Popular Bible Verses from Deuteronomio 30

Share

Pagpilienkayo iti biag wenno patay, iti bendision wenno iti lunod ti Dios. Awagak ti langit ken ti daga a mangsaksi iti pilienyo. Pilienyo ti biag. Ayatenyo ti APO a Diosyo, agtulnog ken agtalinaedkayo a napudno kenkuana tapno napautto ti panagnaedyo, dakayo ken dagiti kaputotanyo, iti daga nga inkarina nga ited kadagidi kapuonanyo, da Abraham, Isaac ken Jacob.”

No tungpalenyo dagiti bilin ti APO a Diosyo, no ayatenyo, no agtulnogkayo kenkuana ket annurotenyo dagiti amin a lintegna, rumang-aykayto ket agbalinkayto a dakkel a pagilian. Bendisionannakayto ti APO a Diosyo iti daga nga inkay tagikuaen.

“Ita nga aldaw, agpilikayo iti kayatyo: kinaimbag wenno kinadakes, biag wenno patay.

Adda kadakayo. Ammo ken maisaoyo isut' gapuna a tungpalenyo.

Pabaroennakayto ti APO ket agbalinkayto a natulnog tapno ayatenyo iti amin a puso ken kararuayo ken agtultuloykayto nga agnaed iti dayta a daga.

Parang-ayennakayto ti APO iti amin nga aramidyo. Adunto dagiti annakyo ken dagiti bakayo; nawadwadto ti maapit kadagiti talonyo. Maragsakanto ti APO a mangparang-ay kadakayo a kas iti ragsakna a nangparang-ay kadagidi kapuonanyo.

Ngem no agsukirkayo, no dikayo dumngeg ket masulisogkayo nga agdaydayaw kadagiti didiosen, ballaagankayo itan nga awan duadua ti pannakadadaelyo. Ababanto ti biagyo iti dayta a daga nga inkay sakupen iti ballasiw ti Jordan.

“Nalaka a tungpalen daytoy a bilin nga itedko kadakayo. Saan a narigat a gun-oden.

Saan nga iti tangatang ti ayanna. Saan a masapul a saludsodenyo, ‘Siasino ti mapan mangala sadiay tapno mangngeg ken tungpalenmi?’

Saan met nga adda iti ballasiw ti taaw. Saan a masapul a saludsodenyo, ‘Siasino ti mapan mangala iti ballasiw ti taaw tapno yegna kadakami ket mangngeg ken tungpalenmi?’