Popular Bible Verses from Loma 1

Share

Tetela nina 'ana guguya manuna nigeya yada omayamaya, manuna Yaubada 'ina waiwai 'ena 'imiyami be 'enega 'abo yaisigedi taudi siemisa 'ida 'etoseyedi, ta nugana 'abo'ama me Yudia 'emaya, ta 'enega muliyega 'omi nigeya me Yudia 'emiya.

Ona'ai'aila, tetela gete 'ie'iteda 'aene 'ida emisa namo 'enega Yaubada 'ida 'awa palupaluyeda. Manuna Buki Tabu wate 'ina simana nadigega, 'igwae, “Topalupaluyao 'idi emisega yawasidi sida loba.”

Ta Yaubada tauna nigeya tada 'itena, ta esi bale'u 'ana mweluluwa'unu 'enega ga batuwa 'ina waiwai miyamiya atayana tamwalamwalatoni, 'ina mweluluwao 'ediyega, ga tamwalatonina tauna Yaubada. 'Enega tuta nina 'ie'ewadi me bale'u nigeya 'ebweu wate 'idi 'ebe onamo.

Manuna simwalatonina tauna Yaubada, ta nigeya sida 'amayabena be 'enaya sida lokagutoki, ta esi sikwanikwani ta sinuwanuwa besobeso, 'enega guguyoi 'atedi 'iloemaedi.

Gete 'enega e'ita 'ai'aila Yaubada manuna siguitoyasena ta kabo 'enega sisa'u gelasena, ga Yaubada 'ina mwelumweluluwao 'ediya sibwagobwago, ta Tomweluluwa nina siguitoyasena, tauna 'ana tupu miyamiya atayana. Eimeni.

Ta Yaubada wate galewega 'ina gamwasowala ni'atu 'ie'itaena taudi tobubuna geyogeyoi maibo'adi 'ediya, manuna taudi 'idi bubuna to'umalina 'ediyega bubuna palupaluna si'eto'etobode.

'Enega Yaubada 'ediya 'itagwala be 'idi yalakwaiyao to'umalidi sida guinuwedi, be iine nigeya loelata 'ana bubuna 'ai'ailega sida tauya, ta mali bubuna to'umalina, nate iine be iine ma'ediyao, siguiguinuwa loegesi. Me'olotodi wate iine ma'ediyao nigeya sida guinuwena, ta 'oloto esi ma'ediyao siyaledi sinabwana 'enega ma'ediyao loegesi 'ebe omayamaya siguinuwedi. 'Enega bubuna geyogeyoi 'ana e'isa to'umalina taudimo bwaladiya silobaloba. Gote 'enega geya nuwadi Yaubada 'ana mwalatoi, 'enega Yaubada 'ediya 'itagwala be nuwanuwa to'umalidi 'iloemaedi, 'enega yage nidi nigeya 'ilobwelobwenedi ta tuwa tuga siguinuwedi.

Ga taudimo si'awa sinasinapuyedi, ta esi uwauwadi. Manuna Yaubada miyamiya atayana siguitoyasena, ta mali 'ebe emisao sisa'u gelasedi ga 'idi tokwalui sibubudi, 'adi 'ita tomota nai manuwa nai yobai nai yobai kawakawalidi nadigega, be tokwalui nidi 'ediya sibwagobwago.