San Juan 14
14
Jesús gaaimuapaita õor ʉ̃gthar oberju aai nʉm
1Maimua maach thumaam khʉʉnag, —Oob jãg tag okhĩirjuunaa atcha khĩirju nʉʉ amiet ajim. Mʉ chan chadcha tag pãar khĩir chitabaju; pari mua pãach pʉabajeewai oob Ẽwandamaujã pãach iseg sim amiet. Magju khãai mua pãachig jawaagpamta khĩir eyaa abat ajim. 2Magnaa, Mʉ Aai sim durran di khapan õor joobaju pooma thʉnʉmgui ajim. Mag õor joobaju pom chukhu akhiin, mua pãrag, “Mʉʉn pãar naaimamkhĩir di khĩir khaugaagta pãar na mam” abakhamgui ajim. 3Mʉ pãar na mamgui ajim; maimua ya nem thum khĩir khaug sĩsiewai ũwaai mʉ beejugui ajim, pãar phe awaan, mʉch chirʉm aig dʉi ogdʉba ich mag wenʉrramkhĩir. 4Ya pãrau khaphʉ nʉmgui ajim, mʉ jamag ma, maimua mag mʉ chiraimam aarjã jãga barju.
5Magbaawai maar eem ãb maar khapeer Tomás aajerrau jũrr irig, —Señor, marau khaugba nʉmgui ajim, pʉ jamagta ma; mag nʉm, ¿jãga marau pʉ aar barjujã khap abarju? ajim.
6Magbaawai ich Jesuu, —Mʉchpaita ʉ̃gthar maajem khʉd khabahab ajim. Mʉ gaaimuata chadam iekjã pãrau khaphʉ nʉm. Mʉchdeuta mʉg jẽb gaaiwe õor Ẽwandam denkhapiejem. Ãba mʉ gaaimuapaita õran mʉ Aai aar barju aai nʉmgui ajim. 7Magua, pãrau ya mʉ khaphʉ nʉm khai, magan ĩchab mʉ Aaijã khaphʉ nʉmgui ajim. Mag i khaphʉ naab mamʉ, nau amau mʉ thõobarm aigmua atagta wajapcha i khaphʉ ajugui ajim, i jãga sĩerrʉ́, mʉ oo nʉm gaaimua ichchata oo nʉmjo naawai.
8Magbaawai jũrr Felipeeu ich Jesuug, —Señor, magan marag maach daúachata pʉch Aai oopibá, mag oobaawai marau khaphʉ nʉisijugui ajim, i jãga sĩerrʉ́.
9Magbaawaita Jesuu irig, —Nawe pãar dʉi mʉ ich mag chitaajemta, ¿agtha pãrau mʉ khaugbata nʉwi? ajim. Chi mʉ oojemuan ya mʉ Aaijã oowia sĩebahab. Mag nʉmta ¿khan atchata warag mʉch Aaipata pãachig oopim khõchkha nʉma? ajim maach thumaam khʉʉnagta. 10Magnaa chi Felipeeg, ¿Pua ʉkhabata sĩ ajim, mua mag mʉ mʉch Aai dʉi chiraawai mʉ Aaijã mʉ dʉi sim a chirʉm? Maguata mua nem jaau chitʉm chan sĩi mʉch ipaita jaau chitʉm khabam. Mua nem wau chitʉmjã mʉchdeuta mag wau chitʉm aju khabam; ajapcharan ich mʉ Aai mag mʉ dʉi sĩejemuata waaujemgui ajim. 11Magnaa deeu maach thumaam khʉʉnag, Chadcharau keena; mʉ chadcha mʉch Aai dʉi chirʉm, maagwai ich mʉ Aaijã mʉ dʉita simgui ajim. Mua mag jaau chirʉm pãrau ʉkhamapha nʉm khai, sĩi mua nem wau chirʉm gaaimua khãijã chadcha Ẽwandam mʉ dʉi sim abat ajim. 12Pãade mʉ iek ũrbat: Chadcha chi mʉ iekta ʉkha simuan mua nem wau chirʉmjo waunaa ag khãai ʉ̃rʉʉchajã waumajugui ajim, mʉch Aai aar pawia mammuajã mua mʉch juapá deeju aawai. 13Pãar chadcha mʉch denkha naawai pãrau pãachdeu nem khõsim thum mʉ Ayagta mʉ iek gaai thʉwiata jeeumʉn, mua pãar dʉi mag pãachdeu jeeu nʉmjo ajugui ajim, mʉchdeu pãar dʉi mag chirʉm gaaimua ich mʉ Aaita chi jua thierriu a khap amkhĩir. 14Mag pãar chadcha mʉ denkha naawai pãrau mʉ Ayagta nem jeeu nʉmʉn, muajã chadcha jerrba mag pãachdeu jeeu nʉmjo ajugui ajim pãar dʉi.
Ẽwandam Akhaar pʉiju jaautarr
15Mag iekhakhagmamua ĩchab marag, —Pãrau chadcha mʉ daupii nʉm khai, mua pãachig nem jaautarr thum ipierraa abat ajim. 16Pãrau magmʉn, mʉch Aai aar paawai mua irig pãar athee dewam mʉch jũrr pʉipi jaaujugui ajim, pãar dʉi ogdʉba ich mag pãar khĩir jãsenkha wai nʉrramkhĩir. Ma ich Ẽwandam Akharaugui ajim. 17Magbaawai irua ich Akhaar pʉiju. Pari ma, mʉg jẽb gaai sĩi parhoobam khʉʉnau pod aubajugui ajim, amau i oojã oobanaa khaugjã khaugba naawai. Mag amau i khaugba nʉm ee, ichdeun pãrag ich khaugpinaa chadam iekjã khaphʉ apijugui ajim, ichta pãar thãar ee sĩenaa mʉg atagjã ich mag pãar dʉi sĩerraju aawai.
18Mag iekhakhagmamua, —Wouchnaanjo chan mua pãar dau aphʉʉ phepʉabamgui ajim. Mawiajã mʉʉn ũwaai deeu pãar dʉi chiraichejugui ajim. 19Nau mʉigmua jopcha pom khaba nʉm ee, mʉg jẽb gaai mʉ iek ʉkhaba nʉm khʉʉnau tag mʉ oobaju. Pari mag amau mʉ ooba awiajã pãar dʉin deeu maach oojugui ajim. Mag deeu maach oobaawaita pãrau khaphʉ ajugui ajim, pãachjã mʉchjo ich mag iiu wenʉrraju. 20Mag mʉ iiubarm edta chadcha mʉ mʉch Aai gaaita chirʉm pãrau wajapcha khaphʉ nʉisiju. Ich mag edta ĩchab pãrau khaphʉ nʉisijugui ajim, pãachjã mʉ dʉi naawai mʉchjã jũrr pãar dʉi chitaju. 21Chi mua nem jaautarr ũrnaa mʉ ipierraa simuan magan chadcha mʉ daupii sim a sim. Mag chi mʉ daupii simʉn, ĩchab mʉ Ayaujã i daupii ajugui ajim. Mag mʉ Ayau i daupii abaawai mʉchdeujã i khõsinaa warag mʉch khĩirjugchata khap apijugui ajim.
22Magbaawaita Judaau (chi Iscarioteeu khaba mamʉ) irig, —Señor, ¿jãga mag maragpaita pua pʉch khaugpijuma ajim, pʉch iek ʉkhaba nʉm khʉʉnagpa pʉch khaugpiba?
23Magbaawai Jesuu irig, —Chi mʉ daupii simuata mʉ ipierraa nem wauju aawaima ajim; maagwai iita mʉ Ayaujã ĩchab daupii abajup ajim. Mag maata mʉ Ayaujã daupii wai sĩewai maach numiita i dʉi ãba i thãar ee jooba wenʉrrajugui ajim. 24Mamʉ chi mʉ ipierraata nem wauba sim chan mʉ khõchkhaba aawaiugui ajim. Magnaa, Cha pãrau mʉ iekha chirʉm ũr nʉm chan mʉch iekpai khaba, jãan mʉch pʉitarrau iek jaaupitarr iekhaugui ajim. 25Pãar dʉi agtha chirʉwe ya mua pãrag thumaa jaaubarm. 26Pari mʉ jũrr mʉ Ayau ich Akhaar pãar khĩir jãsenkhamkhĩir pʉibaawai maguata jũrr pãrag nem thumaa jaaunaa mua pãachig jaaujerrjã deeu thumaa pãrag khĩir eyaa apijugui ajim.
27Mag iekhamamua, —Mʉchjã onee chiraawai mʉch petaawai pãarjã mua oneenaa khõinaata phepʉajugui ajim. Mag pãar oneenaa khõinaa nʉisim chan sĩi mʉg jẽb gayamjo khũchpai khaba, ich mag nʉisim iekhau ajim. Mag mʉ mam a chirʉm ũrwia oob okhĩirjuu amiet, ni nem okhojã amiet ajim marag. 28Pãrau mʉ iek ũrjierramgui ajim, mʉ mʉch Aai aar mawia deeu pãach aig beeju a chirʉm, pãar dʉi chitaag. Pãrau chadcha mʉ khõsi nʉm akhiin, mag mʉ mam a chirʉm ũrwiajã pãar onee naakhamgui ajim, mʉch Aai mʉch khãaijã ʉ̃rpai sim dʉita chiraimaawai mʉch Aai dʉi ãba mʉchpata õrau tho iekhaju aawai. 29Ĩswe ag nawe ya pãrag jaau chirʉmgui ajim, eeupemjo chadcha mag mʉch mawi deeu pierrwaijã mʉchdeu pãachig jaaujerr khĩir eyaanaa ag iek gaaita warag ubʉ ʉkha nʉisimkhĩir.
30’Mepeerta mag mʉ khãai ʉ̃rpai sĩewai khabam, pari mʉg jẽb gaai ichta chi porkha sĩerrʉmua ich õor pʉiwia mʉ pʉr awaan wedurum aawai ya pomcha pãar khĩir chitabajugui ajim. 31Pari ichiita ich mag ʉdʉraa mʉch thõopiju aai chirʉmgui ajim, mʉch iek ʉkha nʉm khʉʉnau mua chadcha mʉch Aai khõsi chitaawai ichdeu mʉchig jaautarrpierrta wau chitʉm khap amkhĩir.
Mag iekhapʉiwia warag, —Maachta mʉigmua wettarraugui ajim.
Currently Selected:
San Juan 14: noaA
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.