Popular Bible Verses from 1 Peˍtruˆ li‸ 3

Share

Nawˬ hui ve nyi ma awˬ hkʼaw lo Hkri‸ hta‸ Jawˇmawˇ yoˬ teh‸ shawˍ taˍ leh yawˆ yan-o. Nawˬ hui dawˇ law taˍ ve awˬ lawn, hkʼa na nyi laˇ ve chaw teˇ hpaˍ hta‸ hkʼaˬ hkʼe yaw hkʼaw‸ piˇ tuˬ, hkʼa deh‸ gu taˍ-o‸. Ya‸ hkʼaˇ, nyi ma nuˇ nehˬ leh yawˆ yan ve awˬ hkʼaw lo te-o. Nawˬ hui shiˍ puiˉ ve nyi ma hta‸ kehˬ lehˍ cawˬ piˇ-oˆ. Oˇ hkʼe te ve kʼo, Hkri‸ awˬ hkʼaw lo nawˬ hui te ve da‸ ve awˬ liˇ awˬ hkʼaˇ teˇ hpaˍ hta‸ hkʼaiˉ leh venˇbaˆ taˍ ve chaw teˇ hpaˍ lehˬ, gʼa ya‸ taw tuˬ yoˬ.

Awˬ lawn kʼo, Jawˇmawˇ Gʼuiˬsha ve mehˆ shiˍ lehˬ, hteˇ ve cawˇ ve chaw hui hta‸ nyi chehˇ ve yoˬ. Yawˇ ve naˍ paw htawˇ, yawˇ hui ve bon lawˬ hkawˇ hta‸ na chehˇ ve yoˬ. Ya‸ hkʼaˇ, Jawˇmawˇ Gʼuiˬsha lehˬ, awˬ haiˬ hkʼa te ve chaw teˇ hpaˍ hta‸ yawˇ ve canˇ paˍ yoˬ teh‸ shawˍ taˍ ve yoˬ.

Nawˬ hui awˬ hkiˇ shawˍ ve lehˬ, uˉ hkeh mvuh hpeˇ ve, shi hkʼeun tcuhˉ ve, veu‸ jiˇ kʼaˇ jiˇ ve, awˬ hta‸ hpawˇ awˬ hkiˇ shawˍ ve ceh taˇ hpeh‸ piˇ. Ya‸ hkʼaˇ nawˬ hui awˬ hkiˇ shawˍ ve lehˬ, nyi ma nuˇ nehˬ ve leh gawˬ lehˍ chehˇ puiˉ ve, awˬ hkʼaw hpawˇ awˬ hkiˇ shawˍ ve teˇ ceuˬ hpeh‸ piˇ-oˆ. Awˬ hkiˇ shawˍ ve chi teˇ ceuˬ lehˬ, maˇ luˬ puiˉ leh, Gʼuiˬsha mehˆ gʼuˇ suhˍ awˬ hpfuhˇ hkʼaˆ jaˇ ve yoˬ.

A sha‸ te‸ gaˇ leh, ha lehˬ dawˇ sha ve awˬ nyi teˇ hpaˍ hta‸ mawˬ gaˇ ve chaw lehˬ, a shu yawˇ ve ha tehˍ haiˬ ve hkawˇ hta‸ taˇ yaw. A shu yawˇ ve meuˇ guiˬ heˍ ve hkawˇ hta‸ ka‸ taˇ kʼoˆ. Haiˬ ve hta‸ jaw kʼai leh, da‸ ve hta‸ te-o. Cawˇ da‸ hui da‸ ve teˇ ceuˬ hta‸ ca leh, oˇ ve awˬ hkʼaˇ suh gʼa‸ kʼai-o.

Awˬ leh meuˇ ve tawˇ lehˬ, nawˬ hui hkʼa peu-eˬ nyi ma teˇ shiˍ tiˉ taˍ-o‸. Awˬ viˉ awˬ nyi teˇ gʼaˇ leh teˇ gʼaˇ ha kʼaˉ da‸ leh ha‸ da‸-o‸. Nyi ma nuˇ lehˍ te leh, shu awˬ hawˉ lo nyi ma nehˬ lehˍ taˍ-o‸. Shu awˬ haiˬ te laˇ ve htawˇ, awˬ haiˬ taˇ kʼaw‸ te hkʼaw‸. Shu hkʼa mvuhˇ hkʼa na kʼoˆ laˇ ve htawˇ, hkʼa mvuhˇ hkʼa na taˇ kʼaw‸ kʼoˆ hkʼaw‸. Ya‸ hkʼaˇ, yawˇ hui hta‸ na‸ piˇ-oˆ. Nawˬ hui awˬ bon gʼa tuˬ, chi ve awˬ pon Gʼuiˬsha nawˬ hui hta‸ kuˬ yuˬ taˍ peuˬ.

Nawˬ hui da‸ ve hta‸ gʼaˇ hte‸ te chehˇ ve kʼo, a shu nawˬ hui hta‸ ca ya‸ la tuˬ le.

Haiˬ ve hta‸ jaw kʼai leh, da‸ ve hta‸ te-o. Cawˇ da‸ hui da‸ ve teˇ ceuˬ hta‸ ca leh, oˇ ve awˬ hkʼaˇ suh gʼa‸ kʼai-o.

Gʼuiˬsha nyi ma cawˇ ve kʼo, da‸ ve hta‸ te leh tu‸ ve hkanˍ ve hta‸ gʼa hkanˍ ve lehˬ, haiˬ ve hta‸ te leh gʼa hkanˍ ve a‸ kehˉ leuˉ leh da‸ ve yoˬ.