Popular Bible Verses from Filipenses 2

Share

A³li² cˀoa⁴ to⁴chˀao³ntai³ mao³. A³li² cˀoa⁴-jin² to⁴ncˀa³ta³con² mao³. To⁴sa³ cjoa⁴yo⁴ma⁴ cjia³ta³con²³ nca³ cho¹son²-ni³lao⁴³ nca³ xi³cˀa³ nqui²sa⁴ nta³ ma³-le⁴ cjoa⁴ xi³ tjin¹ cao⁴-ni³ tsa² jon². A³li² coi²nta⁴-jin² nˀiaon²³ xi³ to⁴tsaon⁴³ cjoa⁴, to⁴nca³ cˀoa⁴-ti⁴ tˀiaon⁴³ coi²nta⁴ tsˀe⁴ xi³ cja⁴ˀai¹ cho⁴ta⁴.

Ca²ta³sˀe³-no³ nca³ jon² jña³-le⁴ cjoa⁴fa³ˀai³tsjen³ xi³ qui³sˀe³-le⁴ Cristo Jesús.

Je² Cristo nta³ tsa² ma³nco¹son² cao⁴ Ni³na¹, coan³jyo³-le⁴ nca³ qui³tsjion³tˀa³ yao³-le⁴. Qui³tsjion³con³ yao³-le⁴, to⁴cho⁴ˀnta³ tsa³ve³con³ yao³-le⁴, cˀoa⁴ cho⁴ta⁴son³ˀnte³ coan³. Cˀia⁴ nca³ je³cˀoa⁴cji³ jo³-ni³ jnco³ cho⁴ta⁴xˀin⁴, qui³si³cˀa³jen³jta³ yao³-le⁴, qui³si³tjo³son²-ni³ nta³ tsa² cjoa⁴vi³ya³, nta³ tsa² qui³ni²cˀen³tˀa³ cro².

Je² Ni³na¹ nta³ ti¹si¹xa¹jin³ ni⁴ma⁴-no³, jo³-sˀin² nca³ me³-le⁴ cjoa⁴nta³-le⁴, jme¹-ni³ nca³ cˀoa⁴coi⁴tso⁴-si¹ni³ta³-con²³ nca³ jon², cˀoa⁴ jme¹-ni³ nca³ cˀoa⁴sˀian⁴-si¹nio³.

Coi³ cjoa⁴ nˀion¹ nta³ tsˀa³sje³je³ya³ Cristo je² Ni³na¹. Qui³tsjoa³-le⁴ je² jan³ˀain¹ xi³ nqui²sa⁴-sa³ to⁴ti¹tjon² ti¹jna³ cao⁴-ni³ tsa² nca³yi³je³ jan³ˀain¹, jme¹-ni³ nca³ coi⁴ncha¹xco¹nchˀin³-si¹ni³ nca³tsˀi³ xi³ tˀa³tsˀe⁴ jan³ˀain¹-le⁴ Jesús. Coi⁴ncha¹xco¹nchˀin³-le⁴ nca³tsˀi³ xi³ tjio¹ ncˀa³jmi³, cao⁴ xi³ tjio¹ i⁴ son³ˀnte³ cao⁴ xi³ tjio¹jin³ na³nqui³, jme¹-ni³ nca³ si⁴²qui²xi⁴ya³nta³-si¹ni³ nca³tsˀi³ cho⁴ta⁴ nca³ Jesucristo je² ni¹ Nai³-na¹. Cˀoa⁴-sˀin² cˀoa⁴sje³je³ya³ Ni³na¹ Nˀai³-na¹.

Nta³ cˀoa⁴tˀiaon⁴³ nca³yi³je³, a³li² no²cjoa⁴ti³cao⁴-jion²³, a³li² cho¹na³nqui³ya³-jion²³, jme¹-ni³ nca³ ni⁴jme³-jin² je¹ xi³ sˀe⁴-si¹ni³no³, cˀoa⁴ nca³ nta³ coain¹cao⁴-si¹nio³ yao³-no³ nca³ ˀnti¹-le⁴ Ni³na¹ nio¹³ xi³ ña³qui³ tsjao³. Ti³yo³jin³-lao⁴³ cho⁴ta⁴son³ˀnte³ xi³ tsˀen⁴, xi³ chˀao³ tjio¹con³. Cˀoa⁴-sˀin² ti⁴yo³jin³ ˀi³sen³ˀi³saon³ i⁴ son³ˀnte³-vi⁴ jo³-ni³ tsa² lˀi¹.

Jon² xi³ cjai¹nca³ tsjoa³que⁴-no³, jo³-sˀin² nca³ qui³ ni²tjo³son²³ nca³ntsjai², a³li² to⁴cˀia⁴-jin² cˀoa⁴nˀiaon²³ cˀia⁴ nca³ an³ ti²jna⁴, to⁴jo³ cˀoa⁴tˀiaon⁴³ ntˀai⁴-vi⁴ nta³ tsa² tsian²³. Cˀoa⁴-sˀin² ti⁴chjaon¹³ cjoa⁴vi³tjo³ntjai²-no³ cao⁴ cjoa⁴jcon³ cao⁴ cjoa⁴fa³tse¹.