Popular Bible Verses from 2 Tesalonaika 2

Share

Tie, temamalienming ga buat miairam teip ba meba mivanameng ma tiesiap ba maiam o ma tavukup ba maiam ume la o ina terigi ang Ila Kakani. Karuk. Memani, uriro la la namo ina terigiang Ila Kakani la eba tale betieng kakalait agarit. Karuk. Lake ka, papaluaip ma ekelesiap la eba gat tale nameng aime Morowa ga eba mialam ibup ma ira a Ila Kani ga iriro migana la ume oguek maimai ang Morowa, ga tubiat a iriro, eba bat ina terigiang Ila Kakani. Iriro migana la ume oguek maimai ang Morowa, namo saikang na iou.

Pa mimi ekelesiap papap tuam la mitara naong Ila Kakani me milam, mirier taraiap la pame agatpang me milam, ga pame pevo temaieng me aun Morowa me milam. Memani, tiralo migat la miteong ara meba ina milagiang Morowa na ubi ang Muranama Ila Babai la ume mibabaura ga iro nagan ming iro ties migat.

Eva, irie migana la eba nekaroala ga mirier inamaniap ganam la mime meivam morowap maiam ga mime lotu me mai. Eba tevienang ga onang na luguan ila kakani o lotu ang Morowa, ga eba ovaikang ties gare ro, “Turuo kan la turuo Morowa.”

Marikpang me ai Ila Kakani buang Iesu Karisito ga Morowa Ira buang meba mangangasliong dalap mi meba makosarming mirier ubiap mila mumurum ga miaramam tiesiap mila mumurum. Eva, iriro Morowa Ira buang, irie la ume na me bulam, ga iro ubonuvarap ang, ume mangangas dalap buo atatan makin ga bukosarong meba auanbula un nagan ga me pagap mila mumurum.

Met iriro muana ga eba asagaang Morowa paga ba meba obanbananang agat maiong, ga eba naganmeng iro ties o kakarabunim.

Na irie tara, irio migana o uguek o maimai la eba betang la uakap ga na kukunim ang Satan, eba makosarang non ara non ara pagap o turupnuabap o kakarabunim ga kaguma onim na panbinim ga pagap onim na panbinim la tale puomeng inamaniap meba makosarmeng. Miriro pagap mila kanim la makosarong, umei gare Morowa kan la makosarong. Pa karuk. Tale migat. Ga iriro migana ila kire la eba mavuvuoang ga mavanang inamaniap ma non ara non ara alangip. Miriro inamaniap, mirie la namo saikmeng na iou. Tie, na tara la eba betang uakap na irap ma inamaniap ga makosarang miriro non ara tavukup gare tiro, tie na irie tara eba ina terigiang Ila Kani Iesu na lalabie ula kanu. Ga eba ainiang kukunim ang iriro migana ila kire la ume oguek maimai ang Morowa ga eba anamung iriro migana o ifif o nanam a. Tie, miriro inamaniap la mime omeuluan ties ang iriro migana ila kire ga mime oguek ties ang Morowa, eba tale ina malagiang Morowa. Karuk. Memani, tale naganmeng iro ties migat pa mimet temeba maime tavukup mila kiram na irap a Morowa.

Eva, omit ara kukunim ang iriro migana ila kire la ume tigit ubi tinan ga muio puoieng titot. Pa kukunim ang Morowa titot la ime obunak alang ang iriro migana la man akosarang tavuk ila kire titot ga ila puoieng ira tara la eba ovugutara ubunak ang Morowa.