Popular Bible Verses from Deuteronomio 8

Share

Laglagipenyo a ti APO a Diosyo ti mangted kadakayo iti bileg tapno bumaknangkayo. Aramidenna daytoy gapu ta napudno pay laeng agpapan ita iti nakitulaganna kadagidi kapuonanyo.

Pinagbisinnakayo, sanakayo met la inikkan iti mana, maysa a taraon a diyo pay naramramanan uray dagidi kapuonanyo. Inaramidna daytoy tapno masursuroyo a saan la a tinapay ti pagbiag ti tao no di pay ket dagiti amin a sao ti Dios.

Lagipenyo ti panangidalan ti APO a Diosyo kadakayo iti nabayag a panagdaliasatyo iti let-ang iti uneg ti 40 a tawen. Sinuotnakayo tapno maammoanna no ania ti adda iti pusoyo ken no tungpalenyo dagiti bilinna.

Ngarud, diyo ipagarup a bimmaknangkayo iti bukodyo a pannakabalin.

“Diyo lipaten ti APO a Diosyo; tungpalenyo dagiti amin a lintegna nga intedko kadakayo ita nga aldaw.

Laglagipenyo a disiplinaennakayo ti APO a Diosyo a kas iti panangdisiplina ti ama iti anakna.

Addanto amin a kayatyo a kanen, ket agyamankayto iti APO a Diosyo gapu iti nadam-eg a daga nga intedna kadakayo.”

Tungpalenyo dagiti bilin ti APO: agbiagkayo a kas mayannurot kadagiti lintegna ken agbutengkayo kenkuana.

Iti let-ang, tinaraonannakayo iti mana, maysa a kita ti taraon a dipay naramramanan dagidi kapuonanyo. Pinagsagabanakayo tapno suotennakayo, ket iti kasta, iti kamaudianna, paraburannakayo iti agkakaimbag a banag.

Inton narang-ayen ti panagbiagyo, inton agnaedkayon kadagiti napipintas a balay, inton adun dagiti baka ken karneroyo, pirak ken balitokyo, ket adun ti sanikuayo, saankayo nga agpalangguad. Diyo lipaten ti APO a Diosyo a nangispal kadakayo idiay Egipto a nakatagabuanyo.

Ipannakayo ti APO a Diosyo iti nadam-eg a daga—maysa a daga nga addaan kadagiti karayan ken ubbog ken burayok nga agayus kadagiti tanap ken turod. Nawadwad ti daga iti trigo ken sebada, ubas, igos, granada, olibo ken diro. Sadiay, dikayto agbisin ket addanto amin a masapulyo. Pagminasan iti pirak ken gambang dagiti turodna.

“Tungpalenyo a sipapasnek ti amin a bilinko kadakayo ita nga aldaw tapno umatiddog ti biagyo, umadukayo ken sakupenyo ti daga nga inkari ti APO kadagidi kapuonanyo.

Iti uneg ti 40 a tawen, saan a narunot dagiti pagan-anayyo wenno limteg dagiti dapanyo.

Indalannakayo iti dayta nalawa ken nakabutbuteng a let-ang nga umok dagiti nagita nga uleg ken manggagama. Natikag ken awan danum ti daga, ngem pinagpussuakna ti dakkel a bato tapno adda danum nga inumenyo.