SIEMCHILBU 1
ZOMI
1
Sil siem thu
1Achiil in Pasian in Lei leh Van asiem. 2Lei khu lim leh guong neilou ana hia; tualeh tuipi thuhtah tung khu mielin akhu khum hi. Pasian Hagau in tuipi tungte a awpkhum zing hi. 3 Tuachi’n Pasian in “Vah hing um heh” achia, tuachiin ‘vah’ ahing umta hi. 4Tualeh Pasian in vah a en a, hoi asa mama hi; tuachi’n Pasian in vah leh miel akhenta hi. 5Pasian in vah khu sun achia, miel khu zan achita hi. Tuachi’n nitah leh zingmawng ahing umta a, ani khat ni ahi.
6 Tualeh, Pasian in “Tui leh tui” kikal ah vanthamjawl um henlen, tuachiin tui leh tuite khen heh, achi hi. 7Tuachi’n Pasian in vanthamjawl abawl a, tualeh vanthamjawl nuoia tuite leh vanthamjawl tunga tui umte a khenta a; tuabang ahing hita hi. 8Tualeh Pasian in “Vanthamjawl khu Van” achi hi. Tuachi’n nitahlam leh zingmawnglam ahing umta hi, ani ni na ahi.
9Tualeh Pasian in “Vannuoi a tuite munkhat ah umkhawm henlen gamgaw hing kilang hen” achia, tuabang ahing hita hi. 10Pasian in gamgaw khu Leitung achia, tualeh tui umkhawmte khu tuipite achita hi. Pasian in tuate a en a hoi asa mama hi. 11Tuachi’n Pasian in “Lei tung in annte louhing chi neite, theikung, leitunga amauh chi umdan bang chiet a hing ga, aga sunga achi umte hing poudoh sah tahen” achia, tuabang ahing hita hi. 12Tualeh Lei tung in loupate, annte louhing amauh chi umdan ding banga chi neite, singkung amauh um ding dan bang chiet a ga, aga sunga achi umte apoudoh sahta a, tualeh Pasian in a en a, hoi asa hi. 13Tuachi’n nitahlam aum a, zingmawnglam zong aum a, ani thum ni ahi.
14Tuachi’n Pasian in “Sun leh zan khenna dingin vanthamjawl ah tanvah ding um henlen tuate khu chiemtenate, hunbite, nite kumte theina ding hi uhen, 15Tualeh leitung tanvah dingin vanthamjawl ah um uhen” achia, tuabang ahing hita hi. 16Tuachi’n Pasian in vah thupi ni abawl a, avah thupi zawpen khu sun a vaihawm dingin tualeh avah neu zawpen khu zan a vaihawm dingin abawl a; aasite zong abawl hi. 17Tualeh Pasian in tuate khu leitung tanvah dingin vanthamzawl ah akoi a, 18Tualeh sunlai tung leh zan tunga vaihawm ding leh vah leh miel khen dingin akoi a, tualeh Pasian in tuate a en a hoi asa hi. 19Tuachi’n nitah leh zingmawng ahing um a, ani li ni ahi.
20Tuachi’n Pasian in “Tuite’n silsiem kipiathei hinna neite tampi hing pawtkhesah uhenlen vate zong tunglam vanthamjawl ah leeng uhen” achi hi. 21Tuachi’n Pasian in Tuipi a silsiem hinna nei lienpipite asiem a, ganhing kipiathei chinteng tui in ahing pawtsah zousie ama uh chi umdan ding bang chietin asiem a, tualeh va hanei chinteng zong amauh chi umdan ding bang chietin asiem a, tualeh Pasian in tuate a en a, hoi asa hi. 22Tualeh Pasian in “Ama u’khu chi tampi suongin hing pung unlen, tuipite tui in dimsah unlen, vate zong leitung ah pung uhen” chi’n aguolzawl hi. 23Tuachi’n nitahlam aum a, zingmawnglam zong aum a, tuakhu ani nga ni ahi.
24Tuachi’n Pasian in “Leitung in silhing amauh chi umdan ding bang chietin; gantate, ganhing bohvate, gamsate amauh chi umdan ding bang chietin umsah uhen” achia; tuachi ahing hita uhi. 25Tualeh Pasian in leitung a gamsate amauh chi umdan bang chietin, gantate amauh chi umdan bang chietin, tualeh leitunga ganhing bohvahte zousie amauh chi umdan bang chietin abawl a; tuachiin Pasian in a en a, hoi asa hi.
26 Tuachi’n Pasian in, “I kibahpi eima meel bangbang in mihing siemvai in amauh khu tui a ngate, tungleeng vate, gantate, leitung pumpi a ganhing, leitung a bohvah zousie tungah thu nei sah vai” achi hi. 27 Tuachi’n Pasian in ama kibahpi in mihing asiem a, tualeh ama limlemel puo in pasal leh numei asiem hi. 28Tuachi’n pasien in amauh guol azawl a, Pasian ma in akung uah, “Chi tamtah suongin hing pung unlen, leitung luodim unlen, na thu thu un umsah un; tuipi a ngate tungah, tunga leeng vate tungah leh leitunga vah ganhing chinteng tungah thu nei un” achi hi. 29Tualeh Pasian in “Ngaivawi, leitunga um annte louhing chi nei zousie leh sing chi nei ga umna sing chinteng na kung uah kahing peta hi, tuate khu nou a dingin na ann ding uh ahi. 30Tualeh leitung a gamsa zousie, tung a leeng va zousie leh leitung a bohvah hinna nei zousie kung ah a hinna ding un annte-louhing ka pie hi” achia; tuachiin tuabang ahing hi ta hi. 31Tuachi’n Pasian in a silsiem zousie a en a, Ngaivawi hoi asa mama hi. Tuachi’n nitahlam leh zingmawnglam aum a, ani guh ni ahi.

©1992 Bible Society of India

Learn More About LAISIENGTHOU