Popular Bible Verses from Taga-Roma 10

Share

Ta no babaen iti panagsao, ipaduyakyakmo ni Jesus nga isu ti Apo, ket patiem iti pusom a pinagungar ti Dios, maisalakankanto.

Ta babaen iti puso, mamatitayo, ket mapalintegtayo iti Dios. Babaen iti bibig, agipaduyakyaktayo, ket maisalakantayo.

Ngarud, umay ti pammati babaen iti panagdengngeg iti mensahe, ket umay ti mensahe babaen iti pannakaikasaba ni Cristo.

Kuna ti Nasantoan a Surat, “Dinto maibabain ti siasinoman a mamati kenkuana.” Mairaman amin a tattao iti daytoy, agsipud ta awan ti pakaigiddiatan dagiti Judio kadagiti Hentil. Ti Dios met laeng ti Apo ti isuamin, ket bendisionanna a sibubuslon ti amin nga umawag kenkuana. Kas kuna ti Nasantoan a Surat, “Maisalakan ti siasinoman nga agpatulong iti Apo.”

Kasano a maiwaragawag ti mensahe, no saan a maibaon dagiti mangasaba? Kas kuna ti Nasantoan a Surat, “Nagsayaat ketdin ti yaay dagiti mangyeg iti naimbag a damag!”

Ngem kasano nga agpatulongda, no dida mamati kenkuana? Kasano a mamatida no dida mangngeg ti mensahe? Kasano a mangngegda no di maipakaammo ti mensahe?

Ta ni Cristo ti pagpatinggaan ti Linteg, tapno ti amin a mamati agbalin a nalinteg iti sangoanan ti Dios.