Popular Bible Verses from ROMA 8

Share

Mapandayan takau ra ralalom ru ngaangai' baal manangampos i Aki Kapuuno' ra moonsoi risilo ondo' motogom Riso am ondo' piniau Nano maya' ra inatangan Nano galama'.

Mangintopot aku ra kolondo' makapanginga' ri Kristus monogom ritakau: iou pana kapatayan kapoam kaayagan; iou pana malaikat kapoam mangunguasa'; iou pana ondo' masauk raino kapoam ra orou matong no; iou pana kuasa' ondo' soroi ra rasawat kapoam ra ragana' ti; Kolondo' intor ra pinasauk no makapanginga' ri Aki Kapuuno' monogom ritakau koson ra pinakito Nano ralalom inggalan ri Kristus Jisus, Tuhan takau.

Suai poyo raginio Ambiluo ri Aki Kapuuno' mangindangan ritakau ondo' malawo pangintapatan. Kalo makapandai takau ati koson makiasi' ri Aki Kapuuno'; kaa' Ambiluo Nano galama' makitaak ri Aki Kapuuno' ra bala takau mabaya' ra ragu ondo' kalo masabit ru ulun.

Sabap raginio, atan boo paraguon takau? Amon ru i Aki Kapuuno' bala takau, osoi kia makagula' ritakau? Maaru' kolondo'!

Intor raginio, raino kalo boo ukumin ri Aki Kapuuno' ilo ondo' siminimpung ri Kristus Jisus.

Amon ru pamaguangan ondo' kinuasa' ru paliso ru ulun ayuk, baal raginio mangkinibit ra kapatayan. Kaa' pamaguangan ondo' kinuasa' ru Ambiluo ri Aki Kapuuno' magibit ra kaayagan am pabansayan.

Kaa' ralalom ru ngaangai' baal raginio kamanangan moowot takano maayo, sabap ra motogom i Kristus ritakau.

Intor raginio mangintopot aku ra ngaangai' kaimbalaan ondo' malimanan takau raino kalo sama' pogondoon ra katulayan ondo' paintalangon ri Aki Kapuuno' ritakau ra maagu no.

Mokoondo' kia makapanginga' ri Kristus monogom ritakau? Kapaganan kia? Pagalabaan kia? Kaimbalaan kia? Bitilan kia? Kunsikang kia? Baal makalalaa' kia? Kapoam kapatayan kia? Maaru' kolondo'!

I Aki Kapuuno' ondo' makapandai ra ngaangai' ru guang ru ulun, makarati' ra kitaakon ru Ambiluo Nano. Sabap ra maya' ra kasagaan ri Aki Kapuuno' galama' makitaak Ambiluo Nano ri Aki Kapuuno' koson ra ulun Nano.

Ngaangai' ulun ondo' tingganayon ru Ambiluo ri Aki Kapuuno', ilo no anak ri Aki Kapuuno'.

Ilo ondo' maayag maya' ra paliso ru ulun mampakaatang ayuk atan ondo' kasagaan ru paliso nilo. Kaa' ilo ondo' maayag maya' ra Ambiluo ri Aki Kapuuno' mampakaatang ayuk ra atan ondo' kasagaan ru Ambiluo no.

Kalo iningaan ri Aki Kapuuno' Anak Nano galama', kaa' pinoloso No Io potoyon koson ra kaatangan takau. Amon ru pinataak No Anak Nano ritakau, maaru' mangani' Io poyo ritakau ngaangai' ra bokon.

Intor raginio Ambiluo ri Aki Kapuuno' mabaya' ra guang takau mindagu ra itakau noyo anak ri Aki Kapuuno'. Sabap ra itakau noyo anak ri Aki Kapuuno', makaapu takau ra barakat Nano ondo' inula' No ra ulun Nano. Mabaya' ri Kristus, makaapu takau poyo ra atan ondo' inula' noyo ri Aki Kapuuno' Riso. Sabap ra amon ru itakau makaaya' maimbolo' koson ri Kristus, makaaya' takau niayuk katulayon koson Riso.

Ulun ondo' pamaguangan nano kinuasa' ru paliso ru ulun mantula' ri Aki Kapuuno', sabap ra kalo gumagaya' io ra ukum ri Aki Kapuuno' am sotopot no kalo magagaya' no ukum raginio.

Ra ngaangai' ondo' pinasauk ri Aki Kapuuno' maginaa ra guang moondom paat ri Aki Kapuuno' mampatalang osoi anak Nano.

Sabap ra mapandayan takau noyo saboi raino ngaangai' ondo' pinasauk ri Aki Kapuuno' maguros am malimanan ra maruol koson sangulun ruandu' paat io matipaganak.