MATHIU 1
ZOMI

MATHIU 1

1
Jesu pienna khanggui
(Ruth. 4.18-22; 1 Khang. 1.34; 2.1-15; Luk. 3.31-34)
1Abraham tapa, David tapa, Jesu Khrist khanggui kisutna laibu. 2Abraham tapa Isaak ahia, Isaak tapa Jakob ahia, Jakob tapa Juda leh asanggam pasalte ahi. 3Tamar akipat a Juda tapate Perez leh Zerah ahi a, Perez tapa Hezron, Hezron tapa Ram ahi. 4Ram tapa Aminadab ahia, Amminadab tapa Nahshon ahia, Nahshon tapa Salmon ahi. 5Salmon tapa Rahab akipat in Boaz ahia, Boaz tapa Ruth akipat in Obed ahia, Obed tapa Jesse ahia, 6 tualeh Jesse tapa David leengpa ahia, Lengpa David tapa Uria zi lah a kipat in Solomon ahi. 7Solomon tapa Rehoboam ahia, Rehoboam tapa Abijah ahia, tualeh Abijah tapa Asa ahi. 8Asa tapa Jehoshaphat ahia, Jehoshaphat tapa Joram ahia, tualeh Joram tapa Uzziah ahi. 9Uzziah tapa Jotham ahia, Jotham tapa Ahaz ahia, Ahaz tapa Hezekiah ahi. 10Hezekiah tapa Manasseh ahia, Manasseh tapa Amon ahia tualeh Amon tapa Josiah ahi. 11Babilon lam a sal a apuimang lai vel un Josiah in Jekoniah leh asanggamte ahing hi. 12Tualeh Babilon lam a sal a puimanga aum nua ua Jekoniah tapa Shealtiel ahia, Shealtiel tapa Zerubbabel ahi. 13Zerubbabel tapa Abiud ahia, Abiud tapa Eliakim ahia, tualeh Eliakim tapa Azor ahi. 14Azor tapa Zadok ahia, Zadok tapa Akim ahia, tualeh Akim tapa Eliud ahi. 15Eliud tapa Eleazar ahia, Eleazar tapa Matthan ahia, tualeh Matthan tapa Jakob ahi. 16Jakob tapa Mari pasal Joseph ahia, tua Mari apat in Khrist kichi Jesu ahing pieng hi. 17Tuachi’n khang zousie Abraham akipat David dongchieng khangsawm leh khang li ahia, David akipat a Babilon gama sal a puimanga aum dong chieng uh, khang sawm leh khang li ahia, tualeh Babilon gama sal a puimang a aum ua kipat Khrist dong chieng khang sawm leh khangli ahi.
Jesu pienna
18 Tuin Jesu Khrist hing pien dan hichi bang ahi: Anu Mari khu Joseph toh akikham lai ua, a umkhawm masang un, Hagau Siengthouin nau apaisahta chi akitheita hi. 19Tuachi’n apasal Joseph midihtah ahia, zapi mai a amanu zumsuo ding a utlou ziehin, aguh a tawpsan atumta hi. 20Hinanleh ama’n tam thute angaituo laiin, Ngai vawi, amangin akung ah, Mangpa vansawlsieng khat ahing kilah a, “David tapa Joseph, na zi khamlai Mari kitenpi ding zau sin, anau pailai khu Hagau Siengthoua paisah ahi bou hi. 21 Amanu’n tapa khat hing nei van in, amin Jesu na phuo ding hi, Aman a mite akhelna ua kipat ahundam ding zieh in,” a chi hi. 22Tuin tamte zousie Mangpa’n a guolnei kam a ana gente atangtun theina dinga hing um ahi. 23 “Ngai un, nungah siengthou agai ding a, tapa anei dinga, amin Immanuel achi ding uhi”, tua khu ikungah “Pasian a um china ahi”. 24Tuachi’n Joseph imu lai athou a, Mangpa vansawlsieng in thu apieh bangin abawl a, azi akitenpita hi. 25 Hinanleh amanu’n atapa masa pen anei khieh masang sie’n aluppi sih hi. Tualeh amin Jesu aphuota uhi.

©1992 Bible Society of India

Learn More About LAISIENGTHOU