WÜHKHE 13

Rükajamrü Yüshihkhi

(Yuzüng 1.19-33)

1Tüsho Atungpuhnü Mosa ki tha, 2“ Inü Israelrü mihtsürü kilim jihkhi Kanan lo züta kheahpü mihtsürübo thiyia yüshang; arü buhrü trük aban ching arü bolung limberü thsüde nünü mihtsürü thiyiang.” 3Jumonü Mosanü arübo Atungpuh yukhüm yande Paran sunglo ching yüshih; arübo Israel mihtsürü bolung azothsürübo lakheah. 4Tüsho arü mungbo ju harü lakheah: Reuben trük chingnü, Zakkur tsührü Shammua. 5Simeon trük chingnü, Hori tsührü Shaphat; 6Juda trük chingnü, Jephunne tsührü Kaleb; 7Issakar trük chingnü, Josep tsührü Igal; 8Ephraim trük chingnü, Nun tsührü Hoshea; 9Benjamin trük chingnü, Raphu tsührü Palti; 10Zebulun trük chingnü, Sodi tsührü Gaddiel; 11Josep trük chingnü (ju Manase trük chingnü), Susi tsührü Gaddi; 12Dan trük chingnü, Gemalli tsührü Ammiel; 13Asher trük chingnü, Maikel tsührü Sethur; 14Naphtali trük chingnü, Vophsi tsührü Nabi; 15Gad trük chingnü, Maki tsührü Geuel. 16Mihtsürü harübo ha alomi züta kheahpü Mosanü ayüshihkheah. Tüsho Mosanü Nun tsührü Hoshea mung ju Jihusua de müthrijih.

17Jumonü Mosanü arübo Kanan lo züta kheahpü thiyi, tüsho arü ki tha, “Negeb hode awung lomi ching yüang, 18tüsho alomi ju küdürüanü kheahang, tüsho ju lomi ching larü mihtsürü ju müküpla shi yiuhyiuhla, anükhüh a shi ahihkhüh a, 19tüsho arü lakhi lomi ju tsüla shi mütsü, arü lakhi kiutobo ju chipi thsüla shi müthsü, 20tüsho alo ju tsüla shi mütsü, tüsho ju ching sangdung la shi mülanü kheahang. Mulong toang, tüsho ju lo chingnü akhiukkhi sangaso khürü hanbah arang.” Ju kurungaso münpü kim lakheah.

21Jumonü arünü Hamath phünide Zin sunglo chingnü Rehob khiungde züta kheah. 22Arünü Negeb lim wutu, tüsho Hebron lim arü; tüsho ju ching Anak atoshang tsührübo Ahiman, Sheshai, tüsho Talmai pürü lakheah. (Hebron ju Ijip ching Zoan kheaknü kam thünenü akhuh thrüna lakheah.) 23Arübo Eshkol dükhün ching arü tüsho arünü ju ching kurungaso düchi lipkhibahle amülangmonü mihtsürü mahne dükeak sang riyukbahle han, arünü tsarümkiu tüsho khubasobo she hanbah arü. 24Ju dangpung ki ju Eshkol dükhün de ji, tümütüsho Israelrübonü ju ching kurungaso düchi lipkhi.

25Nimung yirü dunglim arübonü lomi züta kheahbah alodarü, 26tüsho arübo Mosa le Aron tüsho Israelrü boto kilim Paran sunglo Kadesh ching arü; arünü thiyusheak hanbah ane le boto ki arü, tüsho ju lomi ching yo sangaso huh. 27Tüsho arünü Mosa ki tha, “Nünü athiyikhi lomi ching isa yüdo. Dükde ju ching niuhke tüsho mukhuke bukchoh, tüsho ha ju ching yo sangaso ah. 28Kheaküshe, ju ching lakhi mihtsürübo müranglah; kiutobo ju ayündolah tüsho amülakbo ah; kheaküshe ju ching isanü Anak tsührübo ngüdo. 29Amalekrü düjing lomi ching lah, Hitrü, Jebus, tüsho Amorrübo awungbo ching lachoh; tüsho Kananrü Mediterranean keto yean le Jordan keto yean ching lah.”

30Kalebnü mihtsürübo düsheak makhiukshihde yankhiabah tüsho Mosa ki tha, “ Isa khülang ki wutubah alo ju luanü tümüde isanü ju ayankhikhukbah.”

31Tüshe Kaleb lung yürü mihtsürübonü tha, “ Isa jurü mihtsürü azhihde muwutukhuk, tümüde arü isa kheaknü amüküpbeah.” 32Jumonü arübonü zütakheahkhi dünkheak thiyusheak amütsü Israel mihtsürübo ki tha, “ Isanü zütakheahkhi lonü ju ching larübo lang she tsühyungpü suhdahde akhiuka mükip, isanü angürübo alala atoshang lang ah. 33Tüsho isanü ju ching Nephilimrü ngüdo (Nephilim chingnü arükhi Anak tsührübo); tüsho arü miki isabo sangyü-tangkhobo ruk lang kamdo.”

Currently Selected:

WÜHKHE 13: YIMCBSI

Highlight

Copy

Compare