Popular Bible Verses from 1 CORINTIOS 13

Share

Si chañi cha' ntsu'u tyiquee na ña'a̱ na ji'i̱ ñati̱, talo tyiquee na ji'i̱ ngu' li', cua'ni tya'na ti' na ji'i̱ ngu' li'; si'i na tyiji̱ ti' na cha' ji'i̱ ngu' li', si'i na chcui' tyucuaa ti' na lo'o ngu', ni si'i na cua'ni tyixi na lo'o ngu' li'. Si chañi cha' bi', ná cua'ni suba' na lo'o ngu', si'i xcui' cha' ji'na ti tya'a̱ tyiquee na, ni ná ca ñasi̱' na ji'i̱ ngu' lu'ba ti. Ntsu'u cha' clyu ti' ji'na lo'o ngu', si chañi cha' ntsu'u tyiquee na ña'a̱ na ji'i̱ ngu'.

Si ntsu'u tyiquee na ña'a̱ na ji'i̱ ñati̱, talo tyiquee na ji'i̱ ngu', masi cua ña'a̱ ca cha' cuxi cua'ni ñati̱ bi'; jlya ti' na cua ña'a̱ ca cha' tso'o, ndu̱ ti' na cha' tso'o la caca cha' nde loo la, masi ná jlo ti' na; jua'a̱ tyiquee' talo na lo'o cua ña'a̱ ca cha' nu ndyaca ji'na.

La cui' jua'a̱ si'i na chaa ti' na lo'o ndyacua sca qui'ya ji'i̱ ngu', tso'o la nti' na si xñi ngu' bi' sca cha' liñi.

Bi' cha' lacua, lcaa tyempo ndu'ni cha' tyi'u ti' na ji'i̱ ycui' Ndyosi, lcaa tyempo ndu'ni cha' tu̱ ti' na cha' caca tso'o la ji'na ca nde loo la, lo'o jua'a̱ tyucui tyempo ndu'ni cha' tyu'u tyiquee na ña'a̱ na ji'i̱ tya'a ñati̱ na. Bi' laca cña nu ndulo la cha' cua'ni na, cha' tyu'u tyiquee na ña'a̱ na ji'i̱ tya'a ñati̱ na.

Nde loo la ná ntsu'u cha' tye cha' ntsu'u tyiquee na ña'a̱ na ji'i̱ ñati̱. Nde loo la tyalaa tyempo nu lo'o nga'aa ndu'ni cha' tya chcui' la ycui' Ndyosi lo'o na nde chalyuu, nga'aa ndu'ni cha' chcui' la na cha'cña ji'i̱ xa' ñati̱, ni nga'aa ndu'ni cha' caca cuayá' ti' na lcaa cha' ji'i̱ ycui' Ndyosi ca lo'o caca tyempo bi'; pana ná tye chca cha' ntsu'u tyiquee na ña'a̱ na ji'i̱ ñati̱.

Ná ndu'ni cha' masi nchca tsa chcui' na lcaa lo cha'cña ji'i̱ ñati̱ chalyuu, masi cha'cña ji'i̱ xca̱ nu ntucua ca slo ycui' Ndyosi nde cua̱ chcui' na; si ná ntsu'u tyiquee na ña'a̱ na ji'i̱ xa' la ñati̱, ná sca cha' tso'o ntsu'u tyiquee na li'. Laca na ñi'ya̱ nti' sca sniquiji̱ nu ntyiji'i̱ na ji'i̱ jua'a̱ ti, jua'a̱ laca na ñi'ya̱ laca sca cui'chcua̱ nu lye tsa nclyatu'u na ji'i̱; ná ntsu'u cha' taquiya' ngu' ji'na li'.

Ná ndu'ni cha' masi cacha' na lcaa cha' nu nda ycui' Ndyosi lo'o ñati̱, si ná ntsu'u tyiquee na ña'a̱ na ji'i̱ ngu'. Ná ndu'ni cha' masi jlo ti' na lcaa cha' ji'i̱ ycui' Ndyosi, masi tso'o tsa nchca cuayá' ti' na sca cha' nu ná ngujui ñi'ya̱ nu caca cuayá' ti' ñati̱ nu ngua sa'ni la; ná sca na laca na cuentya ji'i̱ ycui' Ndyosi si ná ntsu'u tyiquee na ña'a̱ na ji'i̱ ñati̱. La cui' ti masi jlya tsa ti' na ji'i̱ ycui' Ndyosi ñi'ya̱ nti' si caca cuityi̱ na ji'i̱ sca ca'ya cua̱, pana si ná ntsu'u tyiquee na ña'a̱ na ji'i̱ ñati̱, ná sca na laca na li'.

La cui' ti ná sca na laca na masi tacha na lcaa cha' tso'o nu ntsu'u ji'na ji'i̱ ñati̱, si ná ntsu'u tyiquee na ña'a̱ na ji'i̱ ngu' bi' li'. Ná ndu'ni cha' masi cua'ni lya' ti' ngu' ji'na, masi su'ba ngu' ji'na lo quii' cha' cajaa na xqui'ya cha' ngusñi na cha' ji'i̱ Jesús, si la cui' tyempo bi' ná ntsu'u tyiquee na ña'a̱ na ji'i̱ tya'a ñati̱ na, ná sca cha' laca na. Si'i na tso'o la na si ná ndu'ni na jua'a̱.

Lo'o tya sube na ni, xcui' cña nu ndu'ni nu sube ngua'ni na; ñi'ya̱ nu nclacua ti' sca nu sube, jua'a̱ nchcui' na li', jua'a̱ ngua'ya cha' hique na, jua'a̱ ngulacua ti' na. Pana lo'o nguluu na, li' nga'aa nclacua ti' na ñi'ya̱ nu nclacua ti' nu sube.