Popular Bible Verses from Ephesus 6

Share

Dǫ xè ełets'egǫ ats'et'ı̨ nıìle, hanìkò yat'a k'aodèe gı̨ı̨lı̨ı̨ eyıts'ǫ dıı nèk'e togoòtł'òo gha k'aodèe gı̨ı̨lı̨ı̨ sìı gıxè ełets'egǫ hǫt'e, eyıts'ǫ yat'a ı̨nìłı̨ı̨ nàgetsoo sìı gıxè ełets'egǫǫ̀ ats'et'ı̨ hǫt'e.

Eyıts'ǫ Yedàyeh Nezı̨ı̨ naxıts'àdı t'à t'asìı hazǫǫ̀ xàɂaa gha yaahtı eyıts'ǫ naxıts'àdı ha weahkè. Eyıt'à hotıì kexoahdı eyıts'ǫ t'aats'ǫǫ̀ Nǫ̀htsı̨ wets'ǫ dǫ hazǫǫ̀ gha yaahtı.

Nǫ̀htsı̨ wets'ǫ eghǫǫ-dǫǫ̀ lanì, Nǫ̀htsı̨ wets'ǫ ełets'egǫǫ-goht'ǫǫ̀ hazǫǫ̀ edek'e nìahwha, hanì-ı̨dè wehłı̨ı̨ naxık'alawo ha nıwǫ kò weghǫahnè ha dìì-le.

Eyıt'à Nǫ̀htsı̨ wets'ǫ eghǫǫ-dǫǫ̀ yàahłı̨ k'ę̀ę̀ ełets'egǫǫ-goht'ǫǫ̀ hazǫǫ̀ yìahdè xè sı̨į̀daahkw'e, hanì-ı̨dè t'asìıłı̨ı̨ naxık'alagedè nı̨dè, nàahtso xè gıts'ǫǫ̀hk'e naahzha ha dìì-le. Eyı hazǫǫ̀ haahłà tł'axǫǫ̀ nı̨dè, gıghǫahnè ha hǫt'e.

Eyı hazǫǫ̀ wexè Nǫ̀htsı̨ ghǫ naxınì nàtso welè, eyı sìı eghǫǫ-dǫǫ̀ t'asade ch'à edenadąą̀ satsǫ̀ k'etı̨ lanì hǫt'e. Naxıgha ehkw'ı-ahodı t'à k'į̀ dèk'ǫ̀ǫ hazǫǫ̀ wehłı̨ı̨ naxıts'ǫ̀ ayehɂı̨ı̨ sìı naekwıì aahłe ha. Eghǫǫ-dǫǫ̀ wets'ǫ satsǫ̀-ts'ah wheahɂǫ lanì, Nǫ̀htsı̨ edaxànaxeehtèe sìı naxıgha ehkw'ı-ahodı welì, eyıts'ǫ Yedàyeh Nezı̨ı̨ wets'ǫ behcho, Nǫ̀htsı̨ weyatıì hǫt'e sìı, wet'à aaht'ı̨.

Eyıt'à nàahtso gıts'ǫ̀ naahɂa, nàowo ehkw'ıı t'à wheahtł'ı̨, eyıts'ǫ satsǫ̀ naxıdzıìwı k'e whetǫ lanì wet'à ehkw'ı ts'eedaa t'à aaht'ı̨. Ke yìı wheahɂè xè ts'atà sı̨į̀daahkw'e, hanì-ı̨dè wegodıì nezı̨ı̨ wet'à ts'èwhı̨į̀ ts'eedaa sìı t'à dǫ ts'ǫ̀ goahde ha dìì-le.

Nǫǫde t'à dıı hanaxèehsı̨: Gots'ǫ̀ K'àowo t'asìı nàtsoo wets'ǫ̀-èlı̨ı̨ sìı t'à nàahtsoò aahde.

Nǫ̀htsı̨ Nı̨htł'è k'e dıı hanì dek'eèhtł'è: “Naxıtà eyıts'ǫ naxımǫ gıts'ǫ̀ nezı̨į̀ aahda, hanì-ı̨dè t'asìı hazǫǫ̀ t'à naxıxè sìghà agode ha, eyıts'ǫ dıı nèk'e whaà nàahdè ha,” dek'eèhtł'è. Nàowodeè hazǫǫ̀ gha sìı eyı nàowo t'akwełǫ̀ǫ̀ wexè yatı nezı̨ı̨ wheɂǫ hǫt'e.

Chekoa yàahłı̨ı̨ sìı gots'ǫ̀ K'àowo wets'ǫ aaht'e t'à xàè naxèot'ı̨ k'èaht'e, eyı sìı ehkw'ı ne t'à.