Amae jare aecha ɨvɨtuguasu kotɨ güi ou ɨvɨtuai yavaetegüe; jare metei amapɨtu tuicha vae güi oë tata jendɨasɨ vae, jare iyɨ́vɨri jembipeasɨ yae vae. Jókuae tata mbɨte pe oyekuaa jembipe, metei jiero iyu vae oyepiro yae rami vae, jare jókuae tata jembipe vae mbɨte pe aecha irundɨ mbae; oyekuaa kuimbaeecha vae. Metei ñavo güɨnoi reta irundɨ jova jare irundɨ ipepo; itɨma reta isɨmbi, ipɨ toro taɨrusu vae ipɨ rami, jare jembipeasɨ yae jiero iyu vae oyemoembipeasɨ vae rami. Irundɨ ipepo reta igüɨ ñavo pe, güɨnoi kuimbae ipo, irundɨ iyɨke re. Jova reta jare ipepo reta güɨnoi irundɨ iyɨke re. Ipepo reta pe oyoupitɨ ïru ipepo reta ndive. Oguata yave mbaetɨ oyerova ye, jaeño ojo jenonde kotɨ.
