Te yúhú cuìní‑í sá ncháá xìchi cáháⁿ ndɨhɨ cue tée Yá Ndiǒxí, te na cùnduu ndoo cunduu nine iní‑güedé òré ndonehe‑güedé ndaha‑güedé cáháⁿ ndɨhɨ ñaha‑güedě xii‑gá, chi vá cúú cùdééⁿ‑güedě cuèndá nchaa sá quídé ñàha ñáyiu xii‑güedé, te ni vǎ cání ìní‑güedé cúcuèhé tnáhá‑güedě ndɨhɨ́‑yu. Te càchí tnúhu‑í xii‑n sǎ ncháá ñǎyiu dɨ̀hɨ́ ná cùnduu dío‑yu nàcuáa tàú‑xi cunduu, te vá cúndùu cuehé cunduu duha dàtná cáá dǐo nchaa ñáyiu ndècu ichi cuehé ichi duha, te na ndàdá‑yu dɨ́quɨ̌‑yu nàcuáa tàú‑xi cunduu, te vá ndádá cuèhé ndada duhá‑yu, te vá cání ìní‑yu cunduu vií‑yu ndɨhɨ sá ǐo ndèyáhu, te ni vǎ cání ìní‑yu cuihnú‑yu dóó sǎ ǐo ndèyáhu. Te mee‑ni sǎ vǎha cadá‑yu, chi ducaⁿ tàú‑xi cada nchaa ñáyiu dɨ̀hɨ́ ndécú ìchi Yá Ndiǒxí.