Popular Bible Verses from Nǔɖexlɛ́mɛ 13

Share

Nǔ énɛ́ lɛ́ɛ byɔ́ ɖɔ è ɖǒ ná ɖó nǔnywɛ́. Mɛ e ɖó nǔnywɛ́ ɔ́ ní lɛ́n xixa nabí e kanlin ɔ́ nyí é; ɖó gbɛtɔ́ sín nyǐkɔ sín xixa wɛ, bɔ xixa tɔn nyí nǔwɔntɔn kanɖé koatɔ́n-nukún-ɖokpó (666).

Mɛ e ɖo ayǐkúngban jí lɛ́ɛ bǐ ná nɔ sɛn ɛ: yě mɛ e sín nyǐkɔ è ma wlán dó Lɛ̌ngbɔ́ví e è hu ɔ́ sín wěma mɛ ǎ lɛ́ɛ ná sɛn ɛ. Wěma énɛ́ ɔ́, mɛ e ɖo gbɛ lɛ́ɛ tɔn wɛ, bɔ è ko wlán nyǐkɔ yětɔn lɛ́ɛ d'é mɛ sín bǐbɛ́mɛ gbɛ ɔ́ tɔn.

Kanlin ɔ́ zɔ́n bɔ è ɖǒ wuntun alɔ ɖisí ɔ́, abǐ nukɔn nú mɛ bǐ: yɔkpɔ́vú kpó mɛxó kpó; dɔkunnɔ kpó wamamɔnɔ kpó; kannumɔ kpó mɛ e ɖo éɖée sí ɔ́ kpó. Ényí mɛɖé ma ɖó wuntun énɛ́ ɔ́ ǎ ɔ́, é sixú xɔ nǔ ǎ; é ka sixú sa nǔ ǎ. Wuntun ɔ́ wɛ nyí kanlin ɔ́ sín nyǐkɔ, abǐ xixa nabí e nyǐkɔ tɔn nyí é.

Mɛ e ɖo te nú gankpá mɛ ɔ́ ɖó ná yi gankpá mɛ; mɛ e ɖo te nú hwǐ kú ɔ́ ɖó ná kú hwǐ kú; nǔ énɛ́ ɔ́ byɔ́ ɖɔ mɛɖeɖóvo Mawu tɔn lɛ́ɛ ní dɛ, bó ɖó nǔɖiɖi.”

Énɛ́ ɔ́ gúdo ɔ́, un mɔ kanlin ɖé tɔ́n sín xu mɛ; é ɖó zo wǒ, bó ɖó ta tɛ́nwe; é xwe axɔ́súgbákún ɖokpó ɖokpó ɖó zo tɔn lɛ́ɛ ɖokpó ɖokpó jí; è wlǎn nu nylá dó Mawu wú sín nyǐkɔ dó ta tɔn lɛ́ɛ wú.

È ná ɛ gbe ɖɔ ní fun ahwan xá mɛɖeɖóvo Mawu tɔn lɛ́ɛ, bó ɖu ɖo yě jǐ; è ná ɛ acɛ dó akɔta lɛ́ɛ bǐ kpó togun lɛ́ɛ bǐ kpó nu; é ná ɛ acɛ dó gbe lɛ́ɛ bǐ kpó to lɛ́ɛ bǐ kpó nu.

É nɔ zé nǔ e è nǎ gbe e ɖɔ é ní jlɛ́ ɖo kanlin nukɔntɔn ɔ́ nukɔn ɔ́ dó flú gbɛtɔ́ e ɖo ayǐkúngban jí lɛ́ɛ ná. É ɖo ɖiɖɔ nú gbɛtɔ́ e ɖo ayǐkúngban jí lɛ́ɛ wɛ ɖɔ yě ní kpa susu nú kanlin e è sɔ́ hwǐ dó gblé wǔ ná, cóbɔ é ka lɛ́ kpo ɖo gbɛ ɔ́ sín akpajlɛ́, bó dó sɔ́ ɛ su. È nǎ gbe kanlin wegɔ́ ɔ́ ɖɔ ní ná gbɛ kanlin nukɔntɔn ɔ́ sín akpajlɛ́, bónú akpajlɛ́ énɛ́ ɔ́ ná sixú ɖɔ xó, bónú é ná sixú hu mɛ e ma ná nɔ sɛn ɛ ǎ lɛ́ɛ bǐ.

Kanlin e un mɔ ɔ́ ɖi kpɔ; afɔ tɔn lɛ́ɛ ɖi lɔnmɔ sín afɔ; nu tɔn ɖi kinnikínní sín nu. Dlagɔ́ɔn ɔ́ sɔ́ hlɔ̌nhlɔ́n tɔn jó n'i, bó sɔ́ axɔ́súzinkpo tɔn kpódó acɛ tɔn ɖaxó ɔ́ kpó jó n'i.

È nǎ gbe kanlin ɔ́ ɖɔ ní ɖɔ xó, bó dó yí go Mawu wú, bó ɖɔ xó dó zun Mawu; è ná ɛ acɛ ɖɔ ní wa mɔ̌ xɔ sun kanɖé nukún-we (42).

É cí è gblě wǔ i dó ta tɔn lɛ́ɛ ɖokpó ɖɔ ní kú ɖɔhun; lo ɔ́, wǔ e è gblě e ɖɔ ní kú ɔ́, akpa tɔn ko kú. Nǔ tɔn nyɔ́ gbɛtɔ́ e ɖo ayǐkúngban jí lɛ́ɛ bǐ nukún mɛ, bɔ yě ɖo gǔdo tɔn.

Énɛ́ ɔ́ gúdo ɔ́, un mɔ kanlin ɖěvo bɔ é ɖo ayǐkúngban glɔ́ tɔ́n sín wɛ; é ɖó zo we, bɔ zo lɛ́ɛ cí Lɛ̌ngbɔ́ví sín zo ɖɔhun; é ɖo xó ɖɔ wɛ Dlagɔ́ɔn ɖɔhun. É nɔ zán acɛ e kanlin nukɔntɔn ɔ́ ɖó ɔ́ bǐ ɖo nukɔn tɔn. É zɔ́n bɔ ayǐkúngban ɔ́ kpó mɛ e ɖ'é jí lɛ́ɛ kpó nɔ sɛn kanlin nukɔntɔn e wǔ e è gblě e ɖɔ ní kú ɔ́ sín akpa ko kú é.