Popular Bible Verses from Sɛ́nflínmɛ 30

Share

Nǔ e ɖɔ nú mi wɛ un ɖe égbé din ɔ́, un sɔ́ jǐxwé kpó ayǐkúngban kpó ɖó te, bɔ yě ná nyí kúnnuɖetɔ́ ce. Un sɔ́ kú kpó gbɛ kpó ɖó nukɔn mitɔn; nudómɛ kpó ɖɛxodómɛjí kpó ɖó nukɔn mitɔn. Din ɔ́, mi sɔ́ gbɛ ɔ́, bónú mi kpó vǐ mitɔn lɛ́ɛ kpó ná nɔ gbɛ, bó ná yí wǎn nú Mawu Mavɔmavɔ, Mawu mitɔn, bó ná nɔ́ se xó tɔn, bó ná nɔ gbejí n'i; énɛ́ ɔ́, mi ná nɔ gbɛ, bó ná dɔ́ ji ɖo ayǐkúngban e Mawu Mavɔmavɔ xwlé nǔ bó ɖɔ émí ná ná tɔ́gbó mitɔn Ablaxámu, Izáki kpó Jakɔ́bu kpó é jí.

Nyɛ ɔ́, un ɖo zǐnzɔ́n mi wɛ égbé ɖɔ mi ní yí wǎn nú Mawu Mavɔmavɔ, Mawu mitɔn, bó gbɔn ali e é ɖe nú mi lɛ́ɛ jí, bó wa nǔ e é zɔ́n lɛ́ɛ, bó nyi sɛ́n tɔn lɛ́ɛ, bó xwedó gbetakɛ́n tɔn lɛ́ɛ. Énɛ́ ɔ́, mi ná nɔ gbɛ. Mi ná sukpɔ́, bɔ Mawu Mavɔmavɔ, Mawu mitɔn ná xo ɖɛ dó jǐ mitɔn ɖo to e mɛ ná byɔ́ wɛ mi ɖe bɔ é ná nyí mitɔn ɔ́ mɛ.

Izlayɛ́li ví lɛ́ɛ e mi! Mi ɖótó! Égbé ɔ́, un sɔ́ gbɛ kpó nyɔ̌ná kpó ɖó nukɔn mitɔn, bó sɔ́ kú kpó nǔ nyanya kpó ɖó nukɔn mitɔn.

Xó ɔ́ ɖo akpá mitɔn. É ɖo nu mitɔn mɛ, bó ɖo ayi mitɔn mɛ, bónú mi ná sixú zé dó wa azɔ̌ ná.

Mawu Mavɔmavɔ, Mawu mitɔn ná bló bɔ mi ná jó miɖée bǐ n'i; é ná bló bɔ vǐ mitɔn lɛ́ɛ ná jó yěɖée bǐ n'i, bónú mi ná yí wǎn nú Mawu kpódó ayi mitɔn bǐ kpó, kpódó lǐndɔ̌n mitɔn bǐ kpó, bó ná sixú nɔ gbɛ.

Énɛ́ ɔ́, Mawu Mavɔmavɔ, Mawu mitɔn na ná vǐ gěgé mi, kanlin mitɔn lɛ́ɛ ná ji gba, jinukún e mi ná sɔ́ lɛ́ɛ ná sukpɔ́. Mawu Mavɔmavɔ ná bló mɔ̌ dó wa ɖagbe nú mi. Đó lě e ɖagbe wa nú tɔ́gbó mitɔn lɛ́ɛ nyɔ́ Mawu Mavɔmavɔ nukún mɛ sɔ́ é ɔ́, mɔ̌ ɖokpó ɔ́ wɛ ɖagbe wa nú mi lɔ ná nyɔ́ nukún tɔn mɛ.

Amɔ̌, nú mi lɛ́ kɔ sín Mawu Mavɔmavɔ gúdo ɔ́, nú mi ma sɔ́ ɖótó e ǎ, bó jó miɖée dó, bó jɛ kɔ́ ɖe nú vodún lɛ́ɛ jí, bó jɛ yě sɛn jí ɔ́, kún mitɔn ná sú dó sín ayǐkúngban ɔ́ jí. To e mɛ mi xwe bɔ é ná nyí mitɔn ɖo Judɛ́ɛn tɔ ɔ́ gúdo ɔ́, mi ná dɔ́ ji ɖ'é mɛ ǎ. Nyi wɛ ɖo mɔ̌ ɖɔ nú mi wɛ égbé din.

Nǔ e Mawu zɔ́n mi, bɔ un ɖo ɖiɖɔ nú mi wɛ égbé din ɔ́ hú gǎn mi ǎ; blǒbló tɔn gló mi ǎ.

Nǔ e Mawu zɔ́n mi ɔ́ ɖo jǐxwé, bónú è nǎ ɖɔ: “Mɛ̌ ká ná yi jǐxwé din, bó yi se, bó wá ɖɔ nú mǐ, bónú mǐ nǎ bló ɖ'é jí ǎ?”

É ká ɖo xu gúdo bɔ è nǎ ɖɔ: “Mɛ̌ ká ná d'asá xu, bó yí se, bó wá ɖɔ nú mǐ bónú mǐ nǎ se bó bló ɖ'é jí ǎ?”