Popular Bible Verses from Hebreos 11

Share

Coi³ xi³ ma³cjain¹-na¹, coi³ xi³ nta³ nˀion¹tˀa³-ta³coan³², nca³ cjoa⁴qui²xi⁴ nca³ tjio¹ je² cjoa⁴ xi³ cho³ya²-le⁴², xi³ vˀe¹jna³cho⁴ya³ tˀa³tsˀe⁴ cjoa⁴ xi³ tsi² ma³tsen³. Coi³ nca³ coan³cjain¹-le⁴ je² cho⁴ta⁴jchi¹nca³, qui³chˀa²sje³qui²xi⁴ nqui³xcon⁴ Ni³na¹.

Tsa² tsi² ma³cjain¹-na¹, li²coi³ nta³ sˀe³con³ Ni³na¹ xi³ tˀa³tsan⁴². Je² xi³ fa³ˀai³con³-le⁴ Ni³na¹, ma³chjen¹ nca³ coan⁴cjain¹-le⁴ nca³ ti¹jna³ Ni³na¹, cˀoa⁴ nca³ Ni³na¹ tsjoa¹ chji¹-le⁴ je² cho⁴ta⁴ xi³ nˀion¹ va¹sjai³ nca³ je².

Coi³ nca³ ma³cjain¹-na¹, ma³cho⁴ya³-na¹ nca³ cao⁴ cjoa⁴te¹xo³ma³-le⁴ Ni³na¹ qui³sˀe³nta³-ni³ je² son³ˀnte³-vi⁴. Cˀoa⁴-sˀin² je² xi³ ma³tsen³ qui³sˀe³nta³-ni³ je² xi³ tsi² tsa² ma³tsen³.

Coi³ nca³ coan³cjain¹-le⁴ Abraham, cˀia⁴ nca³ qui³no²cjoa⁴-le⁴, qui³si³tjo³son² nca³ ji³tjo³ sa³ˀnta³ ya⁴ ˀnte³ xi³ cˀoa⁴-sˀin² cˀoai⁴cjoa⁴tjao²-le⁴. Cˀoa⁴ ji³tjo³ nca³ tsi² tsa² tsa³ve³ jña³-ni³ve⁴. Coi³ nca³ coan³cjain¹-le⁴, tsa³cˀa³mjen³son² ya⁴ na³nqui³ xi³ qui³ni²sˀe³nqui³-le⁴ jo³-ni³ tsa² na³nqui³ xi³ qui³ni²quin³ya³-le⁴, cˀoa⁴ ntˀia³na³jño³ tsa³cˀe²jna³nqui³ cao⁴ Isaac cao⁴ Jacobo. Ti⁴coi³-ni³ cjoa⁴tjao² xi³ qui³ni²sˀe³nqui³-le⁴ Isaac, Jacobo, cao⁴ Abraham.

Coi³ nca³ coan³cjain¹-le⁴ Noé, cˀoa⁴ nca³ qui³tsa³cjon³que³, tsa³cˀe¹nta³ chi³tso³je³. Cˀoa⁴-sˀin² ji³tjo³ntjai² nca³tsˀi³ cho⁴ta⁴ni³ˀya³-le⁴, nca⁴ cˀoa⁴-sˀin² to⁴nqui³-ni³ tsa³cˀin²ya³-le⁴ xi³ tˀa³tsˀe⁴ cjoa⁴ xi³ cje³ ma³tsen³-jin²sa³. To⁴coi³ nca³ cˀoa⁴-sˀin² coan³cjain¹-le⁴ Noé, tsa³ca³co¹ nca³ tsa³quin²-le⁴ cjoa⁴ñˀain³ cho⁴ta⁴son³ˀnte³, cˀoa⁴-sˀin² tsa³cˀai²cjoa⁴tjao²-le⁴ cjoa⁴qui²xi⁴, xi³ sˀe⁴-na¹ nca³ ma³cjain¹-na¹.

Coi³ nca³ coan³cjain¹-le⁴ Enoc, qui³nˀo²sje³xin² i⁴ son³ˀnte³-vi⁴, nca³ tsi² tsa² cˀen³. Li²coi³ coan³sjai³, nca⁴ Ni³na¹ tsa³cˀa³sje³xin². To⁴nqui³-ni³ nca³ ji³tjo³xin², qui³sˀe³jna³ en¹ xi³ tˀa³tsˀe⁴ nca³ nta³ qui³sˀe³con³ Ni³na¹ xi³ tˀa³tsˀe⁴.

Coi³ nca³ coan³cjain¹-le⁴ Abel, je² njin¹ xi³ sˀe³jten⁴ xi³ qui³tsjoa³tˀa³-le⁴ Ni³na¹ nqui²sa⁴ nta³-ni³ cao⁴-ni³ tsa² cjoa⁴tjao²-le⁴ Caín. To⁴coi³ cjoa⁴ nca³ qui³sˀe³jna³ en¹ nca³ cho⁴ta⁴cjoa⁴qui²xi⁴ coan³, nca³ Ni³na¹ qui³tsjoa³ en¹ tˀa³tsˀe⁴ cjoa⁴tjao²-le⁴. Nta³ tsa² cˀen³, to⁴jo³ nchja⁴-sa³ nca⁴ coan³cjain¹-le⁴.

Coi³ nca³ coan³cjain¹-le⁴, cˀoa⁴-ti⁴ ti⁴je²-ni³ Sara, nca³ je³ja³ˀa³to³-le⁴ ni⁴čhjin³ nca³ sˀe⁴-le⁴ xti³, qui³sˀe³-le⁴ nca³nˀion¹ nca³ coan³-le⁴ tsa³cˀe¹ ˀnti¹. Sara qui³sco³son²-le⁴ nca³ Ni³na¹ ña³qui³ tjin¹qui²xi⁴con³ cˀia⁴ nca³ qui³si³sˀe³nqui³-le⁴ jnco³ ˀnti¹.

Nca⁴ qui³sco³ya²-le⁴ je² na⁴xi⁴na³nta¹tse³-ve⁴ xi³ tjin¹-le⁴ čhjao¹ja⁴ma⁴, jña³-le⁴ xi³ ti⁴je²-ni³ Ni³na¹ tsa³cˀe¹nta³, cˀoa⁴ qui³si³nta³.

Coi³ nca³ coan³cjain¹-le⁴ Moisés, cˀia⁴ nca³ je³jchi¹nca³, coan³cai³-le⁴ nca³ cˀoa⁴tsa³cˀin²-le⁴ ti³-le⁴ tso²ti³-le⁴ Faraón. To⁴sa³ tsa³cja³ˀa¹jin³ nca³ tsa³cja³ˀa¹ cjoa⁴ñˀain³ cao⁴ cho⁴ta⁴-le⁴ Ni³na¹, nca⁴ li²coi³ tsa³cja³ˀa¹jin³ nca³ coan³me³con³ cjoa⁴tsjoa³-le⁴ je¹ xi³ to⁴fa³ˀa³to³. Qui³sco³son²-ni³le⁴ nca³ nqui²sa⁴ chji¹-le⁴ cjoa⁴ nca³ qui³no²cjoa⁴ˀaon³-ni³le⁴ tˀa³tsˀe⁴ Cristo cao⁴-ni³ tsa² je² cjoa⁴nchi⁴na¹ xi³ tsˀe⁴ ya⁴ Egipto, nca⁴ qui³sco³ya³ je² chji¹-le⁴ Ni³na¹. Coi³ nca³ coan³cjain¹-le⁴, ji³tjo³-ni³ ya⁴ Egipto. Li²coi³ qui³tsa³cjon¹-le⁴ cjoa⁴jti³-le⁴ cho⁴ta⁴ti¹tjon², nca⁴ qui³si³nˀion¹jin³ yao³-le⁴ jo³-ni³ tsa² xi³ ti¹co³tsen³-le⁴ xi³ tsi² ma³tsen³.

Coi³ nca³ coan³cjain¹-le⁴ Abraham, qui³tsjoa³tˀa³ Isaac, cˀia⁴ nca³ cˀoa⁴-sˀin² qui³cho²tˀa³. Je² xi³ qui³scoe¹tjao² cjoa⁴ni²sˀe³nqui³, qui³tsjoa³tˀa³ ˀnti¹-le⁴ xi³ to⁴jnco³ je².

Coi³ nca³ coan³cjain¹-le⁴ Rahab, je² chjon⁴²cha³jnqui³, li²coi³ to⁴jnco³ qui³cha³ cao⁴ xi³ tsi² ma³cjain¹-le⁴, cˀia⁴ nca³ to⁴ˀi³nta³nchˀan¹ qui³tsjoa³-le⁴ ˀnte³ je² cho⁴ta⁴-le⁴ Ni³na¹ xi³ ji³cho² co³tsen³che¹.

Coi³ nca³ coan³cjain¹-le⁴ je² cho⁴ta⁴ Israel, ja³ˀa³jin³ je² nta¹chi³con³ xi³ ni² ˀmi², jo³-ni³ na³nqui³qui³xi². Cˀia⁴ nca³ je² cho⁴ta⁴ Egipcios qui³sco²tˀa³ nca³ ja³ˀa³jin³, ya⁴ qui³cha³nqui³nta¹.

Coi³ nca³ coan³cjain¹-le⁴, qui³tsao³jen³ je² xjao¹lao⁴ xi³ ncha³ntai³-le⁴ ya⁴ Jericó cˀia⁴ nca³ tsa³cˀe²ma³ntai³-le⁴ ña³to³ ni⁴čhjin³.

Coi³ nca³ coan³cjain¹-le⁴, tsˀa³sje³ sˀoi¹ pa²xco⁴ njin¹ xi¹jten⁴jon³, jme¹-ni³ nca³ je² a²ncje⁴ xi³ qui³si³cˀen³ ˀnti¹tjon² li²coi³ si⁴²cao⁴-si¹ni³ je² xti³-le⁴ Israel.

Coi³ nca³ coan³cjain¹-le⁴ José, cˀia⁴ nca³ je³ti¹vi³ya³, tsa³cˀe¹ya³ na⁴jmi¹ jo³-sˀin² coi⁴tjo³ xti³-le⁴ Israel, cˀoa⁴ qui³tsjoa³ cjoa⁴te¹xo³ma³ xi³ tˀa³tsˀe⁴ ni³nta³-le⁴.

Coi³ nca³ coan³cjain¹-le⁴ Jacobo, cˀia⁴ nca³ je³ti¹vi³ya³, qui³si³chi³con³tˀain³ nca³ jnco¹jnco¹ xti³-le⁴ José, cˀoa⁴ tsa³ve³xcon¹ Ni³na¹ nca³ tsa³ca³sen²xcon¹nchˀin³ tsa³cja³jten²tˀa³ ya¹ni³se³-le⁴.

Coi³ nca³ coan³cjain¹-le⁴ Isaac, qui³si³chi³con³tˀain³ Jacobo cao⁴ Esaú, xi³ tˀa³tsˀe⁴ cjoa⁴ xi³ cjoa⁴ˀai¹.