Popular Bible Verses from 1 CORINTIOS 11

Share

Tiya' la li' lo'o cua ndye ngua'ni ngu' si̱i̱, li' ndaya' Jesús ji'i̱ vaso; ndi'ya̱ nacui̱ yu ji'i̱ ngu' li': “Lo'o co'o ma̱ na nu ntsu'u ne' vaso re, li' tyi'u ti' ma̱ cha' tyalú tañi na' xqui'ya qui'ya nu ntsu'u ji'i̱ lcaa ñati̱, cha' jua'a̱ quiñi cha' ji'i̱ ycui' Ndyosi Sti na' lo'o ngu'. Lo'o co'o ma̱ na re, tyi'u ti' ma̱ 'na li'”, nacui̱ Jesús ji'i̱ ngu'. Bi' cha' lcaa quiya' lo'o cacu ma̱ xlyá bi', lo'o co'o ma̱ na nu ntsu'u ne' vaso bi', ña'a̱ cuayá' nu ca̱a̱ Jesús chaca quiya', liñi culu'u ma̱ ji'i̱ ñati̱ cha' ngujuii Jesús lo crusi xqui'ya na.

Ndi'ya̱ cha' nclyu'u na' ji'i̱ ma̱, la cui' cha' nu ndyuna na' lo'o nchcui' ñati̱ nu ngua tsa'a̱ ji'i̱ ycui' nu Xu'na na tya clyo: La cui' talya nu lo'o ndyujui' ngu' cresiya ji'i̱ Jesús, laja lo'o tya ndi'i̱ ñati̱ bi' lo'o Jesús, li' ndaya' Jesús ji'i̱ xlyá, ndya yu xlya'be ji'i̱ ycui' Ndyosi Sti na, lo'o li' ngusa'be yu xlyá bi'; li' nacui̱ Jesús ji'i̱ tya'a ndya'a̱ yu: “Jacu ma̱ xlyá re; ñi'ya̱ nti' cuaña' na', jua'a̱ nti' xlyá re. Cuentya ji'i̱ ma̱ laca cha' nu chcube' na' lo crusi, bi' cha' tyi'u ti' ma̱ 'na lo'o cacu ma̱ xlyá re”, nacui̱ Jesús ji'i̱ ngu' bi'.

Bi' cha' ntsu'u cha' culacua tso'o ti' na lo'o cacu na si̱i̱ bi'; li' tyucui tyiquee na cacu na xlyá bi', co'o na na nu ntsu'u ne' vaso bi'. Si ná culacua tso'o ti' na ni cha' laca nu ndacu na ji'i̱, ni cha' laca nu ndyi'yu na ji'i̱, li' ntsu'u qui'ya ji'na lo'o ycui' Ndyosi, cha' ná ndyi'u ti' na ji'i̱ ycui' Jesús, lo'o jua'a̱ ná ntsu'u ti' na ji'i̱ tya'a na nu stu'ba ndyu'ni tlyu na ji'i̱ Ni.

Ndi'ya̱ ndyaca li': ntsu'u qui'ya ji'na lo'o ycui' Ndyosi, si ná tyucui tyiquee na cacu na co'o na si̱i̱ ji'i̱ ycui' Ni; na ndu'ni cuxi na ji'i̱ ycui' nu Xu'na na li', cha' ná ndyi'u tso'o ti' na cha' nda Jesús ji'i̱ tyucui ña'a̱ ycui' ca yu ngujui'i̱ ca'a̱ ngu' ji'i̱ yu lo crusi, cuati ndyalú tañi yu lo crusi lo'o ngujuii yu jua'a̱ xqui'ya na.

Bi' cha' cui'ya tso'o ma̱ cuentya ña'a̱ cña nu ndu'ni na', lo'o la cui' jua'a̱ cua'ni ma̱ li', cha' ñi'ya̱ laca cña nu ngua'ni Cristo, jua'a̱ laca cña nu ndu'ni na'.