ISAIA 49
49
Israel ju Trükshihbo ki Tsün Khülang
1I ki aniang, O keyean lobo,
tsüde aniang, nüsa limshu mihtsürübo!
müzübechokinü Atungpuhnü I jikheah,
I be nuyam ching lachoki apinü I mung jijihkheah.
2Apinü I mün nukshang ayuk nangde kamshih,
api khah alamme ching I jika zo;
apinü I ananshahshah hühzo khülang kamshih,
api hühzopung ching I jika zo.
3Tüsho apinü I ki tha, “ Nü a I yamlarü,
Israel, shepü kheaknü I müretahpü la.”
4Tüshe inü tha, “ I akeangkeang ching rhimodo,
tümü mülakhi tüsho akeangkeang ching I sühmüh bahdo;
tüshe I ngüpü lakhi Atungpuh lung lah,
I thsambah I Thrünpuh lung lah.”
5Tüsho kheakü Atungpuhnü thachoh,
shepünü api yamlarü thsüpü nuyam ching I lashihkhea,
api kilim Jakob belodarüpü,
tüsho Israel api ki mukhungpü,
tümüde Atungpuh miki I müretahkhi lah,
tüsho I Thrünpuh ju I sühmüh kamdo–
6Apinü tha, “Jakob trükbo bemusupü nü I yamlarü thsüpü tüsho Israel arhang larü belodarüpü ju khide athülih ah;
inü trükshihbo ki nü ayin khülang nangde ajihbah,
junangde I akhümkhitnü alomi akheam khiungbah.”
7 Atungpuhnü ha thachoh,
Israel Rhokhitrü tüsho api Amüsüh Khülang,
sükde jingmükhea lakhi kilim trükshihbonü athraneankhi,
yakzanshuhrü yo azhorü,
“ Kiulongthsürübonü angübah tüsho wusurübah,
yakzanshuhrübonü angübah tüsho arünü amükhümbah,
tümütüsho Atungpuh hode shepü athülün la,
Israel Amüsüh Thrünpuh shepünü nü mokhitkhea.”
Jirusalem Lalokhi
8 Atungpuhnü ha thachoh:
Amulongkhi kim khülang ching inü nü ki alojihdo,
akhümkhit nimung khülang ching inü nü rungdo;
inü nü kümde zodo tüsho nü tangzüng khülang nangde lomi laloshihpü, thsümünima lakhi yamrüplurüp
arünü alushihpü mihtsürübo kilim jihdo;
9aramrübo ki thachoh, “Akhiukang,”
amiting ching larü ki, “ Nüsa huhang.”
Arübo limro mungyean yimtsühbah,
achang arakrak alala arü yimtsühpung labah;
10arü mükhüm yungsho kemüthüri yungsho apung atak yungsho aninü arü kheak mütak,
tümüde shepünü arü kheak müthsümchonü arü bebah,
tüsho ayung limpeang arü bebah.
11Tüsho inü I wung alala limro kamshihbah tüsho I limtobo shuhkihbah.
12Kheahang, harü limshu chingnü arübah,
tüsho kheahang, harü dukulim tüsho aniyüzahlimnü,
tüsho Sinim lomi chingnü arübah.
13Asühachihpü khün thsang, O thüningbo,
tüsho khide asühang, O alomi;
O awungbo, khün thsüde alankhitang!
Tümüde Atungpuhnü api mihtsürü shukheamdo,
tüsho api mihtsürü thsünürü kheak mihmüthsüm labah.
14Tüshe Zionnü tha, “Atungpuhnü I bahyukdo,
I Tungpuhnü I mihdo.”
15Azoberü khülangnü anihbenü akümkhi khungarü mihpü kukla de,
yungsho anihbe nuyam ching yo khungarü ki amuzho muhuhba de?
Harü she amihpü kuklah tütüshe inü a nü mümih.
16Kheahang, inü nü I müyilung kheak thrütkihdo;
nü chipibo mutuklode I miki lah.
17Nü tsührübo athride arado,
tüsho sherünü thsümünima yapshihkheanü nü kheaknü tsoabahdo.
18Nü mük züngkihang tüsho mühide kheahang;
arü alala mukhungchoh,
arübo nü kilim arüchoh.
I lale, Atungpuhnü thachoh,
zülu nangde arü alala nünü ayihbah,
tüsho arhangberü nangde nünü arü yihbah.
19Tsükjide nü yo athsümünimkhi tüsho zhikrangkhündo alakhi dangpungbo,
tüsho abahkhitkhi nü lomi tsükjide kheakü lapü larü thsungkheak mathsangde alabah,
tüsho nü muyurübo limshude alabah.
20Nü mitripkhi kim ching zübekhi tsührünü nünü sode athabah:
“Ha dangpung I thsungkheaknü khide mütsümlah;
I lapü thsungkheak akhiungshak thsüjang.”
21Judüki nü mulong ching nünü athabah,
“Shenü I kilim harü zübejihkhea?
I mitripde tüsho bünkeangberü,
ramtso ching tsoshih-a lakheah–
jumonü shenü harü mütrükhea?
I a I langzü tsütsü lang alakheah
dale harü küchingnü arükhea?”
22Atungpuh Thrünpuhnü ha thachoh:
“ Inü nahde trükshihbo ki I khah shuhkihbah,
tüsho mihtsürü ki I yo riphin thokihbah;
tüsho arünü nü tsührübo arü khüh kheaknü handarübah,
tüsho nü tsührübebo arü dubuh kheaknü ashuhbah.
23Kiulongthsürübo ju nü kümmusurü buhrübo labah,
tüsho arü niuberübo ju nü mütrürü berübo thsübah.
Arü miro alo lim kheahbah arünü nü ki khukningbah,
tüsho nü jing kheak asungthulung müleakbah.
Judüki I Atungpuh de nünü amükheahbah;
sherünü I aleangbanü achih müngüshih.”
24Wuto kheaknü shih lukhukba de,
yungsho thiyuro-lungkirü ramkhibo bekhitkhukba de?
25Tüshe Atungpuhnü ha thachoh:
“ Wutonü aramkhi she alubah tüsho bukmüke shih she abekhitbah;
tümüde nü kheak shochihrü kheak inü shochihbah,
tüsho inü nü tsührübo khümkhitbah.
26Inü nü junorübo ki arü shih tsühloshihbah,
tüsho arü thiyihnü yukhunü nangde amüshangbah.
Judüki mihtsürü alalanü I Atungpuh nüsa Khümkhitrü tüsho nüsa Rhokhitrü,
Jakob yo Wuto Khülang de amükheahbah.”
Currently Selected:
ISAIA 49: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
