ¿Pua khĩirjuawai mʉ Ayau mʉrʉg mʉg dau aphʉʉ api sim isegwi mua i ichaaur aju aai chirʉ́? Mua pod magju khaba chirʉm, ichiita am jua ee aphʉʉ aju aai chirʉmgui ajim.
Jesús Anás aar warrtarr
(Mt. 26:57-58; Mr. 14:53-54; Lc. 22:54)
12Mag, warag chi soldaaunau amach por dʉimua tagam khʉʉn agjo judionaan chi thierrnaan beetarr khʉʉn dʉimua pʉrphobaadewi ewag ich bʉʉr arrjierram. 13Magnaa nacha Caifás chaijooi Anás anʉm di aarta warrjierram, maagwai chi Anasta phadnaan por arr aawai. 14Ich mag Caifás anʉmua ajim, ag nawe ich khapeen judionaanag, “Maach thumaam khʉʉnta dau aphʉʉ aju khãai, woun ãbpaita maach thumaam khʉʉn kõit thõopiju aai simgui” a iekhatarr, Jesús igwia.
Pedroou “Jesús khaugba chitʉm” a iekhatarr
(Mt. 26:69-70; Mr. 14:66-68; Lc. 22:55-57)
15Mag Anás aar amau i athaadeewaijã Simón Pedro dʉi maach numpaimuata warphaapaimua i oopʉpʉig majim. Mʉchin chi phadnaan poroujã khaphʉ aajerr aawai mag chi phadnaan por aar Jesús wai dubphobaadeewaijã mʉchin ierr nem pom weu wejom eejã dʉi dubjim. 16Pari maagwai Pedro pod dubba, daaugajãrpai sĩsijim. Magbaawai mua deeu dawag beewi chi ʉʉi mag puertdi thʉa sĩerr dʉi iekhabaawai ʉu Pedrojã dubpijim. 17Mag i dubpinaa irig, —¿Pʉjã ar woun ierr wai nʉm dʉi wenʉrraajem khʉʉn eem khabá? ajim chi ʉʉirau.
Magbaawai Pedroou irig, —Ʉ̃hʉ̃, mʉ chan am eem khabam, mua i khaugba chitʉmgui ajim.
18Maagwai õor jĩchkhapho thʉnarr aawai maiguim khʉʉn chi phadnaan am chognaanau mag chi Aai i jeeujem di thʉajerr khʉʉn dʉimua di ũjãrr õt orwia agʉg õt khãai naajim. Maig ich Pedrojã dʉi am aig õt khãkhãai khajim.
Phadnaan porou Jesuug jeeumatarr
(Mt. 26:59-66; Mr. 14:55-64; Lc. 22:66-71)
19Mag chi Jesús ich aar wai barbaimaawai chi phadnaan por Anás anʉmua irig maar i dʉi wenʉrraajem khʉʉnjã jeeunaa irua marag jaaujemjã jeeumajim aajem, khanta marag jaaujẽ a khap aag. Maagwai mʉ Pedro dʉi daaugajãr di ũjãrr chirajim.
20Magbaawai Jesuu irig, —Mʉʉn thumaam khʉʉn dakhĩirta nem jaau chitaajemgui ajim anʉm: judionaan Ẽwandam iek ũraag ãba biirdʉajem deg, maimua Aai i jeeujem deg thumaam khʉʉn ãba biirdʉajem eejã agjo. Maagjeewai mʉ bʉ̃ʉrjã nem meraa jaautarr chukhu chitʉmgui ajim anʉm. 21Magnaa, ¿Khanthee pua mʉrʉgta jeeu sĩ? Amauta jaauju aai naabá ajim anʉm, khanta mua amag jaaujeejĩ. Amau meraa khaba nʉmgui ajim anʉm, mua amachig jaaujerr.
22Pari Jesuu mag iekhabaawai Aai i jeeujem di thʉajem eem ãbmua i khĩidadcha juajãau phot a sĩunaa, —Khĩujã ũrbanaa magta aajeeba phadnaan por dʉi ajim anʉm.
23Magbaawai deeu chi Jesús garmua, —Mʉ khaigbata iekhatarr khai, mʉrʉg jaaubá ajim anʉm, khan gaaimua mʉ mag khaigba iekhabar. Pari mʉ agchata iekha chirʉm khai, ¿khanthee mʉ gaai jãg sĩ? ajim anʉm Jesuu.
24Mag, agtha jʉ̃gadau jua jʉ̃kha simta chi Anás anʉmua jũrr agjo phadnaan por Caifás aar deepʉijim aajem, ag bigaaupai; ajapcharan ich ãig aarma.
Pedroou deeu “Jesús khaugba chitʉm” a iekhatarr
(Mt. 26:71-75; Mr. 14:69-72; Lc. 22:58-62)
25Mag mam Jesús dʉi mamag khaawai Pedroon agtha jĩchgau õt khãkhãai khajim. Mag i õt khãkhãaikham eeta ãbmua irig, —¿Pʉjã ar woun ierr wai nʉm dʉi wenʉrraajem khʉʉn eem khabá? ajim.
Magbaawai Pedroou seukha, —Ʉ̃hʉ̃, mʉ chan am eem khabam, mua i khaugba chitʉmgui ajim.
26Maimua ag khur nʉʉpai awi ichdeu i kach oorthupʉitarr khod agjo aiguim khʉʉn chogkha simuajã agjo jũrr irig, —Ar chum nemjĩirdo ee Jesús pʉr awaan wenʉrraawai pʉjã mua i dʉi ootarr khabamá ajim irig.
27Pari ichig magbaawai, Pedroou deeu, —Mua chan i khaugba chitʉmgui ajim.
Irua mag iekhabapʉim dʉicha chi ãthãrraujã dʉi kekerekee ajim.
Pilato aar Jesús arrtarr
(Mt. 27:1-2,11-14; Mr. 15:1-5; Lc. 23:1-5)
28Maimua mag Caifás aig wai nʉʉ awia ãspa urumua õor mor dawaa aadem ee, jũrr Romaam chi gobernador aar athaadejierram. Mamʉ judionaan pod judionaan khabam khʉʉn deg dubju khaba aajerr aawai chi gobernador degcha chan dubbajierram. Mag dubtarr akhiin, mag phiesta Pascua burrju noram arr aawai mag phiesta ee thach khoojemjã pod khoju khabakham, mag dubtarr gaaimua Ẽwandam dakhĩir ãr nʉisimjota nʉisip aajerr aawai. 29Ich Pilatooujã mag khaphʉ sĩerr aawai warag ichta dawag oberchewia ich garmuata amag, —¿Jãgajĩ jãg wounau? ¿Khan gaaimua pãrau i khaibag waupi nʉ? a jeeujim.
30Magbaawai amachdeu chi Jesús igwia, —Mʉg woun õor khaigbam khaba akhiin, pʉ aig marau i wai beebakhamgui ajierram, i khaibag waupi jaaumkhĩir.
31Magbaawai Pilatoou warag amag, —Athaadet, maimua pãachdeuta pãach ley gaai jaau simjo abat ajim i dʉi.
Magbaawai sereu phobaadewi chi judionaanau irig, —Pari pãar Romapienau marag pod õor thõopiba jaautarr aawai pãachdeuta i thõoju aai naabahab ajierram.
32Pari mag Romapienagta amachdeu i thõopi jaau nʉmjã, ag nawe ich Jesuu pakuls gaai ich thõoju jaautarrjo thum ich ag eyaa obermkhĩir jaau nʉmta amachdeujã khaugba naajim. 33Chi judionaanau ichig magbaawai deeu ierrag dubwia, chi Jesús ich aigcha thʉ̃r aunaa ichigchata, —¿Pʉʉta chadcha judionaan Reí? ajim anʉm Pilatoou.
34Magbaawai Jesuu irig, —¿Pʉch khĩirjug eepai mag khĩirjug ompaa auwiata mʉrʉg mag chirʉ́, wa deeum khʉʉnau pʉchig mag jaautarr aawaita mag chirʉ́wa? ajim aajem.
35Magbaawai Pilatoou irig, —¿Mʉʉta magan judiopa ajim anʉm, magʉm nem mʉchig jaaubamjã khap aag? ¿Pʉch meeunaupai phadnaan chi pornaan dʉimuata mʉ aig pʉ aibeebajĩ? ¿Pua khani jãgjimma ajim anʉm am dakhĩir, pʉch dʉi mʉgamkhĩir?
36Magbaawai Jesuu irig, —Mʉ chan mʉg durr gaai Reikhaagjã beebajimgui ajim anʉm. Mʉg durr gaai Reikhaagta mʉ beetarr akhiin, mʉch kõit werbʉmkhĩir mʉ õor phe wai chirakhamgui ajim anʉm, judionaan chi pornaanag sĩi mʉch pʉr deem ugua. Pari mʉig eegar chan mʉ Reikhaju durr khabamgui ajim anʉm.
37I mag iekhabarm ũrbaawai chi Pilatoou irig, —¿Magan pʉʉn chadcha reipamá? ajim anʉm.
Magbaawai Jesuu, —Pua khabá khaphʉ jaaubapʉim; mʉ chadcha Reiu ajim aajem. Mʉ mʉg durr gaai parhoobam chaaidamjo thaabachetarran, mʉ Ayau chadcharam iek jaaupi sim jawaanta beejim. Maagwai thum mag chadcharam iek ʉkham khõsi ʉkha nʉm khʉʉnaun mʉ iek ũrm khõsi ũurjemgui ajim aajem Jesuu.
38Magbaawai Pilatoou irig, —Mag chadcharam iek anʉm, ¿ma khanim iekhauma? ajim anʉm.
Jesús thõopi jaautarr
(Mt. 27:15-31; Mr. 15:6-20; Lc. 23:13-25)
Mag “¿Ma khanim iekhauma?” a jeeupet awi deeu dawag oberbaadejim, jũrr chi judionaan dʉi iekhaan. Mag oberwi amag, —Mua mʉg woun bʉ̃ʉrjã kulp paraa sim ooba chirʉmgui ajim, pãrau jaau nʉmjo. 39Pari mʉg phiesta Pascuapierr pãrau preso ãb pãachdeu khõsim obeerpi jaaujeewai, ¿mua mʉg pãar Rey ideu mapiju jãg chirʉ́? ajim Pilatoou chi judionaanag.
40Pari magbaawai deeu sereu phobaadewi, —Jã chan oob pʉapʉim. Jã pʉapʉiju khãai, Barrabaata obeerbapʉpʉi aajeejim jũrram khʉʉnau.
Pari chi Barrabás õor thõomie anaa nem jĩgkhaajem gaaimuata preso sĩejim.
Currently Selected:
San Juan 18: noaA
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.