Popular Bible Verses from Zatù 16

Share

Mibensag si Delila te, “Samson, duen menge Filistihanen he nekeuma su edekepen ke zan.” Ked-enew ni Samson kunaan din ke ebpekaawà sikandin pinaaǥi te kebeeli zin te iring duen te nehuna he mibeelan din. Wazè din metueni he mid-ewaan en sikandin te NENGAZEN.

Dutun nengemuyù si Samson he ke sikandin te: “He Nengazen he MEGBEVAYÀ, tentenuzi a kenikew. Emun egkehimu ilikù nu is desen ku minsan kesevaha zà su wey a mekevales te kedluǥita kayi te menge Filistihanen te menge mata ku.”

Umbe, migkaǥi zin en duen te vahi is tutuu. Ke sikandin te, “Wazà meǥuntingi is bulvul ku minsan kesevaha. Minsan hein ikeǥingey e pa, mibpeveyveyaan ad te Megbevayà pinaaǥi te kedhimuwa kedì he Nazareo. Umbe emun egkeǥuntingan is bulvul ku, egkeiring dà is desen ku te zesen te zuma he menge etew.”

Andew-andew is kebpenginginsà dutun te vahi ki Samson ne hein neuǥet kenè en sikandan ebpekaantus.

Nengulahì sikandin te, “Ituǥut nu he mebpatey a zuma te menge Filistihanen!” Ne intukù din haazà is dezuwa he tukud he mid-amin din is desen din, ne nerundusan dutun te simbahan is menge pengulu wey is langun he menge etew zutun. Edhuna pa he mahabet is nepatey zin dutun he timpu kenà te nepatey zin hein uuyag pa sikandin.