2 VEMAITO 4
4
Elisha nou Touhayu Mimeapfüye Soukhayu
1Rachipaolayu maime hi louyu mimeapfü ali nou Elisha hi tave haibüa paoe, “Apaopuwo, nevei kilai achapuo hai thaitare, ae nenou puhye süwe süolouzü puh hai Ramai ye piyu mai ali-e, ana chuo puhnou maivei paohzho pfüa bue tea puletao nou tave paohzho pfüyu nasü poka loulai tea anahpoutu ahai sü puletao vei qila panou soure donou sapoa talai tea bure.”
2Elisha nou chila peie, “Enou neye donou dai soupeiyu ne jüpawe? Ne ki hi daidai bue touyu khesü ahi paokhaio.”
Mimeapfüpai nou chila peie, “Aki hio halia ha-e, oliv theadzü hai bvü titouli hinou daotu bua baie.”
3Elisha nou honapai hi paoe, “Nenou taho nevei kinapamai hinou bvü sayu khesü ngaolousü koute polo. 4Süthaisü ne ae ne nahpoututao nou kihikha talou loua kikhu sü khukhaio, ae oliv theadzü hai bvü sayutao hi lathou khaio. Ha bvü nasü phoure toulouzü, buh kukhe ali hi pokhailo.”
5Südonou honapai nou puh vei nahpoutu ahaiye sü saloua kikha hi louloure ae kikhu sü khuwure, süthaisü oliv theadzü thouyu bvü nasü poloua puh nahpoutu ahai nou pove peiyu habvü sayu hisü theadzü hai lathoure. 6Puh pfü nahmaitao nou ha bvü teitei hi theadzü lathou phoukhai toulouyu thai, honapai nou habvü sayu lia buhare tea noue. “Habvü sayu ali-a hazei toure,” tea puh nahpoutu ahai nou chila peie. Ae theadzü sü kükoupu more. 7Honapai nou rachipaolawo Elisha hi veyu phaki, puhnou honapai hi paoe, “Oliv theadzü taosü zholoua maipao pfüyu veishi hai khapeio, süthai-a ne pfü nahmaitao hai pousha lia nou bua hrüloulai.”
Elisha ae Shunem hi Toungiyu Naotupai
8Teithe ali Elisha nou Shunem hisü ve-e, ae nuhdu sühisü toungiyu naotumai ali bue. Honapai nou puhye puh ki hinou tave vai-o tea kuloure, süthaisü puhnou Shunem hi veyu chühai honapai ki hinou ve chao-a nou bua baiwe. 9Honapai nou puhvei kipuo hi paoe, “Ahai kihi ve zhazhayu mai haina hai sheeyu mai ali-e tea Enou louchewe. 10Ahai nou kide ali hai kipei hinou soupaloua zü, taibel, buh ae meivabvü thoukhai peiwua puhnou hai hi veyu chüsü panou chaolou laikhe.”
11Teitheli Elisha nou Shunem hi ve-e, ae puhnou puhvei kide na hisü pa so-a nou bue. 12Puhnou puhvei kilai Gehazi hisü taho naotupaiye kulo tea paoe. Honapai nou puh hi veyu phaki, 13puhnou Gehazi hi paoe, “Honapai nou ahaiye donou veasho-a haibüa bu-zü soupeiyu ae sheshe peiyu vanou Eye panou puhye donou daisou peiyu jüpawe touyu sü noukhaio. Puh thaosou taho veo hi moyuma reihmai peikhoyu maitao hi puhye donou chi paokha peire halia buha-e?”
“Enou avei maitao hrohinou hrüa nou bua baie, ae Enou jüpayu teitei hai buche-a baie,” tea honapai nou chila peie.
14Elisha nou Gehazi hi noue, “Sükulouzü Enou puhye donou dai soupeilai?” Puhnou chila peie, “Honapai hai nahpoutu ha-e ae puh cha hai tsüpare.”
15Elisha nou honapaiye hai hi kupoa pa-o tea kharochi peie. Honapai nou tapa kikhu hinou la-a bure, 16ae Elisha nou honapai hi paoe, “Daohkou chu teile phaki, nenou nahpoutu ali daopoa nou bulai.”
Honapai nou chila peie, “Oh apaopuwo, ne sü Ramai vei mai-e, ahi sübüa daso!”
17Ana Elisha nou paoyu thaifüa daohkou hai honapai nou nahpoutu ali naloure.
18Po daotu thaisü, chachiyu teile phaki, nahtou na hai puo hi holai tea dou hi tare, ae puh puo hai dou hinou chachiyu maiye koa vah soua nou bue. 19Süteile bü hinou nahtou nanou puh puo hi “Apei soulere! Apei soulere!” tea kra-a nou paoe.
“Nahtouye pfü hi sapoa vepeio,” tea puo nou kilai hisü paoe. 20Kilai nanou nahtou naye pfü hi save peie, ae nahtou nanou puh pfü vei nakephao hinou hea koute buloua nou thaitare. 21Süthaisü pfü nou puhye sü Elisha vei kide nahi sapaloua puhvei züphao hinou zükhaire ae kikhu khuwua nou tare. 22Süthaisü honapai nou puh chaye sü kuloua nou paoe, “Eye kilai mai ali ae rheisüh ali seive peio. E rachipaolawo Elisha hi holai hie, thalou süyu koute tha-a nou Esü dakhai ve-a bailai.”
23Puh cha nou haibüa noue, “Ne daisounou zhou nou talai tiwe? Zhou sü Soteithe moe, moyuma Khouh Ashu vei Khonüh nüyu teithe moe!”#4.23 soteithe...khouh ashu vei khonüh: Haibüa vepare khesü noure donou sheeyu teithe hinou taho rachipaola maiye chakuyua veikha-e tea maikhe mainou powe.
“Taivei-e,” tea honapai nou chila peie. 24Süthaisü honapai nou rheisüh phao hisü taopaloua nou puhvei kilai hisü paoe, “Taveilou süyu koute tavei takhaio, Enou paomo koute chaokhai touso.” 25Sübüa honapai nou Karmel Deichi hi Elisha nou buyu hisü velai tea tare. Elisha nou honapai laiyu zhingaolou khaie, puhnou puh kilai Gehazi hisü paoe, “Zhukhaio, Shunem hi maipfüpai sü laire! 26Honapai hisü thasho-a nou takou puh kipuo ae nahpoutu alia mai hrülai nou vei-a bubaimo-e tea noukhaio.”
Honapai nou Gehazi hisü vei-a bukhai toua baie, tea chila peie, 27ana honapai nou Elisha hi velouyu phaki, puhnou kaokou puh nghoujü nou puhye khurüloua puh phi sü kholoure. Gehazi nou honapaiye, khaolailai tea buyu hinou Elisha nou paoe, “Deipeiso, puhnou levea sho-a buyu sü ne ngaomovu? Ae Mapao nou halia ahi sü hai vanou paomoe.”
28Naotupai nou puh hi paoe, “Apaopuwo, Enou ne hi nahpoutu ali peio tea khovu? Eye panou hamako soua ahi areih sü pa bupeiso tea ne hi Enou paomowu?”
29Elisha nou Gehazi hilova reiloua nou puh hi paoe, “Thasho-a nou avei süüpo nasü poloua nou takhaio. Lududo hi maitaralia cha-a nou buso, hakinou mai nou neye keayuma, puletao hisü chila peihawua toulei tapoa ki hisü velou avei süüpo nanou nahtou vasü pokou khaipeio.”
30Naotupai nou Elisha hisü paoe, “Hriyu Mapao zhih hinou E chaachou soua paowe, süolouzü Enou neye koa tamoyu thaio, E talai moe!” Südonou Elisha nou honapaiye koa nou tare. 31Gehazi nou puhai jünou rai-a tave Elisha vei süüpo nanou poa nahtou vei pfüphao hisü khaipeie, ana hriyu vei shee aliro ngaomore. Südonou puhnou Elisha hi tapaloua nou paoe, “Nahtou nasü kaishu more.”
32Elisha nou velouyu phaki, puh vei kide hisü lah likhei pa nahtou naye zhuyu phaki, nahtou nasü züphao hinou thai-a buyu sü nagaoloure. 33Puhnou kikhu sü khuwua Mapao hi veachi paoe. 34Süthaisü puhnou nahtou vei phao hinou pa züloua puh mü nou nahtou navei mü hi ae puh ngheithou nou nahtou navei ngheithou hi ae puh bah nou nahtou navei bah hi khailoua dazü peikhaie, nahtou vei vasou hai lüpare. 35Elisha nou tashuloua kide nasü tasühao-e, ae puhnou dakhaikou nahtou na phao hinou dazüpu peie. Süthai hai nahtou nanou bakha anai shishaoshao-a puh ngheithou sü hepare. 36Elisha nou Gehazi ye kuloua nahtou vei pfü sü kukhaio tea paoe. Honapai nou veyu phaki puh hi paoe, “Ne nahpoutu sü hai hi bure, salo.” 37Honapai nou Elisha phi hisü nakou khurüe; süthaisü honapai nou nahtou nasü saloua tare.
Khupavah Souyu Kukhe Ahai
38Vuli teidei sühi tokaa shoyu teile hinou, Elisha nou Gilgal nuhdu hisü ve-e. Puhnou rachipaola peiyu maime aliye paodoupeia buyu teile hinou, puhnou puh kilai hisü tona phatoure donou lee adu ali hai mei pei shaokalou khaio tea paoe. 39Mai ali nou taho khaovu sü phouloure. Puhnou rekou buyu darkhabe ali ngaoloua puhnou pfülou süyu koupo sü phouloua nou pfüvere. Puhnou süsü dai-e touyu sümoa tonapha toure donou leasasa loua kholoure. 40Tona phakhai touyu nasü maikhe maiye panou toure donou khaithou peiwure. Ana puletao nou toutayu phaki, puletao nou Elisha hisü haibüa paore, “Tona phakhai touyu hai hisü maiye kaithare pou loure!” Südonou haisü toulou shire. 41Elisha nou khao hi khaitouyu tona sü poloua lee li hisü lathou peie, ae haibüa paoe, “Puletaoye panou toure donou khaithou peio.” Süthaisü khaojü bokhai touyu nasü vei-a baire.
42Süthai-a vuli Baal Shalishah hinou mai ali nou Elisha ye potei hi chachi raikayu hinou ngaolouyu thouthou nou soukhai touyu raokhao pho kai hai pove peie, ae thouthou daotu hai pove peie. Elisha nou sütao sü poloua rachipaolayu maime hisü peikhaio tea puhvei kilai hisü paoe. 43Ana puhnou chila peie, “Haitao tunou mai kaihli sü panou toulou süe tea ne tsüchowu?” Elisha nou chila peie, “Puletaoye panou toure donou poloua nou peikhaio, daiolouzü Mapao nou paowe, puletao nou sütao hai toulouyu thai-a lia nou bulai hie.” 44Südonou kilai nanou puletaoye sü touso hai peie, ae Mapao nou paopeiyu bütoua puletao nou toulouyu thai-a touso hai lia nou bue.
Currently Selected:
2 VEMAITO 4: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
2 VEMAITO 4
4
Elisha nou Touhayu Mimeapfüye Soukhayu
1Rachipaolayu maime hi louyu mimeapfü ali nou Elisha hi tave haibüa paoe, “Apaopuwo, nevei kilai achapuo hai thaitare, ae nenou puhye süwe süolouzü puh hai Ramai ye piyu mai ali-e, ana chuo puhnou maivei paohzho pfüa bue tea puletao nou tave paohzho pfüyu nasü poka loulai tea anahpoutu ahai sü puletao vei qila panou soure donou sapoa talai tea bure.”
2Elisha nou chila peie, “Enou neye donou dai soupeiyu ne jüpawe? Ne ki hi daidai bue touyu khesü ahi paokhaio.”
Mimeapfüpai nou chila peie, “Aki hio halia ha-e, oliv theadzü hai bvü titouli hinou daotu bua baie.”
3Elisha nou honapai hi paoe, “Nenou taho nevei kinapamai hinou bvü sayu khesü ngaolousü koute polo. 4Süthaisü ne ae ne nahpoututao nou kihikha talou loua kikhu sü khukhaio, ae oliv theadzü hai bvü sayutao hi lathou khaio. Ha bvü nasü phoure toulouzü, buh kukhe ali hi pokhailo.”
5Südonou honapai nou puh vei nahpoutu ahaiye sü saloua kikha hi louloure ae kikhu sü khuwure, süthaisü oliv theadzü thouyu bvü nasü poloua puh nahpoutu ahai nou pove peiyu habvü sayu hisü theadzü hai lathoure. 6Puh pfü nahmaitao nou ha bvü teitei hi theadzü lathou phoukhai toulouyu thai, honapai nou habvü sayu lia buhare tea noue. “Habvü sayu ali-a hazei toure,” tea puh nahpoutu ahai nou chila peie. Ae theadzü sü kükoupu more. 7Honapai nou rachipaolawo Elisha hi veyu phaki, puhnou honapai hi paoe, “Oliv theadzü taosü zholoua maipao pfüyu veishi hai khapeio, süthai-a ne pfü nahmaitao hai pousha lia nou bua hrüloulai.”
Elisha ae Shunem hi Toungiyu Naotupai
8Teithe ali Elisha nou Shunem hisü ve-e, ae nuhdu sühisü toungiyu naotumai ali bue. Honapai nou puhye puh ki hinou tave vai-o tea kuloure, süthaisü puhnou Shunem hi veyu chühai honapai ki hinou ve chao-a nou bua baiwe. 9Honapai nou puhvei kipuo hi paoe, “Ahai kihi ve zhazhayu mai haina hai sheeyu mai ali-e tea Enou louchewe. 10Ahai nou kide ali hai kipei hinou soupaloua zü, taibel, buh ae meivabvü thoukhai peiwua puhnou hai hi veyu chüsü panou chaolou laikhe.”
11Teitheli Elisha nou Shunem hi ve-e, ae puhnou puhvei kide na hisü pa so-a nou bue. 12Puhnou puhvei kilai Gehazi hisü taho naotupaiye kulo tea paoe. Honapai nou puh hi veyu phaki, 13puhnou Gehazi hi paoe, “Honapai nou ahaiye donou veasho-a haibüa bu-zü soupeiyu ae sheshe peiyu vanou Eye panou puhye donou daisou peiyu jüpawe touyu sü noukhaio. Puh thaosou taho veo hi moyuma reihmai peikhoyu maitao hi puhye donou chi paokha peire halia buha-e?”
“Enou avei maitao hrohinou hrüa nou bua baie, ae Enou jüpayu teitei hai buche-a baie,” tea honapai nou chila peie.
14Elisha nou Gehazi hi noue, “Sükulouzü Enou puhye donou dai soupeilai?” Puhnou chila peie, “Honapai hai nahpoutu ha-e ae puh cha hai tsüpare.”
15Elisha nou honapaiye hai hi kupoa pa-o tea kharochi peie. Honapai nou tapa kikhu hinou la-a bure, 16ae Elisha nou honapai hi paoe, “Daohkou chu teile phaki, nenou nahpoutu ali daopoa nou bulai.”
Honapai nou chila peie, “Oh apaopuwo, ne sü Ramai vei mai-e, ahi sübüa daso!”
17Ana Elisha nou paoyu thaifüa daohkou hai honapai nou nahpoutu ali naloure.
18Po daotu thaisü, chachiyu teile phaki, nahtou na hai puo hi holai tea dou hi tare, ae puh puo hai dou hinou chachiyu maiye koa vah soua nou bue. 19Süteile bü hinou nahtou nanou puh puo hi “Apei soulere! Apei soulere!” tea kra-a nou paoe.
“Nahtouye pfü hi sapoa vepeio,” tea puo nou kilai hisü paoe. 20Kilai nanou nahtou naye pfü hi save peie, ae nahtou nanou puh pfü vei nakephao hinou hea koute buloua nou thaitare. 21Süthaisü pfü nou puhye sü Elisha vei kide nahi sapaloua puhvei züphao hinou zükhaire ae kikhu khuwua nou tare. 22Süthaisü honapai nou puh chaye sü kuloua nou paoe, “Eye kilai mai ali ae rheisüh ali seive peio. E rachipaolawo Elisha hi holai hie, thalou süyu koute tha-a nou Esü dakhai ve-a bailai.”
23Puh cha nou haibüa noue, “Ne daisounou zhou nou talai tiwe? Zhou sü Soteithe moe, moyuma Khouh Ashu vei Khonüh nüyu teithe moe!”#4.23 soteithe...khouh ashu vei khonüh: Haibüa vepare khesü noure donou sheeyu teithe hinou taho rachipaola maiye chakuyua veikha-e tea maikhe mainou powe.
“Taivei-e,” tea honapai nou chila peie. 24Süthaisü honapai nou rheisüh phao hisü taopaloua nou puhvei kilai hisü paoe, “Taveilou süyu koute tavei takhaio, Enou paomo koute chaokhai touso.” 25Sübüa honapai nou Karmel Deichi hi Elisha nou buyu hisü velai tea tare. Elisha nou honapai laiyu zhingaolou khaie, puhnou puh kilai Gehazi hisü paoe, “Zhukhaio, Shunem hi maipfüpai sü laire! 26Honapai hisü thasho-a nou takou puh kipuo ae nahpoutu alia mai hrülai nou vei-a bubaimo-e tea noukhaio.”
Honapai nou Gehazi hisü vei-a bukhai toua baie, tea chila peie, 27ana honapai nou Elisha hi velouyu phaki, puhnou kaokou puh nghoujü nou puhye khurüloua puh phi sü kholoure. Gehazi nou honapaiye, khaolailai tea buyu hinou Elisha nou paoe, “Deipeiso, puhnou levea sho-a buyu sü ne ngaomovu? Ae Mapao nou halia ahi sü hai vanou paomoe.”
28Naotupai nou puh hi paoe, “Apaopuwo, Enou ne hi nahpoutu ali peio tea khovu? Eye panou hamako soua ahi areih sü pa bupeiso tea ne hi Enou paomowu?”
29Elisha nou Gehazi hilova reiloua nou puh hi paoe, “Thasho-a nou avei süüpo nasü poloua nou takhaio. Lududo hi maitaralia cha-a nou buso, hakinou mai nou neye keayuma, puletao hisü chila peihawua toulei tapoa ki hisü velou avei süüpo nanou nahtou vasü pokou khaipeio.”
30Naotupai nou Elisha hisü paoe, “Hriyu Mapao zhih hinou E chaachou soua paowe, süolouzü Enou neye koa tamoyu thaio, E talai moe!” Südonou Elisha nou honapaiye koa nou tare. 31Gehazi nou puhai jünou rai-a tave Elisha vei süüpo nanou poa nahtou vei pfüphao hisü khaipeie, ana hriyu vei shee aliro ngaomore. Südonou puhnou Elisha hi tapaloua nou paoe, “Nahtou nasü kaishu more.”
32Elisha nou velouyu phaki, puh vei kide hisü lah likhei pa nahtou naye zhuyu phaki, nahtou nasü züphao hinou thai-a buyu sü nagaoloure. 33Puhnou kikhu sü khuwua Mapao hi veachi paoe. 34Süthaisü puhnou nahtou vei phao hinou pa züloua puh mü nou nahtou navei mü hi ae puh ngheithou nou nahtou navei ngheithou hi ae puh bah nou nahtou navei bah hi khailoua dazü peikhaie, nahtou vei vasou hai lüpare. 35Elisha nou tashuloua kide nasü tasühao-e, ae puhnou dakhaikou nahtou na phao hinou dazüpu peie. Süthai hai nahtou nanou bakha anai shishaoshao-a puh ngheithou sü hepare. 36Elisha nou Gehazi ye kuloua nahtou vei pfü sü kukhaio tea paoe. Honapai nou veyu phaki puh hi paoe, “Ne nahpoutu sü hai hi bure, salo.” 37Honapai nou Elisha phi hisü nakou khurüe; süthaisü honapai nou nahtou nasü saloua tare.
Khupavah Souyu Kukhe Ahai
38Vuli teidei sühi tokaa shoyu teile hinou, Elisha nou Gilgal nuhdu hisü ve-e. Puhnou rachipaola peiyu maime aliye paodoupeia buyu teile hinou, puhnou puh kilai hisü tona phatoure donou lee adu ali hai mei pei shaokalou khaio tea paoe. 39Mai ali nou taho khaovu sü phouloure. Puhnou rekou buyu darkhabe ali ngaoloua puhnou pfülou süyu koupo sü phouloua nou pfüvere. Puhnou süsü dai-e touyu sümoa tonapha toure donou leasasa loua kholoure. 40Tona phakhai touyu nasü maikhe maiye panou toure donou khaithou peiwure. Ana puletao nou toutayu phaki, puletao nou Elisha hisü haibüa paore, “Tona phakhai touyu hai hisü maiye kaithare pou loure!” Südonou haisü toulou shire. 41Elisha nou khao hi khaitouyu tona sü poloua lee li hisü lathou peie, ae haibüa paoe, “Puletaoye panou toure donou khaithou peio.” Süthaisü khaojü bokhai touyu nasü vei-a baire.
42Süthai-a vuli Baal Shalishah hinou mai ali nou Elisha ye potei hi chachi raikayu hinou ngaolouyu thouthou nou soukhai touyu raokhao pho kai hai pove peie, ae thouthou daotu hai pove peie. Elisha nou sütao sü poloua rachipaolayu maime hisü peikhaio tea puhvei kilai hisü paoe. 43Ana puhnou chila peie, “Haitao tunou mai kaihli sü panou toulou süe tea ne tsüchowu?” Elisha nou chila peie, “Puletaoye panou toure donou poloua nou peikhaio, daiolouzü Mapao nou paowe, puletao nou sütao hai toulouyu thai-a lia nou bulai hie.” 44Südonou kilai nanou puletaoye sü touso hai peie, ae Mapao nou paopeiyu bütoua puletao nou toulouyu thai-a touso hai lia nou bue.
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.