Popular Bible Verses from Galezɨya 5

Share

A'mweraavɨre sɨmunyabwina kayaa'na yadɨvɨta kɨrɨ' Gotɨyare Kuryai nemɨre sɨmunyanna maremwaaida yɨsɨla nawɨ'nyabɨsanna tewaanyainaavɨ nemwaaihɨvanɨkelyɨ. Sare' dara yadaanyasɨra. Pwaraavɨna kale neyada, sɨmunyangɨ yɨlaaya yadaa, kwaamu'nanyabwi yadaa, pwara kayaa'na neyadaapɨjɨ sɨnna tɨka yarai madayɨ neyade'na dɨragɨnyaina mwaidaa, bwiwanna yabwi yadaa, pwaraavɨ tewaanna wiadaa, sara wɨdadaanya yuyagaa' sara yadaa, kave yɨgoina nennya yaya mamakinyadaa, sɨmunya kayaa'nanya' “Aala,” dɨvanɨgoina dɨragɨnna maremwainadaa Kuryai nemwaaihadelyɨ. Sara yadaanyainaavɨ Kɨwɨnya yagaalyasɨ manejɨnɨkengɨ.

Da'na yɨhɨthɨvanɨge. Gotɨyare Kuryai sara kagɨthozɨ kuna sara ja! Sara ya'gɨzɨ gɨmɨre sɨmunya ayabwi mi jɨtheigɨnyɨ. Arɨkawɨ.

Sare' “Kuryarɨ mwaaiho,” daaza' yɨ nabaai Kuryarɨ kaanya yamaryaana! Gamɨre yagaalya' mɨdɨnaana!

Kɨraazɨtɨyai Jizaazareina dara yawɨ'manɨgo. A'mweinaavɨre sɨmunya dɨragɨnya myaannebwi Kɨraazɨtɨyare yɨsavɨri mi'na yeramwo. Sare'na kayaa'nanyabwi manemaremwaalyɨkeinera. Yɨ sɨmunya kayaa'na dɨka widadejɨ wima'nadejɨ yɨsavɨri mena yeramwo. Yuya dazabwi dɨvanɨgo. Aala! Sarebwi Kɨraazɨtɨyai balake'nanyɨ.

A'mweraavɨre sɨmunyabwi yuyaina yawɨ'manɨgovulyɨ. A'mweraavɨrebulyɨyara dara yadɨvɨsangɨ. Ata lɨmwangebwi yɨna. Yaawaryaraavɨrebwi yɨna. Gɨrɨkita'nanyabwi yɨna. A'mweraavɨ a'mwengɨ yaasɨwa'na kayaa'na lɨmwangebwi yɨna. Yɨsaraavɨ, sɨlaangeraavɨ, nyɨlyarɨ, lawerɨ, sɨlɨngaamɨnyaraavɨ a'mwa'mweraavɨ yɨlaayabwi yɨna, kulaka maarya'nebwi yɨna. Gɨri'nya, lakya, kwalya dazabwi yɨna. Yɨkamaangebwi yɨna. Maangebwi yɨna. Pwaraavɨre tɨganaarya yadɨvɨ' “Maa'mujainyɨ,” dɨna. Sɨnna tɨka wɨdaya'nebwi yɨna. Kunnya yaya makinyɨna yadɨvɨ', pwaraavɨna kale mwia'nebwi yɨna. Jaapaina yadɨvɨ' pwaraavɨ wanganakɨna. Kumɨjɨyaraavɨ bɨrala yadɨvɨ' “Nemɨ tewaanyaine,” dɨna. Pwaraavɨre naangengɨna “Maa'mujainyɨ,” dɨzabwi yɨna. Pwaraavɨ tamakɨna. Bɨyaaya saza nadɨvɨ' yɨmaka wɨlɨna. Nabaai bɨyaaya nyɨna kwarame kayaa'nanyabwi yɨna, avaanna kayaa'nanyabwi yɨna. Sara yadɨvɨsangɨ. Nabaai, sasarebura pɨburajɨ yadɨvɨsangɨ. Kɨgaa' gɨthevaaibɨ' dɨragɨnna ayɨna gɨthɨvanɨge. Sasare sabwi minna! Pwara saza yadɨvɨsaraavɨ Gotɨyai nayaa mamaremwaalyɨ yadera Gotɨyare yuyanna mamaari yɨpɨ'derera.

Sare' dare'nesɨ. Nya'mweigɨ, sahwaigɨnyɨ Gotɨyai gɨthahɨlaka' “Wɨla pwɨyɨnɨkerɨ yaarɨma!” Sara gɨthahɨlakaka sara kagɨzɨvwaramaara' tewaanna mwaaihɨnyaigɨnyɨ. Mi'na gɨthɨwe'na dara myawɨ'dɨnna! “O, Kɨwɨnya' manevwɨyɨnyɨka. Su! Su! Kɨlaakejɨkɨne yuya tewaanyajɨ kayaa'nanyajɨ yɨma!” Sara myawɨ'dɨnna! Sara myɨnna! Aawa. Gyaarakeigɨ ja'mweraavɨna kale gyada yaasɨwa'wawɨnyaigɨ wɨgaimwanna ja!

Sare' dare'nesɨ. A'mweina sɨmunya yawɨ'daanya' Gotɨyare Kuryai yawɨ'de' yaamɨjɨ dathɨwanna. Nabaai, Gotɨyare Kuryai yawɨ'de' a'mweinaavɨre sɨmunya' dathɨwanna yannesɨ. Sare' dare'nesɨ. Gotɨyare Kuryare sɨmunyasɨ a'mweinaavɨre sɨmunyasɨ yɨkamaangewaalyɨ. Sare'na Kuryai gɨthada gɨnnya sɨmunya' “Pɨbwi ja!” kagɨthozɨ sarebwi minneigɨnyɨ.

Sare' dare'nesɨ. Gotɨyare Kɨwɨnya yuyavɨ aaya kaavɨlya' dara dɨnɨke' “Gɨmɨ saigɨnyɨna kale gyadevaaibɨ' pwaraavɨna kale gyana! Duhaimwana!” Yɨ yagaala sahɨrɨsɨ.

“Nɨmɨ tewaanyainyɨ. Pwara kayaa'nanyarera,” madaanna! Pwara sɨmunya kwalaalya yawɨpɨ'de'na myaanna! Pwara kanevɨlavapɨjɨ bɨrala myaanna! Aawa. Kuryare dɨragɨnyavɨ mwalaana!

Nemɨ tewaanya dɨragɨnna mwaalya'neinaavɨna Kɨraazɨtɨyai bala'. “Yuyabura pwɨyɨnɨkeraavɨ yaarɨma!” daka nevadaihasamaara'. Sarevɨdaa'nyɨ kuna dɨragɨnna dɨthaaka! “Yaasɨwa'wawɨnyabulyainyɨ ayɨna nyɨma'nɨwɨdɨka!” da'gɨzɨ Kɨwɨnyabwi myawɨ'dɨnna!