Popular Bible Verses from Erubasa 4

Share

Purungi nu pekeventayi is diyà te isip nu, su ke hengkey is ed-is-isipen nu, iyan daan egkeveelan nu.

Ikula nu is hustu he zalan su para wazà mezaat he egkeulaula kenikew.

Iselikwey nu is mezaat wey is mahawag he kegkaǥi.

Is ketau etawa is kedsavut iyan utew impurtanti he kinahanglan te etew, umbe penigudu ka wey nu maangken heini minsan maamin pa is langun he azen nu.

Is kebpengungubpaan te menge etew he metazeng ne igkepetug-iring te aney en he kedsilà te andew ke egkepawà he ebmerayag taman te meudtu. Ne is kebpengungubpaan mulà te menge etew he mezaat is menge ulaula zan, igkepetug-iring te utew merusirem, ne kenè dan egketuenan ke hengkey is hinungdan te kegkezeeti kandan.

Kenè nu iselikwey is ketau, kekenà, mahala nu heini su iyan heini ebantey wey ed-elima kenikew.

Pekezeseni nu te egawed is penurù ku; kenè nu ituǥut he maawà diyà te kenikew, pekeventayi nu su iyan heini untung nu.

Kenè nu iringi is menge vaal te menge lalung.

Menge anak, purungi niw pemineǥa is menge penurù te amey niw, su wey zuen niw metueni.