Popular Bible Verses from Pilipai 2

Share

Ebema꞉ la꞉ magumulo idite ebe a꞉ka꞉tuwa꞉ ebe kapiya malagidilo tanalone o amama tanalone tanalo idi ako-osiyodilala꞉, wiyasiya modobola la꞉ a꞉ka꞉tuwa꞉ la꞉ opamo eba alomonalo, la꞉imano tepo magumuno wokilo nanitabokobi midipi epetapi kawokawopima꞉ na꞉midilinakiyala꞉. Ebene la꞉ magumulo idite ebe a꞉ka꞉tuwa꞉ ebeno tanalo kapiya akomalagidilonakala꞉, ao, ebete wiyasiya epetapino modoboa꞉ tanalo ebeno modoboa꞉ tanalago kapimiya nulamenakomene.

Ebe mabuma꞉ modobola Ya꞉su Kelisokono tepo magumulo ditana, ebe atu nilakapo wokino tanalote la꞉ magumulo woko nosiyodilonamene.

Ebete dopamo Godokono ololo kapiyamo okolinami, wiyasiya a walubi tete da꞉pemaigiya, ebe a꞉ka꞉tuwa꞉ ebeno tanalo kemalagidiloma꞉ ebete Godoma꞉ deda꞉na ebe tanalo kodakodalo katila꞉niya꞉. Ebete wiyasiya ebeno kawo elawodawano okoli bai balamo kalakalago eba iyatilo, ebete me opo lumagima꞉ eda꞉te epono ololamo atamo ebo pawokaliya, iyo, ebete wiya꞉ wokodawano ololamo pemaigiya. Ebene ebete ebe a꞉ka꞉tuwa꞉ opamo eba iyatinalo ebeno Nabiwino ubi tanalamo ebo tuduwatanaki, ebema꞉ ebeno tuduwata magumulo ebete ebeno a꞉e tanaloma꞉ modoboma꞉ giya, iyo, ebete kewa olotolowalo kawokawo temeteme gito uwatiya.

mabu kalakala kawonomola, Godote la꞉ magumulo ebeno woko bosiyodilona, iyo, ebete la꞉tamo wade tepo magumuno woki ega꞉walo elawo nikalamenata la꞉le ebeno ubi tanalamo ka꞉tudila꞉wenama꞉!

Me mabuma꞉ Godote ebe ununomamo adipatete wade mailonomo idi ebetamo ebo ikamiya, ebe mailono elawote mailo epetapi bilibilinomono elawo nodoilina, iyo, ebe mailo ebe Ya꞉sutela! Ebema꞉ piyate Unu Duliyomololo ega꞉walo me opolo ega꞉walo damela magumulo dilukuliona, ibi bilibilinomate ebe amamatema꞉ pupamo pilukulite, iba꞉te Nabiwi Godoko eba moiolo awokala negelanakoma꞉na꞉, Ya꞉su Kelisoko kapiya ebe Kawodawanomola.

Ebema꞉ la꞉imano osiyodilole tanalo bilibilinomo magumulo epetapiate epetapiatamo ubia꞉ tabo gela꞉no akoapaminateuinakala꞉. Ma kunu me opo epate kawokawo kuba osiyodilolepima꞉ eda꞉ote kalawikalawi gabodo eba tolamenalo, la꞉ wiyasiya Godokono wadewade gudima꞉ beda꞉onamata, iyo, la꞉godolo kuba osiyodilo tanalo idi ega꞉walo daleya wokino tanalo da꞉peso idite a꞉kitanamene. Ebene la꞉le epatamo Godokono igilo tabo dikalama꞉wenakoma, la꞉le ebeno aloma꞉ eba eda꞉onalo me opo ba꞉pukuiminamata, mawelete tobolo unulo da꞉pola꞉na keba kunula꞉ka꞉ eba kunu. Me mabuma꞉ nale Kelisokono Uwomu Egelalo me tanalo kiyatawamamo, nale kebe woko la꞉ magumulo kosiyodilonaimo ebe kodakoda woko magumune wadewade da꞉ima꞉te nanitabolo a꞉pemaimiya, iyo, nale la꞉ mabuma꞉ ebema꞉ kamamamamo.

Ebema꞉ naimano wadewade namutupiala꞉, dopamo na la꞉imano duliyomololo eba okolinalo la꞉ naimano tabamo keba kunu ka꞉tudila꞉wenakima, modobola nale okolina꞉no tetelo la꞉le eba kunu na꞉kowagelenala꞉, iyo, la꞉ naimano iyatulame tanalamo tudila꞉oma꞉ la꞉imano woki kawonomamo niyatinakiyala꞉. Ega꞉walo Godote la꞉tamo dikalametia, ebe igilo mula꞉ tanalono uwomu tanalo nanitabolo laema꞉, modobola la꞉ la꞉imano wokilo ebe tolemelo unamo eba adipatelo woko wadenomamo nosiyodilonala꞉