Popular Bible Verses from 1 Te'aitamete 18

Share

Yawé keneneuta'eiya, 'ikɨ teɨteri yamemɨtehetimanikɨ, kename Yawé, Kakaɨyari pehɨkɨ, meta pemɨwa'inie 'ahetsie yuri memɨte'eriekakɨ».

Kepauka maye'a mawari taikai mieme hurayari, Kakaɨyari niukameya 'Eriyaxi xeikeyari yekeka mɨpaɨ katiniuyunenewieni: «Yawé, 'Apɨrahami Kakaɨyarieya meta 'Itsahaki metatsiere 'Ixaheri, hikɨ 'ena yunaitɨ mɨpaɨ meketehetimani 'ekɨ Kakaɨyari pemɨhɨkɨ 'Ixaheri kwieyaritsie, meta kename ne neti'a'uximayatsiriwame nehɨkɨ, meta meketehetimani 'ikɨ mɨya nemɨtiyuriene yapeneti'aitɨakaku xeikɨa netiyuriene.

'Eriyaxi mɨkɨ teɨteri wahɨxie kaninuani, mɨpaɨ katiniwarutahɨawe: —¿Kepaukari 'aixɨa xepɨtiyuani xeime hɨkɨame xepanukuweiya? Xɨka Yawé yurikɨ Kakaɨyari hɨkɨtɨni, kaneuyeweka mɨkɨ xemayexeiyani, xɨkata Wahari yuri kakaɨyari hɨkɨtɨni mɨkɨ xekeneuweiyani. 'Ana teɨteri nixeiniuki 'atsimepɨka'utiyua.

'Ana kwitɨwa Yawé tai muyuawitsie mieme kaneyenɨ'ani, mɨkɨ wai mawari taiyariyari hetsiemieme kaniutitaiya, kɨyexi naime, tetexi, meta kwie, 'atsita haa kanakuwatsiɨxa ma'inierietɨkata mɨyemakai.

Kepauka teɨteri yunaitɨ mɨpaɨ memɨte'unenierixɨ, mekaniukatunuma'uni, mɨpaɨ mekaniutiyuani: «Yawé Kakaɨyari kanihɨkɨtɨni, yemekɨ yuri Kakaɨyari».

'atahutarieka ti'uximayatameya mɨpaɨ katinitaxatɨani: —Haramaratsie 'atineka hai mana kanatimieni. 'Etsikanipeni mamá hepaɨ. Hikɨ 'ayumieme 'Eriyaxi mɨpaɨ katinitahɨawe: —Kenemie 'Akawi mɨpaɨ ketinetahɨawi: “Kaxeta keneukuha'aritɨaka kenanutiyerɨka kenemieri, wiyeri nɨka metsi'ukunuitɨani”.

Hikɨ Yawé tɨrukariyaya kaninuani 'Eriyaxi hetsie, yuhɨiyamekɨ 'anayuhɨaka kaniutanautsa, Ketsireri paitɨ kaniuta'ani 'Akawi 'akuxi kata'awekaku.

Hikɨ 'Eriyaxi 'Akawi mɨpaɨ katiniutahɨawe: —Keneumieni, ketinekwaka, kene'ieka, 'ari wiyeri muwa kanayuaximeni tɨrɨkaɨyetɨ waɨkawa.

Hikɨ tiyu'uximayatame mɨpaɨ katiniutahɨawe: —Kenemie haramaratsie keneukanieri. 'Iparewiwameya heyaka heukaniereka mɨpaɨ kaniutayɨni: —Nitixaɨtɨ nepɨkatixeiya. 'Eriyaxi mɨkɨ 'atahutamexɨa kaniutanɨ'ani mana meukanenierenikɨ

Hikɨ 'Eriyaxi yunaime teɨteri mɨpaɨ katiniwarutahɨawe: —'Ahurawa xekenakɨni. Mɨkɨ 'ahurawa mekaniukɨne. Mawari taiyame Yawé hetsiemieme mu'unikaikɨ 'Eriyaxi 'aixɨa kaniyurieni.

Hikɨ mɨkɨ yukakaɨyari mekanitahɨawikuni, neta Yawé nekanitahɨawimɨkɨ. Kemɨ'ane tai makanɨ'ani mɨkɨ yuri Kakaɨyari kanihɨkɨtɨni. Yunaitɨ teɨteri yamekateniutanaki'erieni mɨpaɨ mɨtiyɨnikɨ.

Mɨkɨ tetexi kaniukuteɨxɨ tamamata heimana hutame, yuxexuime nuiwarite wahetsiemieme Kakuwu niwemama, mɨkɨ Yawé 'Ixaheri mɨtiterɨwaxɨ.

Tuka 'aye'aku 'Eriyaxi kaniwananaimakaitɨni, mɨpaɨ katiniwakɨhɨawekaitɨni: —Karima matsi xekeneutihiwani, yurikɨ xɨari kanikakaɨyaritɨni, peru xɨari kaneyu'iyaritɨaka, yatɨni pɨre'uximayatane, yatɨni 'ateewa paitɨ kaneyeikani. Xɨari matsi pekutsu, xekenanutahɨtɨa.

Mɨkɨ tetexikɨ mawari wewiwame kaniutawewieni Yawé hetsiemieme, waritanata kana'inetɨyani, tamamata heimana 'auxɨwime rituruyari reukanakeme hatsite.