Popular Bible Verses from Epesese 5

Share

Nanitabola, la꞉ Godote kawonomamo demalagidiloletana ebe gudilata, ebema꞉ modobola la꞉ la꞉imano ilukuli magumulo ebe keba kunula꞉ka꞉ ebako epoma꞉ neda꞉onala꞉. Numa꞉la꞉, Kelisote a꞉e magumulo ebeno ape kalimagono inamabu keba kunula꞉ka꞉ eba kunu midite ebeno igilo a mabuma꞉ Godotamo dikamiya, Godote ebe tanalo wade nibo inamabu ikame tanaloma꞉ giya. Ebe mabuma꞉ Kelisote atamo ebeno kawo nilakaponomo keba kunu kawokalimiyale, modobola la꞉ eba kunu atu nilakapo magumulo nilukulinala꞉.

Ebema꞉ modobola la꞉ mulo woki epoma꞉ eba eda꞉onalo la꞉imano osiyodilole tanalo wadenomamo nemalagidilolenala꞉, iyo, muloa꞉ epo akoibamilatela꞉la꞉. Numa꞉la꞉, me opo kawonomolo me tete nanitabokobi midia꞉pino kuba osiyodilole tetema꞉ eda꞉na, ebema꞉ Godote kebe wadewade tete la꞉tamo dikalametanaka, modobola la꞉ ebe iyaiya tetelo wade walubi tanalo epatamo nosiyodilolenakiyala꞉.

Ega꞉walo me tanalo idila. La꞉ elawo gala꞉ipi da꞉imi obo kawiya akoniala꞉, mabu la꞉ eba kunu dowagela꞉ema, la꞉imano nio tetelo daedalema꞉ eba eda꞉olo la꞉ a꞉ka꞉tuwa꞉ la꞉ ebo ka꞉kubailaemamota. Modobola la꞉ wiyasiya Godokono Uliyanano tanalo kawiya na꞉nionakiyala꞉, ebete la꞉imano tepo magumu wadenomamo ketabokailaema꞉. Ebema꞉ la꞉ la꞉imano tepo magumulo iyaiya oale alapio tanalamo Godoko wadenomamo namamatenakiyala꞉. Iyo, ma kunu Godokono Bukano Sam Oale bukalo da꞉pola꞉na ebe oale, ega꞉walo nanitabokobi midipiate Godokono anoano tanalo awokalilaema꞉ dosiyodilolenaka ebe oale, ega꞉walo ebeno Uliyanate la꞉imano tepo magumamo dalomonako ebe oale, la꞉imano iyaiya tetelo epetapiate epetapi ebe iyaiya oaleno tabamo eba waluba꞉tiuilo la꞉imano Kawodawatamo balapionakomata. Ebene la꞉le aimano Kawodawa Ya꞉su Kelisoko waloma꞉ta tanalo kawokalima꞉ema꞉, modobola la꞉imano ilukuli magumulo kebe iyaiya tanalate la꞉tamo ka꞉pemaimione, la꞉ ebe tanalo bilibilinomoma꞉ Nabiwi Godotamo kalakala tabo nowadipalatelenakiyala꞉.

Ebema꞉ la꞉ daedale epoma꞉ eda꞉oa꞉no, wiyasiya Kawodawa Godote la꞉le kosiyodilola꞉ema꞉ ebeno ubi tanalo keba kunu kiyatinale, modobola la꞉ ebe iyaiya tanalo wadenomamo niyatawaonala꞉.

Wiyasiya nanitabokobi midipi dubala꞉, la꞉ me kawo tanalo idi akododomatiala꞉. Kelisote sosi epo nilakapolo eba malagidilolenalo ibi mabuma꞉ ebeno igilo iyabaiamo keba kunu kiyatiyale, modobola la꞉ eba kunu la꞉imano kamiyale nilakapolo nemalagidilolenala꞉.

Nanitabola, la꞉ dopamo idoko magumulo ilukulinaimata, wiyasiya la꞉ idoko magumune pemaimiawete me tetelo aimano Kawodawano alo magumulo ilukulinamata, ebema꞉ la꞉ alono gudima꞉ eba eda꞉onalo modobola la꞉ alo magumulo wadenomamo nowapata꞉lamenala꞉.

Ebema꞉ nanitabokobi midipiala꞉, la꞉ Kelisotamo eba tudila꞉olo, ebe unamo kadipata꞉ema꞉ modobola la꞉ magumulo idite iditamo nilakapolo na꞉tudila꞉onakiyala꞉.

Ebema꞉ modobola la꞉ nanitabokobi midipi kamiyala꞉te la꞉imano awiatamo na꞉tudila꞉onakiyala꞉, la꞉le Kelisotamo keba kunu ka꞉tudila꞉wenama eba kunu.

Ebema꞉ la꞉ naimano dopo iyatulame tabo eba lawelo, me netewa kawokawo tanalo atumu na꞉kemalagidilola꞉la꞉. Dubute ebe a꞉ka꞉tuwa꞉ ebe keba kunu kemalagidilonale, modobola ebete ebeno kamiyale eba kunu nemalagidilonamene, ega꞉walo kamiyalete ebeno tepo magumuno wokilo ebe a꞉ka꞉tuwa꞉ ebe opamo eba iyatilo ebeno awi unamo nadipatenakomene.

Ebene Godokono Bukalo tabo idite ma kunu itana, “Me mabuma꞉ dubute ebeno menokola nabiwila miyapate ebeno kamiyala꞉go kapiyama꞉ keda꞉mene.”

Ebe mabuma꞉ piyate idoko magumulo dilukuliona, la꞉ ebe epono osiyodilole tanalamo iba꞉go akokapiyala꞉, mabu ibino osiyodilole magumune wade da꞉imi idite kapemaiganakoa꞉. Modobola la꞉ wiyasiya Godokono alamo ibino osiyodilole tanalo na꞉pukuilamiyala꞉, epo epetapiate ebe kuba tanalono temeteme magumu wadenomamo kuima꞉