Popular Bible Verses from Kitsariyaxi 60

Share

»Kenanukukexi, kenexawatɨni, 'ahekɨariya kaninuaniri. Yawé xawatɨriyaya 'ahetsie kaniutitataweni.

Nuiwarite mepuwitɨkieximeni 'axawatɨriya mexeiyatɨ, meta te'aitamete, 'ahekɨariya ximeri mieme mexeiyatɨ.

Neuxei, kwie yɨriya kananukanaka, teɨteri wahetsie yɨriya 'amayetsuye kanixuaweni. Peru Yawé hekɨariyaya ximeri mieme 'ahetsie kanitaimɨkɨ, xawatɨriyaya 'ahetsie matsiɨkɨtɨ payani.

Waɨkawa mɨwerani xeimiriyarikɨ pɨtaxiɨni, 'etsimutewi nuiwari tɨrɨkaɨyetɨ payani. Ne Yawé nekanihɨkɨtɨni, kepauka tukari maye'ani yanekatiniyurimɨkɨ, nepɨkatihayewa».

Tau pɨkahɨkɨtɨniri tukarikɨ mɨmatsihekɨariwiyani, meta metsa yuhekɨariyakɨ pɨkamatsihekɨariwiyani, Yawé pɨta 'ahekɨariya yuheyemekɨ mieme kanihɨkɨtɨkamɨkɨ, 'akakaɨyari pɨmatsixawatɨriyani.

'Atau hatsuaku pɨka'akayune, meta 'ametseri hatsuaku pɨkatɨni, Yawé kanihɨkɨtɨkamɨkɨ 'ahekɨariya yuheyemekɨ mieme, meta hiwerika tukariyari kaneutiparimɨkɨ.

Mɨpaɨ petiniereme waɨkawa pepuyukatemawieni, 'a'iyari puyuaneni, temawierikakɨ, mɨraye'atɨka mekamani'atɨiriekuni haramaratsie mieme, 'ahetsɨa katini'atɨariemɨkɨ nuiwarite tiwapiini mɨraye'atɨka.

»Teikɨ kenenieri, kenanieretɨye'a: yunaitɨ mepuyuxeɨrie meta 'ahetsɨa mepɨ'axe. 'Aniwema 'ateewa mepaneika, 'aniwema 'ukari mepɨ'atɨariwa me'ɨtɨkietɨ.

Hikɨ 'ana yunaitɨ 'ateɨterima heitserie mepu'uwani, meta yukwietsie mepu'uwani yuheyemekɨ. 'Iteɨri nemikake mɨyɨra xepɨhɨkɨtɨni, newewiya 'aixɨa muyɨ kɨmana nemɨmariwe.

'Akwietsie nanaimarika pɨkamariwani, meta pepɨkaka'unarieni, metatsiere 'akwie manuye'atɨka pɨka'anuye'unarietɨyani, matsi pɨta 'akurarute “Wikweitsitɨarika” pepɨtiterɨwa, meta 'a'ituparite “Nɨawari” pepɨtiterɨwa.

'Akitenie yapɨreuyepietɨkani, tukarikɨ meta tɨkarikɨ pɨkareunarɨmiketɨkani, 'ahetsɨa pɨti'atɨarieni nuiwarite tiwapiinite waɨkawa muraye'atɨka, meta 'ahɨxie xuruku mehewetɨkaitɨ mepuku'uni tewa'aitɨwamete mema'iwarie.

'Ahetsɨa kameyutsixi mewaruhapatɨ yuwaɨkawatɨ mepɨ'axɨani, Mariyani meta 'Epa kiekatari. Tsawa kiekatari yunaitɨ mekani'axɨakuni, huru me'ɨtɨtɨ meta 'ɨkwa witsimu'ɨa, meta Yawé nɨawarieya mekuxatatɨ.

»Tewanarixi 'akuraru mepanukuhana, meta tewa'aitɨwamete mepɨmateta'uximayatsirieni. Tsepa neha'atɨ nemɨmatiukwinitɨakai, kemɨnetinakekɨ nepɨmatsinenimayaka.

»Tsepa pemuku'eiriwakai meta pemutixani'eriwakai, tsepa xewitɨ 'ahuye 'utɨma mɨka'uyeyeikakai, yanepɨtiyurieni 'ahetsie yuheyemekɨ pemuyuta'ɨrenikɨ meta temawierika yamɨreuyuhanenikɨ.

Nuiwarite waretsikɨ pepɨtikwaka, te'aitamete memɨtehexeiyakɨ pepɨtsitsitɨarieka. Hikɨ 'ana mɨpaɨ pepɨretimani kename, ne Yawé, 'awikweitsitɨwame nehɨkɨ, kename ne, nemɨtɨrɨkaɨye Kakuwu hetsiemieme, nemumatsiwikweitsitɨwame nehɨkɨ.