Popular Bible Verses from JU AMAVASALACALH 3

Share

Pus ju yuchi ju xaquima'ats'okni ju ani alhiqui ma ya lacamalhtich lhimakspa' chai xak'alai ju tanun pulacni. Chai ni xamati' cak'asmatniya' ju ixchivinti chai camalhtek'anilh pus ju yuchi ma catanuya' chai ma cat'avenach.

Ju yuchi ma c'atsai tuch'i naviyat'it. Pus ju uxijnan ma jantu ixlhichux ju mi'alhunut'an ju lhilac'ap'imp'ut'unat'it ju yuchi. Nin yuchi ni ma amac'omp'ut'ut'it ju macxcai. Pus ma palai k'ox ca'ixva ni lana ixlhilac'ap'it'it ixlhichux mi'alhunut'an. U lana asamak'ant'it. Para ju uxijnan ni jantu ixlhichux mi'alhunut'an ju lhilac'ap'imp'ut'unat'it pus ju yuchi ma vachu' catasamak'ananch.

Pus ju yuchi acsni vasalh mapaini tam xamati' pus ma k'aji acsni jantu sok an chai mamak'alhk'ajni. Pus ma yuchi talhijunan ni ixlhichux ju mi'alhunut'an tamch ap'ast'act'it ixlacata tuch'i naviyat'it.

Pus ju yuchi ma c'atsai tuch'i naviyat'it. Pus ma tamalhtek'anitan ju malhtich junta lai ch'alhc'atnanat'it chai ma jantu lai xamati' catamalacchoniyan. Chai ma c'atsai ju yuchi ni tachapun unt'at'it lacats'unin. Chai mas va chunch unt'at'it para lac'a'it'at'it ju ixchivinti chai jantu tavanan nont'at'it ni jantu ixlapanacni unt'at'it.

Pus va tichi chavaich ju casast'uc'a' ju macxcai ma calak'a'icana' ni cat'atola' la'ixpu'ucxtin ju xaquima'ats'okni ju ani chivinti tachi ju yuchi ni sastuclh ju macxcai chai t'avi ju ixpai ju la'ixpu'ucxtin.

Pus ju uxijnan ma nonat'it ni na mak'alinin unt'at'it. Ma nonat'it ni na lhu ju mak'aixt'okt'at'it ju mimak'alit'an. Chai ma va nonat'it ni jantu tu'u' maktasq'uiniyat'it. Ma chunch ju nonat'it para ma jantu mach'akxayat'it ni Dios talakts'inan tachi ju lana na mak'alhk'ajnanat'it chai paini'itnich unt'at'it chai quilhpatinin unt'at'it chai alak'ach'ixnin unt'at'it chai lana matich ju mimpumpu'an.

Pus ni ma xalac'a'iyat'it ju ixchivinti ju xaquima'ats'okni ju ani chivinti chai xach'ixk'oyat'it ju macxcai pus ju yuchi ma vachu' catalhist'ac'an acsni ca'alina' ju mak'alhk'ajnat ixlhilacaputs'un ju lacamunutpa'. Ma yuchi calhi'alina' ju mak'alhk'ajnat ni ma calakts'intanucanach ju lapanacni ju tat'ajun ju ani lacamunutpa'.

Pus ma jantu mak'an cajuna' tus caminchokoya' ju yuchi. Pus ma alac'a'ik'alhit'it tuch'i xt'aknic'ant'at'it. Ju chunch ma lai amak'alht'ayanana'it'it ju mintalhaja'an mi'akstu'an. Jantu va ak'antam caxtaknicalh.

Pus ma alacp'uc'uch'ok'ot'itch. Chai ma ala'akt'ai'ut'itch ni tachapun a'unch'ok'oya'it'it. Chai ju chunch ma jantu ac'apk'alhiya'it'it ju Dios. Ma chunch ju alat'it ni lakts'inta ju tuch'i naviyat'it ju xaquima'ats'okni ju ani chivinti. Chai ma najun ni jantu soknic'a lhiulai ju Dios tachi ju naviyat'it.