Popular Bible Verses from 1 Koridɨ 15

Share

Nɨnnya nya'mweihi, sarɨmɨnyɨna tewaanya nyɨvu'nadeihi, sarevɨ sarɨmɨ nayaa dɨragɨnna dɨthaayɨla! Yɨ sangina maalɨ'na yɨbwaaya kɨrɨ' nyɨpɨdɨka! Sarɨmɨ Naangerɨ wawɨnya naange' yadɨvɨsa', sa' Naangerɨna kune' saba sana yɨwɨna yade' mɨ'. Aawa. Dɨragɨnya' waragothesɨ. Sarɨmɨ sara yawɨ'dɨvɨ' yuyagaa' Naangere wawɨnya sa' naanga naanga dɨragɨnna nayaa jɨla!

Sare kɨrɨ' nemɨ Gotɨyarɨ “Su! Su!” wɨdaana! Yɨ sahwai nemɨre Naangei Jizaazai Kɨraazɨtɨyarɨ neyavada'galanemwaaihaka nemɨnyɨne'na baryaburɨjɨ kayaa'nanyaburɨjɨ galavɨlawakakelyɨ. Yɨ sahwai sɨka sa' yanga nejaavanɨkelyɨ.

Akai, sahwara kwaasɨ kuna nayɨhɨthɨpɨdɨka! Dara jawɨrila! “Nemɨ a'mwe kayaa'nanyarajɨ ye'mwannayamaryadawaari yɨ sahwara nemɨre tewaanyabwi kayaaka nyɨgalakɨpɨdɨka!”

Sare kɨrɨ' Gotɨyai yanga gaimwanga nyadevɨ nɨmɨ mwaaiheinyɨ yɨ Apozelɨyainyɨ sareinyɨra. Yɨ gamɨre yanga gaimwange' nɨmɨnyɨne' yɨ sa' kune' mɨ'. Aawa nebulyasɨ. Sai nyɨgaimwadaa'nyɨ nɨmɨ wawɨnya dɨragɨnna mɨraagɨkɨreneinyɨ. Nabaai Apozelɨya pwaraavɨre wawɨnya mena wavɨlaveneinyɨ. Sare kɨrɨvɨ nɨmɨ sainyɨ myɨvanɨge. Aawa. Gotɨyare yanga gaimwange' nɨmɨjɨ nye'mwannamwaaida sa' sahɨrɨsa' yɨvanɨkesɨ.

Yagaala pɨrɨ' dara dɨnɨ' “Balyabwigɨ gɨmɨre sɨke' gava warɨka! Balyabwigɨ gɨmɨre tamakya'ne lɨsɨnnyarɨ' gavanaka!” Baryabure lɨsɨnnyarɨ' sa' kayaa'nanyabwi yadɨvɨsasɨ. (Yɨ daresɨ. A'mwera kayaa'nanyabwi yadɨvɨsa'na baryabwi naawɨnaanyaibɨsabwi yuna da'devulyɨ.) Nabaai kayaa'nanyabure dɨragɨnya' sa' Gotɨyare Kɨwɨnyasɨra. (Yɨ daresɨ. Gotɨyare Kɨwɨnya' a'mwera kayaa'nanyabwi yadɨvɨsabwi wibwarɨdaakwada kumɨrebwina kumɨnyɨne yɨwetawakya' dɨragɨnna wɨjalɨkurakadesɨ.)

Yɨthaanyi, sare'na Gotɨyare nebulya' yoimavajalɨkurakya' yɨhɨzɨwaakɨma! Yɨ nemɨ a'mwe yuyaina neina yɨma'nadaa balaadeina mɨ'. Nabaai kɨrɨ' yɨ nemɨ gaainakeinajɨ bainɨkerajɨ yuyaina, mudɨkeinaavɨ Gotɨyai nemwaaihadeine. Yɨme'nya'bɨ'na, yune tɨbaalɨku'nya pɨva'na yadehaa', aayagaa'ne gware' jaka dathehaa' sara yadelyɨ. Sare' darevɨdaa'nyɨnyɨ. Gware' jaka wɨdɨna kyojɨ a'mwe mena bainɨkeraavɨ bwia maburya'neraavɨ yɨdɨkaa'na yojɨ nemɨ gaainakeinajɨ yuyainaavɨ mudɨkeinaavɨ nemwaaihadeine.

Sare' darevɨnyɨ. A'mwei, Aataamɨ, yaakevɨ balyabwi wakyaa'. Yɨ a'mwei Jizaazai yakevɨ a'mwe bainɨkera ayɨna dɨkaaya'nebwi waka'. Yɨ daresɨ. Aataamɨre yɨta savaakɨre yuyara sahwara baidɨvɨtabaaibɨ' Kɨraazɨtɨyarɨ wɨlamwaaidɨvɨta yuyara sahwara gaalyabwi maapɨ'dere.

Sare' darevɨdaa'nyɨnyɨ. Dare' Gotɨyai dakakesɨ. Kɨlaaka bwia bu'de dazajɨ', sajɨ' yade nayaa yaraaibwa'nojɨ yuyagaa' bwia maburya'nejɨ' nebaazɨ'makwadezɨkɨ. Kɨlaaka baide dazajɨ', sajɨ' nayaa yade yaraaibwa'nojɨ yuyagaa' gaala mwaalagothezɨ' nebaazɨ'makwadezɨkɨ.

Sare' darevɨnyɨ. Kɨraazɨtɨyai kuna maremwaaladelyɨ. Gotɨyai gamɨre yɨkamaangeraavɨ gamɨre sɨvɨlyɨraaryaba galawɨlawakadehaa'na kuna maremwaaladelyɨ. Gotɨyai yuya yɨkamaanga pwaraavɨ mena marasɨ'nojɨ yɨ nabaai yɨkamaanga aayaangebwi barya kɨbulyɨ yasɨ'nadelyɨ.