Popular Bible Verses from Sɛ́nflínmɛ 28

Share

Ényí mi ɖótó Mawu Mavɔmavɔ, Mawu mitɔn nǔgbó, bó ɖó ayi te, bó bló nǔ e é zɔ́n mi, bɔ un ɖo ɖiɖɔ nú mi wɛ égbé din lɛ́ɛ bǐ ɖ'é jí ɔ́, Mawu Mavɔmavɔ, Mawu mitɔn ná bló, bɔ mi ná hú gǎn togun e ɖo gbɛ ɔ́ mɛ lɛ́ɛ bǐ.

Đɛ e Mawu Mavɔmavɔ, Mawu mitɔn xo dó mi jí bɔ mi se tónú n'i ɔ́, é ná nyí ɖagbe nú mi lɛ́ɛ ɖíe

Mawu Mavɔmavɔ ná sɔ́ mi ɖó nukɔn nú akɔta lɛ́ɛ bǐ; mi ná nɔ gǔdo ǎ. Aga wɛ mi ná nɔ nú yě tɛgbɛ; mi sɔ́ ná nɔ do ǎ. Amɔ̌, cóbónú nǔ ná nyí mɔ̌ ɔ́, nǔ e Mawu Mavɔmavɔ, Mawu mitɔn zɔ́n bɔ un ɖo ɖiɖɔ nú mi wɛ égbé din lɛ́ɛ ɔ́, mi ná xwedó bǐ dó wa azɔ̌ ná ganjí.

Mawu Mavɔmavɔ ná hun agbanxɔ tɔn ɖagbe ɖagbe e ɖo jǐnukúnsin ɔ́, bɔ jǐ ná nɔ́ ja dó ayǐkúngban mitɔn jí, bɔ nǔ e mi ná wa lɛ́ɛ bǐ ná nyɔ́ nú mi. Mi ná nɔ́ nya nǔ nú akɔta gěgé, midɛɛ lɛ́ɛ ká ná nya nǔɖé ɖo mɛɖé sí ǎ.

Ényí kɛntɔ́ wá tɔ́n ahwan mi ɔ́, Mawu Mavɔmavɔ ná bló bɔ mi ná ɖu ɖo kɛntɔ́ jí. Ényí ali ɖokpó wɛ yě gbɔn bó wá tɔ́n ahwan mi ɔ́, ali tɛ́nwe wɛ yě ná hɔn gbɔn bó yi.

Mawu Mavɔmavɔ, Mawu mitɔn ná xo ɖɛ dó nǔkún e mi ná ya dó agɔ̌ mɛ lɛ́ɛ bǐ jí, bó ná dó acɛ nǔ e mi ná wa lɛ́ɛ bǐ jí. É ná xo ɖɛ dó mi jí ɖo to e é ná ná mi ɔ́ mɛ.

Mawu Mavɔmavɔ ná xo ɖɛ dó nǔ e mi ná wa lɛ́ɛ bǐ jí.

Mawu Mavɔmavɔ ná xo ɖɛ dó mi jí ɖo toxo mitɔn lɛ́ɛ mɛ, bó ná xo dó mi jí ɖo gle mitɔn lɛ́ɛ mɛ.

Mawu Mavɔmavɔ ná xo ɖɛ dó vǐ e mi ná ji lɛ́ɛ, jinukún e mi ná sɔ́ lɛ́ɛ, gbɔ̌ mitɔn lɛ́ɛ, lɛ̌ngbɔ́ mitɔn lɛ́ɛ kpó nyibú mitɔn lɛ́ɛ kpó jí, bɔ yě ná sukpɔ́.

Ényí mi bló nǔ e Mawu Mavɔmavɔ, Mawu mitɔn zɔ́n mi lɛ́ɛ, bó wa jlǒ tɔn ɔ́, é ná sɔ́ mi bɔ mi ná nyí togun tɔn lě e é kó dó akpá tɔn gbɔn nú mi é.

Mawu Mavɔmavɔ ná xo ɖɛ dó mi jí bɔ nǔɖuɖu ná hán mi ǎ: atínsínsɛ́n ná gɔ́ xasun mitɔn lɛ́ɛ, jinukún ná gɔ́ kɔ́zún mitɔn lɛ́ɛ.

Mawu Mavɔmavɔ ná ná vǐ gěgé mi, kanlin mitɔn lɛ́ɛ ná ji gba, bɔ jinukún e mi ná sɔ́ lɛ́ɛ ná sukpɔ́. É ná bló mɔ̌, bó dó wa ɖagbe nú mi ɖo to e é ɖɔ nú tɔ́gbó mitɔn lɛ́ɛ ɖɔ émí ná ná yě ɔ́ mɛ.

Togun e ɖo gbɛ ɔ́ mɛ lɛ́ɛ bǐ ná mɔ ɖɔ Mawu Mavɔmavɔ tɔn wɛ mi nyí, bó ná nɔ́ ɖi xɛsi nú mi.

Mi ɖó ná zɛ sín ali e xlɛ́ mi wɛ un ɖe ɔ́ jí, bó ná yi sɛn nǔ ɖěvo ǎ.

Mi ma ka se Mawu Mavɔmavɔ, Mawu mitɔn sín gbe bó nɔ acéjí, bó bló nǔ e é zɔ́n mi lɛ́ɛ, bó nyi sɛ́n e é dó nú mi, bɔ un ɖo ɖiɖɔ nú mi wɛ égbé din lɛ́ɛ ǎ ɔ́, nǔ nyanya e ná gbo mi lɛ́ɛ ɖíe