Popular Bible Verses from Ɖɛhan 103

Share

Lǐndɔ̌n ce ní kpa susu nú Mawu Mavɔmavɔ. Ní ma wɔn ɖagbe e é wa lɛ́ɛ kwín ɖokpó ó.

Mawu Mavɔmavɔ wɛ nɔ́ sɔ́ hwɛ e un hu lɛ́ɛ bǐ kɛ mì. É wɛ nɔ́ gbɔ azɔn ce lɛ́ɛ bǐ nú mì. É wɛ nɔ́ hwlɛ́n mì gán ɖo kú sí, é nɔ́ nyɔ́ xomɛ dó wǔ ce ɖésú; é nɔ́ kú nǔbláwǔ nú mì tawun. É bló bɔ nǔ nyɔ́ nú mì sín zǎnzǎn bó ná nyɔ́ nú mì káká yi gbada; é nɔ́ sɔ́ mì dó húzú mɛ wínnyáwínnyá, bɔ un nɔ ɖo wǐnnyáwínnyá mɛ gangan ɖɔhun.

Davídi sín han. Lǐndɔ̌n ce ní kpa susu nú Mawu Mavɔmavɔ; nǔ e ɖo wǔ ce é bǐ ní sɔ́ nyǐkɔ mímɛ́ tɔn su.

Mawu Mavɔmavɔ nɔ ɖe wǎn yíyí xlɛ́ mɛ e nɔ ɖó sísí n'i lɛ́ɛ é, lě e tɔ́ nɔ́ ɖe wǎn yíyí xlɛ́ vǐ gbɔn é.

Lě do gbadahwe jí lín dó zǎnzǎnhwe jí sɔ ɔ́, mɔ̌ do wɛ Mawu Mavɔmavɔ nɔ́ sɛ nǔwanyido mǐtɔn lɛ́ɛ dó zɔ nú mǐ sɔ.

Mawu Mavɔmavɔ ɔ́, xomɛfátɔ́ wɛ, nǔbláwǔkúnúmɛtɔ́ wɛ; é nɔ́ yá wǔ sin xomɛ ǎ, é nyɔ́ xomɛ ɖésú.

É nɔ́ kpɔ́n dó hwɛ e mǐ hu é wú, bó nɔ́ wa nǔ tɔn xá mǐ ǎ. É nɔ́ sɔ́ nǔ e mǐ wa nyi do é sín bǎ dó xo mǐ ǎ. Lě do jǐnukúnsin yi jǐ sɔ ɔ́, mɔ̌ do wɛ xomɛ e Mawu Mavɔmavɔ nyɔ́ dó mɛ e nɔ ɖó sísí n'i lɛ́ɛ wú é yi jǐ sɔ é nɛ́.

Mawu Mavɔmavɔ sɔ́ axɔ́súzinkpo tɔn ɖó jǐnukúnsin; axɔ́súɖuɖu tɔn hú gǎn nǔ bǐ.